ព័ត៌មានក្នុងប្រទេស

អ្នកនយោយកំពូលកម្ពុជា អបអរចំពោះលោក ដូណាល់ត្រាំ ខណៈសម្តេចឌឺដងឱ្យលោក សម រង្ស៊ី

ភ្នំពេញ ៖ បន្ទាប់ពីលទ្ធផលបោះឆ្នោតបានប្រកាសថា លោក ដូណាល់ ត្រាំ ជាប់ឆ្នោតជាប្រធានាធិបតីអាមេរិក អ្នកនបោយកំពូលៗនៃប្រទេសកម្ពុជាបានបង្ហាញការសារទរ ចំពោះជ័យជំនះនេះ។

បេក្ខជនប្រធានាធិបតីមកពីគណបក្សសាធារណរដ្ឋ លោក ដូ ណាល់ត្រាំ

សម្តេចនាយរដ្ឋមន្ត្រី ហ៊ុន សែន ដែលបានប្រកាសអបអរចំពោះជ័យជំនះរបស់លោក ដូណាល់ត្រាំ តាមរយៈហ្វេសប៊ុកផ្លូវការបានសរសេរថា៖« អបអរសាទរ ឯកឧត្តម ដូណាល់ ត្រាំ (Donald Trump) ដែលបានទទួលជោគជ័យសំរាប់ការបោះឆ្នោតជាប្រធាធិបតីអាមេរិក»។

ក្រៅពីសម្តែងការអបអរចំពោះ ជ័យជំនះរបស់លោក ដូណាល់ត្រាំ សម្តេចនាយករដ្ឋមន្ត្រី ក៏បានបញ្ចេញសារឌឺដងមួយដែលទំនងចង់សំដៅទៅលោក សម រង្ស៊ី ដែលធ្លាប់លើកឡើងថា សម្តេច និងលោក ត្រាំ មានចរិកដូចគ្នា។

សម្តេចបានសរសេរថា៖«ប៉ុន្មានថ្ងៃមុន នៅពេលដែលខ្ញុំបង្ហាញនូវការគាំទ្ររបស់ខ្ញុំ ចំពោះ ឯកឧត្តម មានមនុស្សមួយចំនួនបានចេញមកវាយ ប្រហារខ្ញុំ រហូតចោទ ឯកឧត្តម ថាជាមនុស្សផ្តាច់ការទើបមានមនុស្សដូចខ្ញុំទៅគាំទ្រ។ពេលនេះអ្វីៗច្បាស់ហើយ គឺប្រជាជនអាមេរិកត្រូវការឯក ឧត្តមដឹកនាំ ហើយការគាំទ្ររបស់ខ្ញុំក៏មិនខុសដែរ»។

ចំណែកលោក កឹម សុខា ប្រធានស្តីទីគណបក្សសង្គ្រោះជាតិ បានសេរសេរថា នៅលើទំព័រហ្វេសប៊ុកថា ៖«អបអរសាទរចំពោះជ័យជំនះដ៏ធំធេងរបស់គណបក្សសាធារណរដ្ឋនៅសហរដ្ឋអាមេរិក ដែលឈ្នះទាំងក្នុងរដ្ឋសភា ទាំងក្នុងព្រឹទ្ធសភា ជាពិសេសជ័យជំនះរបស់លោក ដូណាល់ត្រាំ ជាប់ឆ្នោតជាប្រធានាធិបតី ស.រ.អា ទី ៤៥ នេះ»។

មេដឹកនាំគណបក្សប្រឆាំងរូបនេះ បានសរសេរបន្តថា៖ «មុននេះបន្តិចលោកស្រី ហ៊ីលឡារី គ្លីនតុន ដែលជាបេក្ខជនប្រធានាធិបតី មកពីគណបក្សប្រជាធិបតេយ្យបានប្រកាសទទួល ស្គាល់ជ័យជំនះរបស់ លោកត្រាំ ហើយ។ ខ្ញុំជឿជាក់ថា គោលនយោបាយរបស់គណបក្សសាធារណរដ្ឋដែលអោយតម្លៃទៅលើសិទ្ធិ សេរីភាពរបស់មនុស្ស ជាពិសេសដែលខ្ញុំផ្ទាល់បានធ្លាប់ និងតែងតែទទួលបាននូវកិច្ចសហប្រតិបត្តិការកន្លងមកសម្រាប់ប្រទេសកម្ពុជា និងប្រជាពលរដ្ឋខ្មែរនោះប្រាកដជានឹងបន្តអោយកាន់តែកក់ក្តៅ និងរឹងមាំថែមទៀតជាមិនខាន។»

លោកបណ្ឌិត មាស នី អ្នកស្រាវជ្រាវពីការអភិវឌ្ឍសង្គមយល់ថា នេះជារឿងធម្មតាដែលអ្នកនយោបាយតែងជូនពរគ្នា ទៅវិញទៅមក នៅពេលដែលអ្នកណាម្នាក់ជាប់ជាអ្នកដឹកនាំប្រទេស គឺប្រទេសដទៃទៀតតែងតែថ្លែងនៅការអបអរសារទរ។

