ភ្នំពេញ ៖ សម្តេចនាយករដ្ឋមន្ត្រី ហ៊ុន សែន បានបន្តបកស្រាយពីខ្នាតរង្វាស់រង្វាល់ព្រំប្រទល់កម្ពុជា-វៀតណាមយ៉ាងដូច្នេះថា ផែនទីខ្នាត ១/១០០ពាន់ នៅតែជាផែនទីផ្លូវការដដែល ដើម្បីយកធ្វើជាមូលដ្ឋានក្នុងការដោះស្រាយការវាស់វែង និងបោះបង្គោលព្រំដែនករណីមានភាពមិនប្រក្រតី។ សម្តេចនាយករដ្ឋមន្ត្រី លើកឡើងដូច្នេះ គឺឆ្លើយតបនឹងម្ចាស់ Facebook ម្នាក់ដែលមានឈ្មោះថា មុ វិណុ ចាន់(Mu Vinu Chan) ដែលបានចូលខមមែនក្នុងទំព័រហ្វេសប៊ុកសម្តេច ដោយស្នើឱ្យពន្យល់ពីបំណងដែលចង់យកផែនទីខ្នាត ១/៥០ ពាន់មកវាស់វែងជំនួសផែនទីខ្នាត ១/១០០ ពាន់ ថាតើជាផែនទីដែលចង់យកប្រើនោះជាផែនទីចាស់ ឬក៏ជាផែនទីដែលសម្តេចចង់ឱ្យបារាំងធ្វើថ្មី។
ជាការឆ្លើយតបទៅនឹងម្ចាស់ Facebook មានឈ្មោះថា មុ វិណុ ចាន់(Mu Vinu Chan) ដែលបានស្នើឱ្យសម្តេច ហ៊ុន សែន ពន្យល់ពីចម្ងល់ដែលថា តើសម្តេច ហ៊ុន សែន យកដែនទី ១/៥០ ពាន់ចាស់ដែលមានស្រាប់ ឬយកផែនទីថ្មីដែលសម្តេចចង់ឱ្យបារាំងធ្វើថ្មី លោកនាយករដ្ឋមន្ត្រី ហ៊ុន សែន បានឆ្លើយតបកាលពីល្ងាចម្សិលមិញ ក្នុងសំណេរដើមលើទំព័រហ្វេសប៊ុកយ៉ាងដូច្នេះថា៖« នេះមិនមែនបង្កើតផែនទីថ្មីទេគឺចម្លងផែនទីពីផែនទីខ្នាត1/100,000 មកខ្នាត 1/50,000 ដើម្បីងាយ ស្រួលវាសវែង និង បោះបង្គោល។ផែនទីខ្នាត1/100,000នៅតែជាផែនទីផ្លូវការ។ ក្នុងករណីយមានការយល់ខុសគ្នា ត្រូវយកផែនទីខ្នាត1/100,000 មកធ្វើជាមូលដា្ឋនក្នុងការដោះស្រាយដដែល»។
សម្តេច ហ៊ុន សែន បន្តថា៖«និយាយរួមការផ្ទេរផែនទី ឬ ចម្លងផែនទីត្រូវតែធានាភាពត្រឹមត្រូវតាមផែនទីដើម និង ដើម្បីយកមកធ្វើការវាស់វែង បោះបង្គោលព្រំដែនឱបានត្រឹមត្រូវ»។
សម្តេចបន្ថែមទៀតថា៖«យើងសុំជំនាញការបារាំងអាស្រ័យដោយបារាំង ជាអ្នកផលិតផែនទីនេះពេលបារាំងដាក់អាណានិគមលើប្រទេសកម្ពុជា វៀតណាម និង ឡាវ»។
កាលពីថ្ងៃទី ២៦ ខែវិច្ឆិកាម្សិលមិញ សម្ដេច ហ៊ុន សែន បានគូសបញ្ជាក់ថា ការប្រើប្រាស់ផែនទីបោនខ្នាត១/១០០ពាន់ គឺលំបាករកចំណុច ដើម្បីបោះបង្គោលព្រំដែន ព្រោះវាតូចពេក ។ ដូច្នេះត្រូវផ្ទេរមកផែនទី UTM ខ្នាត ១/៥០ ពាន់វិញទើបងាយស្រួល ។
មាត្រា ២ នៃរដ្ឋធម្មនុញ្ញបានចែងថា បូរណភាពទឹកដីរបស់ព្រះរាជណាចក្រកម្ពុជា មិនអាចរំលោភបានដាច់ខាតក្នុងព្រំដែនរបស់ខ្លួនដែលមានកំណត់ក្នុងផែនទីខ្នាត ១/១០០.០០០ ធ្វើនៅចន្លោះឆ្នាំ១៩៣៣ -១៩៥៣ ហើយដែលត្រូវបានទទួលស្គាល់ជាអន្តរជាតិនៅចន្លោះឆ្នាំ១៩៦៣-១៩៦៩។
សូមជម្រាបថា កម្ពុជា-វៀតណាម មានព្រំដែនគោកជាប់គ្នាប្រវែង ១២៧០ គីឡូម៉ែត្រ ដែលត្រូវការបោះបង្គោលព្រំដែនចំនួន ៣១៤ បង្គោល។ បើតាមគណៈកម្មការព្រំដែន គិតរហូតដល់ពេលនេះ ភាគីទាំងពីរបានធ្វើការបោះបង្គោលព្រំដែនបានចំនួន ៨៣ ភាគរយហើយ នៅប្រមាណ ១៧ ភាគរយទៀតប៉ុណ្ណោះ៕
