ក្នុងរយៈពេលបីថ្ងៃ គឹតចាប់ពីថ្ងៃទី១៣ដល់១៥ ខែវិច្ឆិកា ឆ្នាំ២០១៦ កាកបាទក្រហមកម្ពុជា បានសហការជាមួយអង្គការស្ថាបនាជីវិត (SCO)បានរៀបចំការចុះផ្សព្វផ្សាយអំពីសុវត្ថិភាពចរាចរណ៍ជូនដល់ប្រជាពលរដ្ឋដែលបានចូលរួមក្នុងពិធីបុណ្យអុំទូកដ៏ច្រើនកុះករ។
យុជនកាកបាទក្រហមកម្ពុជាចំនួន២០រូបក្នុងមួយថ្ងៃបានធ្វើសកម្មភាពនៅតាមដងផ្លូវ ដោយចែកខិត្តប័ណ្ណផ្សព្វផ្សាយ ចងបដាតាមរថយន្ដ និងនៅតាមច្រកចូលសំខាន់ៗក្នុងក្រុង និងនៅតាមច្រកចូលទៅកាន់កន្លែងប្រមូលផ្ដុំនានា។ មានការជួយឧបត្ថម្ភផ្នែកបច្ចេកទេសនិងថវិកាពីអង្គការសម្ព័ន្ធអន្តរជាតិទប់ស្កាត់ផលប៉ះពាល់នៃគ្រឿងស្រវឹង (IARD)។
ឆ្លៀតពេលកំពុងមមាញឹកក្នុងការចុះផ្សព្វផ្សាយ លោក ខឹម សុផល ប្រធានកម្មវិធីសុវត្ថិភាចរាចរណ៍នៃកាកបាទក្រហមកម្ពុជា បានឲ្យដឹងថាគោលបំនងនៃការផ្សព្វផ្សាយពេលនេះគឺ ដើម្បីឲ្យប្រជាពលរដ្ឋមានការយល់ដឹងច្រើនថែមទៀតពីគ្រោះថ្នាក់ចរាចរណ៍ផ្លូវគោក និងចេះប្រុងប្រយ័ត្នដោយខ្លួនឯង មិនប្រព្រឹត្តនូវឥរិយាបទដែលនាំឲ្យមានគ្រោះថ្នាក់ក្នុងពេលធ្វើដំណើរ ក្នុងនោះរួមមានទាំងការបើកបរក្រោមឥទ្ធិពលនៃគ្រឿងស្រវឹងផងដែរ។ លោកសង្កត់ធ្ងន់ថា រាល់ឆ្នាំមានការកតើត្រានិងបានរកឃើញថាការបើកបរក្រោមឥទ្ធិពលនៃគ្រឿងស្រវឹងគឺជាមូលហេតុទីពីរដែលបណ្ដាលឲ្យមានអ្នកបាត់បង់ជីវិតច្រើនជាងគេបន្ទាប់ពីល្បឿន។
លោក ប៉ាត ប៊ុនផា ដែលបានចូលរួមក្នុងយុទ្ធនាកានេះក៏បានថ្លែងថាលោកចង់ឲ្យមានការចូលរួមគោរពច្បាប់ចរាចរណ៍ដោយស្មារតីទទួលខុសត្រូវកាន់តែច្រើនថែមទៀតក្នុងចំណោមអ្នកធ្វើដំណើរលើផ្លូវ។ ដើម្បីឲ្យមានការគោរពច្បាប់បានល្អ ជាបឋម តម្រូវឲ្យមានការយល់ដឹង បន្ទាប់មកត្រូវមានការចូលរួមចេញពីដួងចិត្តពឹតៗផង។ ការយល់ដឹងពីមូលហេតុនាំឲ្យមានគ្រោះថ្នាក់ រួមទាំងការអនុវត្តនូវឥរិយាបទមានសុវត្ថិភាពពេលធ្វើដំណើរគឺ ជាកិច្ចការចាំបាច់ដែលអាចជួយទប់ស្កាត់ជាមុននូវគ្រោះថ្នាក់កើតឡើងនាំឲ្យខាតបង់ធនធានមនុស្ស បាត់បង់កម្លាំងពលកម្ម ទ្រព្យសម្បត្តិផ្ទាល់ខ្លួន និងរបស់ជាតិ។
លោកឆាយ ទៀង អាយុប្រមាណជា៤០ឆ្នាំ ជាប្រជាពលរដ្ឋធ្វើដំណើរពីខេត្តកណ្ដាលមកចូលរួមសប្បាយក្នុងពិធីបុណ្យអុំទូកនារសៀលថ្ងៃទី១៥ វិច្ឆិការនេះ បានសំដែងនូវការយល់ឃើញរបស់គាត់ថា ប្រសិនជាមានការក្រើនរំលឹកញឹកញាប់ និងគ្រប់កន្លែងដូចជាក្រុមយុវជនកាកបាទក្រហមធ្វើពេលនេះ នឹងជួយធ្វើឲ្យប្រជាពលរដ្ឋឆាប់បានដឹង និងផ្លាស់ប្តូររបៀបធ្វើដំណើរដែលមានកន្លងមក ដូចជាការបើកបរលឿន ការបើកបរក្រោយពេលទទួលទានគ្រឿងស្រវឹងជាដើម។ រៀបរាប់ទាំងមានសំណើចតិចៗ ថា « មិនត្រឹមតែធ្លាប់បានបើកបរក្រោយពេលទទួលទានគ្រឿងស្រវឹងទេ ខ្ញុំថែមទាំងធ្លាប់បានជិះម៉ូតូជាមួយអ្នកស្រវឹងជាអ្នកឌុបជាញយដង។ ដោយឃើញប្អូនៗយុវជនខិតខំធ្វើការនាពេលនេះ ធ្វើឲ្យខ្ញុំនឹកឃើញថាខ្លួនបានប្រព្រឹត្តកំហុសដែលមិនគួរធ្វើនាពេលខាងមុខ។ ពេលនេះធ្វើឲ្យខ្ញុំ្តនឹកគឹតពីខ្លួនឯង និងពីគ្រួសារផងនោះ ខ្ញុំគឹតថាឈប់ធ្វើបែបនេះទៀតហើយ »។
សូមបញ្ជាក់ផងដែរថា យោងតាមតួលេខ ស្ដីពីការគ្រោះថ្នាក់ចរាចរណ៍ក្នុងឆ្នាំ២០១៥ មានគ្រោះថ្នាក់ចរាចរណ៍ មានចំនួន ៤.៥១៩លើក បណ្ដាលឲ្យមនុស្សស្លាប់ ២.២៣១នាក់។ ចំនួនអ្នកស្លាប់ក្នុងគ្រោះថ្នាក់បណ្ដាលពីការបើកបរក្រោយពេលពិសាគ្រឿងស្រវឹងមានចំនួន ៣៨៧នាក់ ។
សម្រាប់ព័តមានបន្ថែម៖
លោក ខឹម សុផល
ប្រធានកម្មវិធីសុវត្ថិភាពចរាចរណ៍ នៃកាកបាទក្រហមកម្ពុជា
ទូរស័ព្ទ ០៧៨ ៥៣៥ ៤០៦