ភ្នំពេញ៖ ប្រធានក្រុមប្រឹក្សារដ្ឋនៃសហភាពមីយ៉ាន់ម៉ា លោកស្រី អង់ សានស៊ូជី បានថ្លែងថា ការបង្រួបបង្រួមជាតិនិងប្រទេសជាតិមានសន្ដិភាព គឺជា ការចាំបាច់បំផុតសម្រាប់ប្រទេសភូមាដែលធ្វើឲ្យមានទំនុកចិត្តដល់អ្នកវិនិយោគទុនបរទេស។
លោកស្រី ស៊ូជី បានថ្លែងដូចនេះ នៅឯកិច្ចប្រជុំមួយជាមួយពួកមន្ដ្រី និងអ្នកជំនួញនៅប្រទេសសិង្ហបុរី ខណៈលោកស្រីធ្វើទស្សនកិច្ច ៣ថ្ងៃ។
លោកស្រីជ័យលាភីនូបែលសន្ដិភាពរូបនេះបានបញ្ជាក់ថា ប្រទេសដែលគ្មានការបង្រួបបង្រួមជាតិគ្មានស្ថេរភាព គឺ មិនអាចធ្វើឲ្យពួកវិនិយោគទុនទុកចិត្តបានឡើយ។ សម្រាប់លោកស្រី គឺ ភូមាមិនត្រូវក្លាយជាប្រទេសអស្ថេរភាពនោះឡើយ។លោកស្រីថា ការបង្រួបបង្រួមជាតិ និង សន្ដិភាពតែមួយគត់ធ្វើអោយប្រទេសជាតិរីកចំរើន។
ការថ្លែងរបស់លោកស្រី អង់ សានស៊ូជី ធ្វើឡើងស្របពេលដែល ពួកយោធាភូមាបានបង្ក្រាបទៅលើសហគមន៍ជនអន្ដោប្រវេសន៍រ៉ូហ៊ីងយ៉ា ដោយបណ្ដាលឲ្យមានការរត់ភៀសខ្លួនជាច្រើនពាន់នាក់ទៅកាន់ប្រទេសបង់ក្លាដេស។
ករណីនេះ នាំអោយមានការព្រួយបារម្ភយ៉ាងខ្លាំងពីប្រទេសជិតខាង និងអង្គការសហប្រជាជាតិអំពីការរំលោភសិទ្ធិមនុស្ស និងអស្ថេរភាពសង្គម។ប្រភព Channel News Asia
