ភ្នំពេញ៖ កាលពីថ្ងៃទី២៣ខែវិច្ឆិកា ឆ្នាំ២០១៦ នៅស្នងការដ្ឋាននគរបាលខេត្តកំពង់ចាម មានរៀបចំកិច្ចប្រជុំមួយ ដែលចូលរួមដោយលោកឧត្តមសេនីយទោ ទី ឡុង អនុប្រធាននាយកដ្ឋាននគរបាលចរាចរណ៍ និងសណ្ដាប់ធ្នាប់ នៃអគ្គស្នងការដ្ឋាននគរបាលជាតិ ក្រសួងមហាផ្ទៃ លោកឧត្តមសេនីយត្រី ជុំ ថានីស្នងការរងនគរបាលខេត្តកំពង់ចាម លោកវរសេនីយ៍ឯកឡុង ម៉េងសែ នាយការិយាល័យចរាចរណ៍ផ្លូវគោកខេត្ត ព្រមទាំងនាយរងការិយាល័យ នាយផ្នែក នាយរងផ្នែក ព្រមទាំងមន្ត្រីនគរបាលសរុបចំនួន៤០រូប។ កិច្ចប្រជុំនេះមានបំណងដើម្បីពង្រឹងការរឹតបន្ដឹងច្បាប់ចរាចរណ៍ផ្លូវគោកនៅក្នុងខេត្ត។
លោកឧត្តមសេនីយ៍ត្រី ជុំ ថានី បានជម្រាបពីរបាយការណ៍ ទិន្ន័យ និងស្ថានភាពចរាចរណ៍ក្នុងខេត្តនាពេលកន្លងមក ហើយក៏បានលើកឡើងពីកិច្ចខិតខំបំពេញការងាររបស់ភ្នាក់ងារនគរបាលខេត្តនាពេលកន្លងមក។ លោកបានបញ្ជាក់ថា នគរបាលចរាចរណ៍បានចុះអប់រំតាមសហគមន៍ បានសហការជាមួយកាកបាទក្រហមកម្ពុជាសាខាខេត្តកំពង់ចាមក្នុងការអប់រំអ្នកធ្វើដំណើរតាមគោលដៅភ្លើងស្ដុបក្នុងខេត្ត បានចុះអនុវត្តការរឹតបន្ដឹងច្បាប់ចរាចរណ៍ផ្លូវគោក បានអប់រំជនល្មើសនៅតាមគោលដៅត្រួតពិនិត្យការអនុវត្តច្បាប់ចរាចរណ៍ បានធ្វើការពិន័យចំនួន៩៨៩១៥ករណី ហើយក៏បានធ្វើការបញ្ជូនជនល្មើសទៅតុលាកាចំនួន១៣ករណីផងដែរ។
ដោយឡែក លោកឧត្តមសេនីយ៍ទោ ទី ឡុង បានថ្លែងការកោតសរសើរដល់ស្នាដៃរបស់កម្លាំងនគរបាលខេត្តកំពង់ចាមដែលបានធ្វើកន្លងមកព្រមដោយមានលទ្ធផលគួរចាប់អារម្មណ៍។ ជាលទ្ធផលនៃកិច្ចប្រឹងប្រែង មួយរយៈកាលចុងក្រោយនេះ តួលេខនៃចំនួនអ្នកបាត់បង់ជីវិតក្នុងឧប្បទ្ទវហេតុគ្រោះថ្នាក់ចរាចរណ៍មានការថយចុះ ជាពិសេសក្នុងពេលបុណ្យធំៗប្រចាំឆ្នាំ។ លោកឧត្តមសេនីយ៍ក៏បានផ្ដល់មតិណែនាំដល់មន្ត្រីនគរបាលឲ្យមានការអត់ធ្មត់ មានសុជិវធ៌មក្នុងពេលបំពេញភារកិច្ចទៀតផង។
ក្រៅពីនោះ លោកក៏បានធ្វើការ ប្រគល់ជូននូវសម្ភារៈមានដូចជាសាជីជ័រ ចំនួន២០ និងភ្លើងវឹលបំភ្លឺគោលដៅរឹតបន្ដឹងច្បាប់ចរាចរណ៍ចំនួន១០ចង្កៀង។ សម្ភារៈទាំងអស់នេះនឹងត្រូវប្រើប្រាសនៅតាមគោលដៅរឹតបន្ដឹងច្បាប់ ហើយវាមានផលប្រយោជន៍ក្នុងការជួយធ្វើឲ្យការរឹតបន្ដឹងច្បាប់មានសុវត្ថិភាពនិងប្រសិទ្ធិភាពជាងមុនដែរ។
