គុបាយ៖ ប្រជាជនគុបាយរាប់លាននាក់ដែលស្មោះត្រង់នឹងអតីតប្រធានាធិបតី Fidel Castro កាលពីថ្ងៃច័ន្ទ ត្រូវបានអនុញ្ញាតឱ្យចូលគោរពវិញ្ញាណក្ខន្ធ មេដឹកនាំរូបនេះ នៅនាទីចុងក្រោយនៃការបញ្ចុះសពលោក។
មនុស្សជាច្រើនបានតម្រង់ជួរចូលទៅទីតម្កល់សព លោក Fidel Castro នៅទីក្រុងឡាហា វ៉ាន់ ដែលរដ្ឋាភិបាលបានរៀបចំធ្វើពិធី ជាប្រវត្តិសាស្ដ្ររបស់ប្រទេសកុម្មុយនីសមួយនេះ។ពលរដ្ឋដែលមានភក្ដីភាពនិងលោក Fidel Castro ម្នាក់ៗសម្រក់ទឹកភ្នែកសោកស្ដាយនូវអ្វីដែលពួកគេហៅថា ការបាត់បង់វីរជនរបស់ខ្លួន។
រដ្ឋាភិបាលទីក្រុងឡាហាវ៉ាន់ ដែលដឹកនាំដោយប្អូនប្រុសបង្កើតរបស់ខ្លួនគឺលោក Raul Castro បានផ្ដើមឱ្យមានការកាន់ទុក្ខមួយសប្ដាហ៍ ប៉ុន្ដែនៅថ្ងៃនេះ គេបានបើកអោយពលរដ្ឋចូលទៅគោរពវិញ្ញាណក្ខន្ធ។
លោក Fidel Castro បានក្លាយជាប្រធានាធិបតីរបស់ប្រទេសគុយបាតាំងពីឆ្នាំ ១៩៥៩ ហើយបានផ្ទេរអំណាចទៅ ឱ្យប្អូនប្រុសលោកនៅឆ្នាំ ២០០៨។ យ៉ាងណាក៏ដោយ Fidel Castro ត្រូវបានពួកលោកខាងលិចចាត់ទុកជាជនផ្ដាច់ការ ដែលបានគៀបសង្កត់ សិទ្ធិសេរីភាពយ៉ាងខ្លាំងលើប្រជាជនខ្លួនឯង។
កាលពីថ្ងៃម្សិលមិញពលរដ្ឋគុយបាដែលភៀសខ្លួនទៅរស់នៅសហរដ្ឋអាមេរិក ពួកគេបានអះអាងថា នឹងត្រឡប់ទៅស្រុកកំណើតពួកគេវិញ ដោយសង្ឃឹមថា ប្រទេសនឹងលែងមានមេដឹកនាំផ្ដាច់ការទៀតហើយ៕
