ភ្នំពេញ៖ សេចក្តីព្រាងច្បាប់ថវិកាជាតិឆ្នាំ២០១៧ត្រូវបានរដ្ឋសភាសម្រេចអនុម័តយកមកប្រជុំពិភាក្សា ដោយ សំឡេង៦៦ លើ១០៦រូប ខណៈតំណាងរាស្ត្របក្សប្រឆាំង៣៩រូប មិនបានលើកដៃគាំទ្រ។ សេចក្តីព្រាងច្បាប់ហិរញ្ញវត្ថុនេះ ត្រូវបានអនុម័តនៅម៉ោងប្រមាណជិត៥រសៀលថ្ងៃអង្គារទី២២វិច្ឆិកានេះ បន្ទាប់ពីតំណាងរាស្រទាំង ១០៦ រូបបានធ្វើការពិភាក្សាយ៉ាងផុសផល់។
លោក សុន ឆ័យ តំណាងរាស្ត្រគណបក្សប្រឆាំងដែលបានចូល ប្រជុំសភា បានលើកឡើងថា ថវិកាសម្រាប់ឆ្នាំ២០១៧ គួរតែផ្តល់ទៅលើវិស័យ អប់រំ និងវិស័យសុខាភិបាលច្រើនជាងវិស័យផ្សេងៗទៀត។
លោកបន្តថាបើទោះបីជា វិស័យអប់រំជាវិស័យអាទិភាពក៏ ដោយ ប៉ុន្តែលោកសង្កេតឃើញថា ថវិកាសម្រាប់វិស័យមួយនេះ នៅតែមានចំនួនតិច បើប្រៀបធៀបនឹងវិស័យផ្សេងទៀត។
ក្រសួងអប់រំ យុវជន និងកីឡា ទទួលបានគម្រោងចំណាយ ចំនួន ២ ៣៨៣ ៦៧៣លានរៀល មានសមាមាត្រស្មើនឹង១៨,៣% នៃការចំណាយចរន្តថវិកាជាតិ ត្រូវជា២,៦៨%នៃផ.ស.ស គឺមានកំណើន១៧,៤% ធៀបនឹងឆ្នាំ២០១៦ ដោយក្នុងនោះសមាមាត្រនៃចំណែកចំណាយបន្ទុកបុគ្គលិកមាន៨១,២%នៃថវិកាសរុបរបស់ក្រសួង។
ចំណាយអាទិភាព ក្នុងវិស័យនេះគឺផ្តោតលើ ការបន្តគាំទ្រដល់ការពង្រីកការទទួលបានសេវាអប់រំ និងការលើកកម្ពស់គុណភាពអប់រំ តាមរយៈការបន្ត ផ្តល់អាហារូបករណ៍ដល់សិស្សក្រីក្រ ការបន្តគាំទ្រដល់ការសាងសង់បង្គន់អនាម័យ និងប្រព័ន្ធទឹកស្អាតនៅតាមសាលារៀន។ ជាមួយគ្នានេះ គឺការបន្តវិនិយោគលើការកសាងអគារសិក្សា និងការជួសជុស ថែទាំអគារសិក្សា និងបន្តគាំទ្រដល់កិច្ចដំណើរការរបស់សាលារៀន និងលើកកម្ពស់ប្រសិទ្ធភាពនៃការគ្រប់គ្រងនៅតាមសាលារៀន។
ចំណែកក្រសួងសុខាភិបាលមាន គ្រោងចំនួន១ ២០១ ៨៥៥លានរៀល សមាមាត្រស្មើនឹង៩,២ នៃចំណាយចរន្តថវិកាថ្នាក់ជាតិ ត្រូវជា១,៣៥%នៃផ.ស.ស គឺមានកំណើន ៨,២%ធៀបនឹងឆ្នាំ២០១៦។
បើទោះជាមិនមានការគាំទ្រពីបក្សប្រឆាំងក្ដី តែសេចក្ដីព្រាង ច្បាប់ហិរញ្ញវត្ថុឆ្នាំ២០១៧ ត្រូវបាន តំណាងរាស្ត្របក្សកាន់អំណាច ដែលមានសំឡេងភាគច្រើននៃរដ្ឋសភាបានប្រជុំអនុម័ត ដោយគេរំពឹងថា នឹងអនុម័តទាំងស្រុង លើខ្លឹមសាររួមនៅប៉ុន្មានថ្ងៃទៀតនេះ៕