សូមជម្រាបថា សម្ភារៈទាំងអស់នេះទទួលការឧបត្ថម្ភពីអង្គការ សម្ព័ន្ធអន្តរជាតិទប់ស្កាត់ផលប៉ះពាល់នៃគ្រឿងស្រវឹង(IARD) ។លុះដល់វេលាយប់ លោកឧត្តមសេនីយទោ ទី ឡុង ក៏បានចូលរួមក្នុងគោលដៅរឹតបន្ដឹងច្បាប់ចរាចរណ៍ផ្លូវគោក និងផ្ដល់ការណែនាំនៅហ្នឹងទីកន្លែងគោលដៅនោះតែម្ដង។
ក្នុងឯកសណ្ឋានជាភ្នាក់ងារនគរបាលចរាចរណ៍ផ្លូវគោក កញ្ញាព្រិន្ទបាលឯក ភួង ចាន់សុគន្ធាវី ដែលមានរាងស្ដើងបង្គួរបានឈរក្នុងជំហរយ៉ាងស្វាហាប់ក្នុងការវាស់ជាតិអាល់កុលក្នុងខ្យល់ដង្ហើមរបស់អ្នកបើកបរ។ ដោយមានការជួយជ្រោមជ្រែងពីមិត្តរួមការងារនៅក្នុងគោលដៅរឹតបន្ដឹងច្បាប់នារាត្រីនោះ កញ្ញាព្រិន្ទបាលឯក បានអនុវត្តវិធានវាស់ជាតិអាល់កុលបន្ដពីអ្នកបើកបរម្នាក់ដល់ម្នាក់ទៀតសឹងគ្មានទំនេរដៃ។ ប្រកបដោយកាយវិការ និង ភាសារទន់ភ្លន់ តែបង្កប់ដោយភាពហ្មឺងម៉ត់ បានធ្វើឲ្យអ្នកបើកបរដែលតម្រូវឲ្យរាប់លេខដាក់ម៉ាស៊ីន (ដើម្បីយកចំហាយខ្យល់ឲ្យម៉ាស៊ីនវិភាគ) ឫផ្លុំបំពង់វាស់កម្រឹតជាតិអាល់កុលមានការចូលរួមដោយគ្មានអល់ឯក។ កញ្ញាបានថ្លែងថា« ការប្រឹងប្រែងរបស់ខ្ញុំគឺព្រោះតែចង់ឲ្យ អ្នកធ្វើដំណើរគ្រប់រូបកាន់តែមានសុវត្ថិភាពជាងមុនបន្ដិចម្ដងៗ »។
នៅម្ខាងផ្ឡូវឯនោះវិញ លោក សេង វ៉ា អាយុ៤២ឆ្នាំ ជាប្រជាពលរដ្ឋម្នាក់រស់នៅក្នុងក្រុងកំពង់ចាម បានឈររេរានៅមុខផ្ទះសម្លឹងមើលសកម្មភាពនគរបាលរឹតបន្ដឹងច្បាប់នាពេលនោះ។ លោកថ្លែងថាមានការចាប់អារម្មណ៍ខ្លាំងលើសកម្មភាពរឹតបន្ដឹងច្បាប់ចរាចរណ៍ផ្លូវគោកនេះ។ លោកមានចិត្តកោតសរសើរដល់ស្មារតីនិងកិច្ចប្រឹងប្រែងរបស់នគរបាលចរាចរណ៍ដែលខិតខំធ្វើការមិនស្គាល់យប់ថ្ងៃដើម្បីសុវត្ថិភាពប្រជាពលរដ្ឋ។ លោកចង់ឲ្យប្រជាពលរដ្ឋគួរមានការភ្ញាក់រព្ញកចូលរួមខ្លួនគោរពច្បាប់ចរាចរណ៍ ឲ្យបានច្រើនជាងពេលបច្ចុប្បន្ននេះដើម្បីសុវត្ថិភាពទាំងអស់គ្នា។
សម្រាប់ព័តមានបន្ថែម៖
ខឹម សុផល
ទូរស័ព្ទ 078 53 54 06