ភ្នំពេញ៖ ក្នុងកិច្ចពិភាក្សាជាមួយ គ.ជ.ប នៅថ្ងៃទី២៥ ខែវិច្ឆិកានេះ គណបក្សសង្គ្រោះជាតិ បានស្នើទៅគ.ជ.ប ចំនួនបីចំណុចក្នុងនោះ គណបក្សប្រឆាំងបានស្នើឱ្យគ.ជ.ប ពន្យាពេលចុះឈ្មោះបីថ្ងៃទៀត។ តែសំណើរនេះ គ.ជ.ប មិនទាន់យល់ព្រមនោះទេ ដោយធ្វើការពិចារណាសិន។ កញ្ញា ឆេង ណាតា រាយការណ៍ព័ត៌មាននេះ៖
គណបក្សសង្គ្រោះជាតិបាន ស្នើសុំឱ្យពន្យាពេលបីថ្ងៃ ក្នុងការចុះឈ្មោះបោះឆ្នោត ចំពោះឃុំ សង្កាត់ណាដែលមានអត្រាអ្នកចុះឈ្មោះក្រោម ៧០ភាគរយ ឬមានមនុស្សកំពុងមកចុះឈ្មោះបោះឆ្នោត ចាប់ពី៥០នាក់ឡើងទៅក្នុងមួយថ្ងៃ។ នេះបើតាមការឱ្យដឹងពីលោក យឹម សុវណ្ណ អ្នកនាំពាក្យគណបក្សសង្គ្រោះជាតិ ដែលបានប្រាប់អ្នកសារព័ត៌មាន បន្ទាប់ពីបញ្ចប់កិច្ចពិភាក្សាជាមួយ គ.ជ.ប នៅថ្ងៃទី២៥ វិច្ឆិកា នេះ។
តាមលោក យឹម សុវណ្ណ ការស្នើសុំឱ្យពន្យាពេលនេះព្រោះតែគណបក្ស សង្កេតឃើញ នៅរយៈពេលប៉ុន្មានថ្ងៃចុងក្រោយនេះ ចំនួនពលរដ្ឋដែលមកចុះឈ្មោះជារៀងរាល់ថ្ងៃនៅតាមឃុំសង្កាត់នៅតែមានចំនួនច្រើននៅឡើយ។
លោក យឹម សុវណ្ណ៖«ឧទាហរណ៍ដូចអ្នកនៅទីក្រុងភ្នំពេញនេះ ឥលូវនេះមាន៩ពាន់នាក់ ម្សិលមិញមាន៩ពាន់ទៅចុះឈ្មោះ ហើយមានខេត្តមួយចំនួនទៀត ពី១ពាន់៥រយ ទៅបីពាន់នាក់ ឃើញថាមានចំនួនច្រើន អញ្ចឹងយើងស្នើសុំឱ្យគ.ជ.ប ពន្យាចុះឈ្មោះចំនួនបីថ្ងៃ។ បីថ្ងៃនេះ គឺផ្តោតអារម្មណ៍ទៅលើឃុំសង្កាត់ដែលមានមនុស្សកំពុងចុះឈ្មោះហ្នឹងចាប់ពី៥០នាក់ឡើងទៅ»។
អ្នកនាំពាក្យគណបក្សប្រឆាំងរូបនេះ រំពឹងថា គ.ជ.ប នឹងយល់ព្រមតាមការស្នើសុំនេះ។
ទាក់ទិនបញ្ហានេះ លោក ហង្ស ពុទ្ធា អ្នកនាំពាក្យ គណៈកម្មាធិការជាតិរៀបចំការបោះឆ្នោត បានប្រាប់ថា គ.ជ.ប ព្រមទទួលយកសំណើនេះទៅពិចារណា ប៉ុន្តែការសម្រេចយ៉ាងណានោះ លោកនៅមិនទាន់បញ្ជាក់ឱ្យដឹងនៅឡើយទេ។ លោក ហង្ស ពុទ្ធា បានឱ្យដឹងថា គ.ជ.ប នឹងធ្វើការពិចារណា នៅពេលបិទបញ្ជីចុះឈ្មោះបោះឆ្នោត ដោយសារ គ.ជ.ប មិនទាន់ មានតួលេខបណ្តោះអាសន្នជាស្ថាពរនោះទេ។ បែបនេះក្តីលោកថា គ.ជ.ប ក៏មិនមានពេលវេលាច្រើនសម្រាប់ការពន្យាដែរ។
