ភ្នំពេញ៖ នៅព្រឹកថ្ងៃទី២៣ ខែវិច្ឆិកានេះ អង្គការសង្គមស៊ីវិល និងអ្នកពាក់ព័ន្ធបានបើកធ្វើសិក្ខាសាលាមួយ ដើម្បីផ្តល់មតិយោបល់លើសេចក្តីព្រាង «ក្រមធនធានធម្មជាតិ និង បរិស្ថាននៃប្រទេសកម្ពុជា»។
សិក្ខាសាលានេះធ្វើឡើងមុនមួយថ្ងៃនៃសិក្ខាសាលាថ្នាក់ជាតិ ដែលក្រសួងបរិស្ថាន នឹងធ្វើនៅថ្ងៃព្រហស្បតិ៍ទី២៤វិច្ឆិកានេះ ក្នុងគោលបំណង ឱ្យសង្គមស៊ីវិល រួមទាំងភាគីពាក់ព័ន្ធនានា មានលទ្ធភាពពិនិត្យទៅលើសេចក្តីព្រាងក្រមធនធានធម្មជាតិនិងបរិស្ថាន និងស្វែងរកមតិរួម យកទៅដាក់ក្នុងសិក្ខាសាលា។ ក្នុងកម្មវីធីនេះនាយកប្រតិបត្តិអង្គការវេទិកាមិនមែនរដ្ឋាភិបាលបានឱ្យដឹងថា អនុសាសន៍ដែលសង្គមស៊ីវិល បានពិភាក្សគ្នាកន្លងមក ត្រូវបានក្រសួងទទួលយក៥០%។ កញ្ញា ឆេង ណាតា រាយការណ៍៖
លោក តឹក វណ្ណារ៉ា នាយកប្រតិបត្តិអង្គការវេទិកាមិនមែនរដ្ឋាភិបាល បានថ្លែងអបអរសារទរដែល អនុសាសន៍របស់សង្គមស៊ីវិល ក៏ដូចជាប្រជាសហគមន៍ ត្រូវបានក្រុមមេធាវីវិស្ណុ និងក្រសួងបរិស្ថានដែលជាអ្នករៀបចំតាក់តែងសេចក្តីព្រាងក្រមបរិស្ថាន ទទួលយក៥០% ។
លោកបន្តថា ក្រមនេះមានសារសំខាន់គឺធានានូវការចូលរួមរបស់សាធារណៈជន នៅក្នុងហេតុផលប៉ះពាលបរិស្ថាន និងធានាឱ្យគម្រោងអភិវឌ្ឍទាំងអស់ក្នុងប្រទេសកម្ពុជា មុននឹងធ្វើការអភិវឌ្ឍត្រូវធ្វើការវាយតម្លៃហេតុផលប៉ះពាល់បរិសា្ថនជាមុន។ លោកពន្យល់ថា ប្រការនេះជំរុញឱ្យមានការដោះស្រាយជម្លោះ ដែលអាចកើតមានជម្លោះរវាងក្រុមហ៊ុន និងប្រជាពលរដ្ឋរស់នៅជុំវិញតំបន់។ ជាមួយគ្នានេះដែរលោកថា ក្រមនេះក៏មានវិសាលភាពគ្រប់ដណ្តប់ទៅលើការគ្រប់គ្រងធនធានធម្មជាតិផងដែរ។
បើតាមលោក តឹក វណ្ណារ៉ា ប្រសិនបើក្រសួងទទួលអនុសាសន៍ទាំងអស់ ឱ្យបានពេញលេញដាក់ទៅក្នុងក្រមនេះ លោកជឿជាក់ថា ក្រមនេះនឹងអាចធានានូវប្រសិទ្ធភាពនៃការ អនុវត្តដែលមានលក្ខណៈល្អប្រសើរ និងឆ្លើយតប ទៅនឹងសេចក្តីត្រូវការរបស់ប្រជាពលរដ្ឋ ព្រមទាំងជំរុញឱ្យមានប្រសិទ្ធភាពទៅលើការគ្រប់គ្រងធនធានធម្មជាតិ ដូចជាព្រៃឈើ ធនធានទឹកជាដើម។