លោកបន្តថា បើទោះបីអ្នកនយោបាយទាំងនោះថ្លែងនូវការអបអរសាទរក៏ដោយ ក៏មិនប្រាកដថាអ្នកដឹកនាំនោះ គាំទ្រម្នាក់នោះទេ តែវាជាភាសាការទូត។

ទាក់ទងនឹងការជាប់ឆ្នោតរបស់លោក ដូណាល់ត្រាំ លោក មាស នី យល់ថានេះគឺជាបំណងប្រពលរដ្ឋអាមេរិកដែលចង់ផ្លាស់បក្សដឹកនាំ ព្រោះគណបក្សប្រជាធិបតេយ្យ របស់លោក គ្លីន តុនបានដឹកនាំពីរអាណត្តិមកហើយ ប៉ុន្តែកំណែទម្រង់ការផ្លាស់មានតិចតួច ទើបពលរដ្ឋសាកល្បងចង់ធ្វើការផ្លាស់ប្តូរ ទៅបក្សផ្សេងវិញ។

លោកបន្តយ៉ាងណាមិញ បើទោះបីជាគេមើល ឃើញថា លោកត្រាំមានចរិកផ្តាច់ការបន្តិចមែន ប៉ុន្តែនៅក្នុងសង្គមអារិកប្រធាធិបតីនីមួយៗមិនអាចយកអំណាចរបស់ខ្លួនទៅធ្វើអ្វីបានតាមចិត្តនោះទ។

លោកមាស នីមាន ប្រសាសន៍បន្ថែមថា ការបោះឆ្នោតនៅអាមេរិកនៅខណៈនេះ ក៏អាចឆ្លុះបញ្ចុះពីការបោះឆ្នោតនៅកម្ពុជានៅឆ្នាំ២០១៧ និង២០១៨ ខាងមុខមបានដែរ ដែលអាចនឹងមានការផ្លាស់ប្តូរ។ លោក មាស នី៖«អញ្ចឹងក្នុងនោះមានអ្នកខ្លះ ក៏គេមានគំនិតវិជ្ជមានមកលើនយោបាយនៅស្រុកយើងអាចជាការលើកទឹកចិត្តឱ្យមេដឹកនាំផ្តាច់ការមានការសប្បាយចិត្តដោយសារតែមានអ្នកផ្តាច់ច្រើនច្រើនឡើងមកទៀត ក៏ប៉ុន្តែសម្រាប់ទស្សនៈខ្ញុំ ក៏មើលឃើញពីទស្សនៈវិជ្ជមាន ព្រោះអ្វីដែលប្រជាពលរដ្ឋបោះគាំទ្រលោកត្រាំគឺជាសញ្ញាមួយ ដែលបង្ហាញថាពលរដ្ឋអាមេរិកកាំងគេមិនពេញនឹងរបបប្រព័ន្ធគ្រប់គ្រងសព្វថ្ងៃ អញ្ចឹងគេចង់សាកល្បងមេដឹកនាំថ្មីមួយទៀតដែលអាចផ្លាស់ប្តូរសង្គមអាមេរិក មិនចង់មិនចង់ នឹងមានការឆ្លុះបញ្ចាំងទៅលើការបោះឆ្នោតនៅក្នុងស្រុកខ្មែរយើង នៅឆ្នាំ២០១៧ ២០១៨ ខាងមុខវាអាចថា ការផ្លាស់ប្តូរអាចកើតមាននៅកស្រុកខ្មែរយើង។»

សូមជម្រាបផងដែរថា កាលពីព្រឹកថ្ងៃទី០៣ ខែវិច្ឆិកា ក្នុងពេលអញ្ជើញធ្វើ បឋកថាស្តីពី ការដឹកនាំបញ្ជា កម្លាំង សភាពការណ៍ជាតិ អន្តរជាតិ និងបញ្ហាផ្សេងៗ នៅបណ្ឌិតសភានគរបាលកម្ពុជា សម្តេចនាយករដ្ឋមន្ត្រីហ៊ុន សែន បានថ្លែងថាបើលោកត្រាំ ជាប់ឆ្នោត ពិភពលោកនឹងប្រែប្រួលទៅល្អប្រសើរ ដោយគ្មានសង្គ្រាម ព្រោះលោក ដូណាល់ត្រាំ ជាពាណិជ្ជករ។ ប៉ុន្តែប្រសិនបើលោកស្រី ហ៊ីលឡារី គ្លីនតុន ជាប់ឆ្នោតជាប្រធានាធិបតីវិញ ពិភពលោកអាចនឹងមានសង្គ្រាម។ ម្យ៉ាងទៀត បើលោកស្រី គ្លីនតុន ជាប់ឆ្នោត ទំនាក់ទំនងអាមេរិក និងរុស្ស៊ី គ្មានភាពល្អប្រសើរ ផ្ទុយទៅវិញ បើលោកត្រាំ ជាប់ឆ្នោត ទំនាក់ទំនង រុស្ស៊ី និងអាមេរិក នឹងក្លាយជាមិត្តយ៉ាងល្អ៕

Post Views: 227