ថៃ៖ ព្រះរាជទាយាទ Maha Vajiralongkorn ត្រូវបានយាងឱ្យមកទទួលការតែងតាំងជាព្រះមហាក្សត្រ ជំនួសបិតាព្រះអង្គដែលបានសោយទីវង្គត ខណៈនេះពលរដ្ឋថៃនៅទូទាំងប្រទេសដែលកំពុងកាន់ទុក្ខ អបអរសាទរចំពោះការឡើងគ្រងរាជរបស់ព្រះអង្គ។
ព្រះមាហាក្សត្រ Vajiralongkorn មានព្រះជន្ម ៦៤ព្រះវស្សា ព្រះអង្គពុំសូវមានឈ្មោះបោះសម្លេងដូចព្រះបិតាព្រះអង្គនោះទេ។ ទោះយ៉ាងនេះក្ដី ពលរដ្ឋដែលមានភក្ដីភាព និងព្រះមហាក្សត្របានចេញមកអបអរសាទរ តាមដងផ្លូវ ដោយពួកគេម្នាក់ៗបានលើព្រះឆាយាល័ក្ខណ៍របស់ព្រះអង្គ ប៉ុន្ដែពួកគេស្លៀកពាក់ឈុតព័ណ៌ខ្មៅ ដែលបង្ហាញពី ការកាន់ទុក្ខចំពោះអតីតព្រះមហាក្សត្រ Bhumibol Adulyadej ជាបិតារបស់ស្ដេចថ្មីដែលបានសោយទិវង្គត កាលពីថ្ងៃទី ១៣ តុលា។
នៅពេលដែល ភាពចម្រុងចម្រាស់នយោបាយ និងស្ថានការណ៍នៅតែអាប់អួរ នាយករដ្ឋមន្ដ្រីថៃ លោក ប្រាយុទ្ធ ចាន់អូចា ដែលឡើងកាន់តំណែងតាមរយៈការធ្វើរដ្ឋប្រហារ កាលពីឆ្នាំ ២០១៤ បានចេញមុខលើ កញ្ចក់ទូរទស្សន៍ ដោយអះអាងថា ព្រះមហាក្សត្រថ្មីអង្គនេះ ពិតជាធានាបានកេរ្តិ៍តំណែល តពីបិតារបស់ព្រះអង្គ។
ជាមួយគ្នានេះ លោកក៏បានអំពាវនាវឱ្យពលរដ្ឋថៃ គោរពព្រះមហាក្សត្រថ្មីដោយភក្ដីភាព ខណៈដែលក្រុមគណបក្សនយោបាយមួយចំនួន ដែលមាននិន្នាការទៅរករាជវង្សបានអបអរសាទរ ក្នុងនោះលោកស្រី អតីតនាយករដ្ឋមន្ដ្រី យីង ឡាក់ ដែលមិនមាននិន្នាការជិតស្និទ្ធ រាជវាំងក៏ថ្លែងអបអរសាទរផងដែរ។
ខណៈនេះ ស្ថានទូតបរទេសជាច្រើននៅទីក្រុងបាងកក ក៏បានចេញសេចក្ដីថ្លែងការណ៍ អបអរសាទរព្រះមហាក្សត្រថ្មី ក្នុងនោះ ស្ថានទូតអាមេរិក បានសម្ដែងក្ដីសង្ឃឹមថា ទំនាក់ទំនងអាមេរិក និងរាជាណាចក្រថៃ នៅតែរឹងមាំ៕