ភ្នំពេញ៖ សម្តេច ហ៊ុន សែន នាយករដ្ឋមន្ត្រីកម្ពុជាបានចំអកឱ្យលោក សម រង្ស៉ី ប្រធានគណ បក្សសង្គ្រោះជាតិដែលកំពុងនិរទេសខ្លួននៅក្រៅប្រទេសនិងបុរសម្នាក់ឈ្មោះ អៀ សុផល ថាជាអ្នកនយោ បាយក្មេងខ្ចីវាយប្រហារលោក ដូណាល់ត្រាំ ថាជាប្រធានាធិបតីផ្ដាច់ការគឺអ្នកទាំង២នេះមិនបានស្វែងយល់ពីភាពឆ្លាតវៃរបស់បុគ្គលនោះជាមុន។
តាមការចុះផ្សាយរបស់អង្គភាព Fresh News នៅពីថ្ងៃទី២៥ វិច្ឆិកាឆ្នាំ ២០១៦សម្តេច ហ៊ុន សែន បានបញ្ចេញសារចំអកឲ្យលោក សម រង្ស៉ី ថាលោកបានវាយប្រហារថា អនាគតប្រធានាធិបតីអាមេរិកជនផ្ដាច់ការតែតាមពិតអ្នកវាយប្រហារមេដឹកនាំកម្ពុជាទេតែត្រូវក្បាលប្រធានាធិបតីអាមេរិកដែលអ្នកឯងចូលចិត្តនោះ។ សាររបស់ប្រមុខរដ្ឋាភិបាលត្រូវបានអ្នកវិភាគថា អ្នកនយោបាយខ្មែរដេកគិតរឿងបង្កជំលោះច្រើនជាងការស្វែងរកការផ្សះផ្សាជាតិ។ តែអ្នកនាំពាក្យបក្សបក្សកាន់អំណាចថា ជាសិទិ្ធបញ្ចេញរបស់អ្នកវិភាគ។ សារបញ្ចេញមតិរបស់សម្ដេចហ៊ុនសែន លើគេហទំព័រFresh News មានខ្លឹមដើមដូចនេះថា៖«ខ្ញុំក៏កំពុងរង់ចាំមើលដែរ ថាតើ២នាក់នេះគេនឹងធ្វើរបៀបណា? បើយោងតាមសំដីគាត់និយាយ អនាគតប្រធានា ធិបតីអាមេរិក គឺជាមនុស្សផ្តាច់ការផង និងជាមនុស្សល្ងង់ខ្វះការអប់រំផង។ បើសិក្សាឲ្យស៊ីជម្រៅលើអត្ថ បទដែលចុះផ្សាយដោយ កាំបូតឌាដេលី មនុស្ស២នាក់នេះ មានចេតនាវាយប្រហារខ្ញុំ ទើបយកខ្ញុំទៅប្រៀបធៀបជាមួយលោក ដូណាល់ត្រាំ ដែលមានចរិត្តលក្ខណៈដូចគ្នា ឬប្រហាក់ប្រហែលគ្នា»។
សម្ដេច ហ៊ុន សែន បានបន្តថាលោក ដូណាល់ត្រាំ គឺសេដ្ឋីមានប្រាក់រាប់ពាន់លានដុល្លារ គឺជាអ្នកជំនួញដ៏ជោគជ័យម្នាក់ និងបេក្ខជនប្រធានាធិបតីដ៏មានសក្តានុពលនៃប្រទេសមហាអំណាចមួយ ត្រូវទទួលការប្រមាថពីមនុស្ស២នាក់នេះ។ នេះពិតជាការវាយក្បាលលោកបែជាត្រូវក្បាលប្រធានាធិបតីអាមេរិកមែន។ សាររបស់ប្រមុខរដ្ឋាភិបាល បន្ថែមទៀតថា៖« នេះពិតជានយោបាយស្ទើរភ្លើង និងក្មេងខ្ចីខ្លាំងណាស់។ សូមអ្នកទាំង២នាក់រៀនសូត្របន្ថែមទៀតលើកិច្ចការនយោបាយ។ នេះជាការផ្តល់យោបល់ដោយសុទ្ធចិត្ត ព្រោះខ្ញុំមិនចង់ឲ្យគេដៀលអស់លោកថា អាភ្លើនោះទេ ព្រោះយើងជាខ្មែរដូចគ្នា។ ក្រៅពីលើកឡើងបែបនេះ នាយករដ្ឋមន្ដ្រីកាន់អំណាចតាំងពីឆ្នាំ១៩៨៥ រូបនេះ បានរម្លឹកឡើងវិញ នូវការវាយប្រហារកាលកន្លងមករបស់លោកសមរង្ស៊ីថា មានសែន អត់ស៊ី ។សាររបស់សម្ដេច ហ៊ុន សែន ដូចនេះថា ៖«នយោបាយមាន