ភ្នំពេញ៖ នៅថ្ងៃទី២៥ វិច្ឆិកាស្អែកនេះ សាលាដំបូងរាជធានីភ្នំពេញ នឹងបើសវនាការលើសំណុំរឿងក្លែងបន្លំឯកសារ ពាក់ព័ន្ធនឹងលោក សម រង្ស៊ី និងជំនួយការរបស់លោកពីរនាក់ទៀត ដែលសំណុំរឿងនេះ នាំឱ្យលោក ហុង សុខហួរ មានទោស៧ឆ្នាំ។ជំនួយការរបស់លោក សម រង្ស៊ី ២រូបនេះ ម្នាក់ឈ្មោះ អ៊ឹង ជុង លាង និង ម្នាក់ទៀតឈ្មោះ សម្បតិ្ត សត្យា។ តែបើតាមព័ត៌មាន អ្នកទាំង២រូបបានភៀសខ្លួនទៅក្រៅប្រទេស។ ពួកគាត់ត្រូវបាន ចោទពីបទសមគំនិត ក្លែងសន្ធិសញ្ញាផែនទីព្រំដែនកម្ពុជាវៀតណាម បង្កភាពវឹកវរធ្ងន់ធ្ងរដល់សន្តិសុខសង្គម។
លោក សម រង្ស៊ី ដែលកំពុងនិរទេសខ្លួននៅក្រៅប្រទេស ដែលត្រូវតុលាការបើកសវនាការលើរូបលោកផងដែរ បានសរសេរលើទំព័រហ្វេសប៊ុករបស់លោកថា ករណីនេះគឺជារឿងនយោបាយ។
លោកបាន បំភ្លឺដូចនេះថា៖«រឿងនេះ ជារឿងនយោបាយសុទ្ធសាធ ហើយអ្នកដែលធ្វើការចោទប្រកាន់នោះ មិនសំអាងលើការពិតមួយដ៏សំខាន់ ដែលគេធ្វើមិនដឹងមិនលឺ។ ការពិតនោះ គឺអ្វីដែលលោក ហុង សុខហួរ បានយកមកបង្ហាញតាមទំព័រ Facebook របស់ខ្ញុំ កាលពីថ្ងៃ ១១ សីហា ២០១៥ នោះ គឺជាឯកសារ ដែលមានការបកប្រែខុសមួយពាក្យពីភាសាខ្មែរ ទៅភាសាអង់គ្លេស ហើយពីភាសាអង់គ្លេស ត្រឡប់មកភាសាខ្មែរវិញ។ ពាក្យនោះ គឺពាក្យ "កំណត់ឡើងវិញ" ឬ "Redefine" ដែលគេបានបកប្រែត្រឡប់ត្រឡិន ទៅជាពាក្យ "រំលាយ" ឬ "Dissolve"»។
លោកបាន បញ្ជាក់ថា ឯកសារដែលមានការបកប្រែខុសមួយពាក្យនេះ មិនមែនលោក ហុង សុខហួរ បានប្រឌិត ឬកែច្នៃខ្លួនគាត់ទេ តែឯកសារនេះ ត្រូវបានគេផ្សព្វផ្សាយទាំងស្រុងតាមប្រព័ន្ធអ៊ីនធើណេត (Internet) តាំងពីយូរឆ្នាំ មុនលោក ហុង សុខហួរ ទៀត www.worldkhmerradioonline.com។
ទាក់ទិនសំណុំរឿង កាលពីថ្ងៃទី៧ ខែវិច្ឆិកា អតីតសមាជិកព្រឹទ្ធសភា លោក ហុង សុខហួរ ត្រូវបានតុលាការកាត់ទោសឱ្យជាប់ពន្ធនាគារ ៧ ឆ្នាំ ពីបទក្លែងបន្លំឯកសារសាធារណៈ បទប្រើប្រាស់ឯកសារសាធារណៈក្លែង និង បទញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម៕