នាយកប្រតិបត្តអង្គការវេទិការមិនមែនរដ្ឋាភិបាលរូបនេះ បានឱ្យដឹងបន្ថែមថា ទិដ្ឋភាពសំខាន់ៗដែលសង្គមបានស្នើរួមមាន ស្នើឱ្យមានការគិតគូរដាក់បញ្ចូលបន្ថែមទាក់ទងនឹងគោលការណ៍ធុរកិច្ច និងសិទ្ធិមនុស្ស ការទទួលខុសត្រូវរបស់សាជីវកម្ម ការគ្រប់គ្រងតំបន់ដីសើមប្រកប ដោយនិរន្តភាព ដោយស្នើឱ្យមានទៅក្រុងបៃតង និងការគ្រប់គ្រងសំណល់រឹងរាវ ការប្រើប្រាស់ថាមពលកើតឡើងវិញ រួមទាំងការចូលរួមរបស់សាធារណៈជននៅក្នុងដំណើរការវាយតម្លៃហេតុផលប៉ះពាលបរិសា្ថនជាដើម។
ទីប្រឹក្សាអមក្រសួងបរិស្ថាន និងជាប្រធានក្រុមបច្ចេកទេសតាក់តែងក្រមធនធានធម្មជាតិ និងបរិស្ថាន លោក ឯ វុទ្ធី បានអះអាងថា ក្រមនេះពិតជាមានផលប្រយោជន៍សំខាន់បំផុត សម្រាប់ការការពារ អភិរក្ស ធនធានធម្មជាតិ ដែលនៅសេសសល់។ លោកបញ្ជាក់ថាដើម្បីឱ្យការងារនេះបានសម្រេចគេត្រូវ បង្កើតក្របខណ្ឌច្បាប់តែមួយសម្រាប់ដោះស្រាយបញ្ហា ដែលទាក់ទងនិងបរិស្ថាន ធនធានធម្មជាតិ និងការប្រើប្រាស់ធនធានធម្មជាតិ ប្រកបដោយនិរន្តរភាព ហើយក៏ជាផ្នែកមួយនៃរបៀបវារៈកំណែទម្រង់ទូលំទូលាយ សម្រាប់អភិវឌ្ឍន៍ដោយចីរភាព និងអភិវឌ្ឍន៍បៃតង។
លោកបន្តថា ក្រសួងបានបើកឱ្យមានការចូលរួមផ្តល់យោបល់យ៉ាងទូលំទូលាយ ពីសាធារណៈជនទាំងអស់ដែលពាក់តាំងពីដើមទីមក ដើម្បីឱ្យក្រមនេះទទួលយកបានទាំងអស់គ្នា។
សេចក្តីព្រាងក្រមបរិស្ថានបង្កើតឡើងក្នុងគោលដៅ លើកកម្ពស់ការអភិវឌ្ឍប្រកបដោយចីរភាព នៃព្រះរាជាណាចក្រកម្ពុជា តាមរយៈការការពារបរិស្ថាន និងការប្រើប្រាស់ប្រកបដោយចីរភាពនៃធនធានធម្មជាតិ។ ក្រមបរិស្ថាននេះត្រូវបានផ្តួចផ្តើមបង្កើតឡើងតាំងពីចុងឆ្នាំ២០១៣ ក្រោយពេលលោករដ្ឋមន្ត្រី សាយ សំអាល់ ឡើងកាន់តំណែង និងចាប់ផ្តើមតាក់តែង នៅចុងឆ្នាំ២០១៤ ហើយក្រមបរិស្ថាននេះ នឹងបញ្ចប់នៅចុងឆ្នាំ២០១៦នេះ។
លោកតឹក វណ្ណារ៉ា រំពឹងថា សេចក្តីព្រាងក្រមធនធានធម្មជាតិ និងបរិស្ថាននេះ នឹងបញ្ជូនទៅកាន់រដ្ឋសភា នៅដើមឆ្នាំ២០១៧ ដើម្បីធ្វើការអនុម័ត៕