សែនអត់ស៊ីមានស៊ីអត់សែន ដែលដាក់ចេញតាំងពីយុទ្ធនាការបោះឆ្នោតឆ្នាំ២០០៣ គឺមិនទាន់បានលុបចោល ឬកែតម្រូវផង ។ពេលនេះមកមានកំហុសលើការមើលងាយ និងប្រមាថចំពោះអនាគតប្រធានាធិបតីអាមេរិកទៀត។ មានទោស រត់ ចោលស្រុក។សូមកុំបន្ទោស អ្នកណាផ្សេងក្រៅពីអណ្តាតខ្លួនឯង គឺអណ្តាតអត់ឆ្អឹង អណ្តាតដែលមិនគ្រាន់តែជេរខ្មែរគ្នាឯងទេ ។តែហ៊ានទៅប្រមាថប្រធាធិបតី ប្រទេសផ្សេងដែលខ្លូនចាត់ទុកថា ជាបីតាប្រជាធិបតេយ្យ និងមាតាសិទ្ធិមនុស្សថា ជាមនុស្សផ្តាច់ការ និងអវិជ្ជាទៀតផង។ សំដីលើកនេះបង្ហាញគ្រប់គ្រាន់ ពីសារជាតិនៃមនុស្សដែលតែងតែបង្កជម្លោះ ហើយទម្លាក់កំហុសឱយអ្នកផ្សេង»៕
កន្លងមកលោក សម រង្សី បានបញ្ចេញទស្សនៈហៅប្រធានាធិបតីដែលទើបជាប់ឆ្នោតសហរដ្ឋអាមេរិកលោក ដូណាល់ត្រាំ ថា ជាជនផ្តាច់ការ និងជាមនុស្ស ឆេវឆាវ ហើយ មានតែមានមេដឹកនាំផ្តាច់ការប៉ុណ្ណោះគាំទ្រលោក ត្រាំ ក្នុងនោះមានលោក ហ៊ុន សែនផងដែរ។ ត្រង់នេះហើយសម្ដេច ហ៊ុន សែន បានវាយប្រហារលោក សម រង្ស៊ី ជាថ្មីទៀតនេះ។ យ៉ាងណាក៏ដោយអ្នកវិភាគថា អ្នកនយោយខ្មែរមិនគួរឌឺឲ្យគ្នាទៅវិញទៅមកទេព្រោះវាធ្វើនាំឱ្យមានបញ្ហាដល់ការឯភាពជាតិ។ លោក បណ្ឌិត មាស នី អ្នកស្រាវជ្រាវពីបញ្ហាសង្គម ថា ការឌឺដង របស់សម្តេសហ៊ុនសែន នេះ វាជាធម្មតាដែលអ្នកនយោបាយតែងតែ ឌឺដងគ្នា។តែសំខាន់អ្នកនយោបាយ ត្រូវត្រិះរកគំនិតឯកភាពជាតិជាមួយគ្នាទើបជាករប្រសើរ ។
ចំណែកលោក គឹម សុខ អ្នកឃ្លាំមើលបញ្ហាសង្គមនិងនយោបាយថា អ្នកនយោបាយគួរតែមានភាពចាស់ទុំជាងនេះដោយត្រូវតែគិតពីបញ្ហាជាតិជាងការគិតតែផលប្រយោជន៍បក្សខ្លួនហើយគិតរកល្បិចដើម្បីបង្កជម្លោះ។ តែសម្រាប់លោក សុខ ឥសាន្ត អ្នកនាំពាក្យណគបក្សប្រជាជនមានប្រសាសន៍គាំទ្រ សម្តេច ហ៊ុន សែន។ លោកថាលោក សម រង្សី ពិតជាអ្នកនយោបាយស្ទើភ្លើងពិតមែន។តែលោកបន្តថា ការលើកឡើងរបស់អ្នកវិភាគគឺជាសិទ្ធសេរីភាពក្នុងការបញ្ចេញមតិ ក្នុងសង្គមប្រជាធិបតេយ្យ។
សម្ដេចនាយករដ្ឋមន្ត្រី ហ៊ុន សែន និង លោកសមរង្ស៊ី មានភាពល្អូកល្អឺននឹងគ្នាមានពេលតិចតួចប៉ុ ណ្ណោះចាប់តាំងពី ឆ្នាំ១៩៩៣ មក។ ឥស្សរជនខ្មែរល្បីឈ្មោះទាំង២នេះ តែងតែមានជម្លោះ នឹងគ្នាដោយការវាយប្រហារពាក្យសម្ដីមិនចេះចប់។ ពោលគឺម្នាក់វាយប្រហារម្នាក់រង។ តែបែបនេះក្ដីអ្នកវិភាគថា ការវាយប្រហារជាសិទិ្ធនយោបាយតែកុំប្រើហិង្សា និងយកតុលាការ ចោទប្រកាន់ផ្តន្ទាទោសគ្នា គឺមិនល្អឡើយ៕