ភ្នំពេញ៖ ប្រមុខរាជរដ្ឋាភិបាលកម្ពុជានៅថ្ងៃ អង្គារ ទី ០៦ ធ្នូ នេះបានណែនាំឲ្យសមាគមន៍ជនពិការមកប្រមូលផ្ដុំគ្នាលេងភ្លេងនៅឯរមណីយដ្ឋានវត្ដភ្នំជំនួស ការប្រគុំតន្ដ្រីនៅតាមដងផ្លូវវិញ គឺដើម្បីចៀសវៀងការស្ទះចរាចរណ៍ និងរក្សាសណ្ដាប់ធ្នាប់សាធារណៈ។
ការថ្លែងរបស់ប្រមុខរដ្ឋាភិបាលធ្វើឡើងនៅក្នុង ទិវាជនពិការកម្ពុជានៅមជ្ឈមណ្ឌលកោះពេជ្រនៅព្រឹកថ្ងៃអង្គារ នេះ។ ក្នុងពិធីនេះសម្ដេចនាយករដ្ឋមន្ដ្រីបានថ្លែងថា ការដែលជនពិការមកប្រគុំតន្ដ្រីនៅរមណីយដ្ឋានវត្ដភ្នំ គឺជាការធ្វើឡើងដោយមានសណ្ដាប់ធ្នាប់ ដែលសម្ដេចថា ការប្រគុំតន្ដ្រីតាមដងថ្នល់នាំឲ្យមានការកកស្ទះចរាចរណ៍។ នៅពេលជាមួយគ្នានេះសម្ដេចបានថ្លែងថា បើជនពិការមកប្រគុំតន្ដ្រីនៅរមណីយដ្ឋានវត្ដភ្នំនឹងមានការជួយឧត្ថម្ភទិញឧបករណ៍តន្ដ្រីឲ្យថែមទៀតផង។ យ៉ាងណាក៏ដោយសម្ដេចទទូចឲ្យជនពិការកុំបណ្ដោយខ្លួនឲ្យក្លាយជាផ្នែកមួយនៃឧបករណ៍របស់ក្រុមណាមួយ។
រយៈពេលប៉ុន្មានខែចុងក្រោយនេះគេសង្កេតឃើញសមាគម ជនពិកា បានដាក់ទីតាំងប្រគុំតន្ដ្រីតាមដងផ្លូវ ដើម្បីទទួលបានការផ្ដល់លុយកាក់ពីអ្នកធ្វើដំណើរ។ មិនត្រឹមតែសមាគមជនពិការទេដែលបានធ្វើដូចនេះសូម្បីតែអ្នកសុំទានផ្សេងៗទៀតជាលក្ខណៈគ្រួសារក៏ធ្វើប្រហាក់ប្រហែលគ្នានេះដែរ៕