លោក ហង្ស ពុទ្ធា៖«នៅពេលដែលទទួលពាក្យមួយម៉ាត់ថា ពន្យាថ្ងៃភ្លាម គ.ជ.ប ត្រូវចំណាយលុយប៉ុន្មានបន្ថែមទៀត ពីព្រោះ៩០ថ្ងៃហើយ នៅតែមិនអញ្ជើញមកចុះខ្ញុំគិតថាបីថ្ងៃគាត់អញ្ជើញមកចុះឬអត់នេះជាបញ្ហាសំណើរ អនុសាសន៍ចេះតែស្នើមក ប៉ុន្តែលទ្ធភាពជាក់ស្តែង ប៉ុន្តែជំហានបឋមដែលសមាជិកគ.ជ.បទាំង៩នាក់លោកបាន ចុះទៅតាមខេត្តហាក់ដូចអស់ហើយ ចេញអស់ហើយ នៅសល់តែអ្នក អត់នៅភូមិទេអត់បានចុះ និងអ្នកចាស់ទុំបន្តិច អ្នកមានបញ្ហាឯកសារតិចតួចដែលអត់ចុះ អញ្ចឹងបើសិនជាពន្យាថ្ងៃថែមក៏មិនដឹងបានលទ្ធផលយ៉ាងដែរ»។
ក្រៅពីសំណើឱ្យពន្យាពេលចុះឈ្មោះបោះឆ្នោត គណបក្សសង្គ្រោះជាតិ ក៏មានសំណើពីរចំណុចទៀតផងដែរ។
សំណើទាំងពីរនេះ លោក យឹម សុវណ្ណ បានប្រាប់ថា៖
.ចង់ឱ្យគ.ជ.ប សម្របសម្រួលទៅលើបែបបទនៃការចុះឈ្មោះ ករណីដូចជាពិបាកក្នុងការបញ្ជាក់លិខិតស្នាមផ្សេង។
.ការធ្វើបច្ចុប្បន្នបញ្ជីឈ្មោះបោះឆ្នោតនៅឆ្នាំក្រោយ លោកចង់ឱ្យគ.ជ.ប ពិនិត្យពិចារណារទៅលើការធ្វើវិសោធនកម្មច្បាប់ ក៏ដូចជាបទបញ្ជាមួយចំនួន ដើម្បីបើកផ្លូវឱ្យពលករ ជាងមួយលាននាក់ដែលកំពុងធ្វើការនៅក្រៅប្រទេសមានលទ្ធភាពមកចុះឈ្មោះបោះឆ្នោត។
សម្រាប់សំណើនេះ លោក ហង្ស ពុទ្ធា ថា គ.ជ.ប មិនទាន់មានការពិចារណានោះទេ។លោកថា ការសម្រេចចិត្តលើបញ្ហាណាមួយ ត្រូវពិនិត្យទៅលើស្ថានភាពថវិកា ស្ថានភាពបច្ចេកទេស និងស្ថានភាពច្បាប់។
សេចក្តីប្រកាសព័ត៌មានរបស់គ.ជ.ប បានឱ្យដឹងថា លទ្ធផលបណ្តោះអាសន្ននៃការចុះឈ្មោះបោះឆ្នោត ដើម្បីរៀបចំបញ្ជីបោះឆ្នោតថ្មី ឆ្នាំ២០១៦ ពីថ្ងៃទី០១ ខែកញ្ញា ដល់ថ្ងៃទី២៤ ខែវិច្ឆិកា ឆ្នាំ២០១៦ ចំនួនអ្នកដែលបានមកចុះឈ្មោះបោះឆ្នោតមានចំនួន ៧ ៥៣៧ ២៦៦ ស្មើនឹង ៧៧.៩៩%៕