ហ្សាការតា ៖ ប៉ូលីសឥណ្ឌូនេស៊ីបានចាប់ខ្លួនមនុស្ស ១០ នាក់ដែលព្យាយាមប៉ិនប៉ងបង្កការញុះញង់ឱ្យមានអំពើហិង្សានៅក្នុងការប្រមូលផ្តុំគ្នាមួយ ប្រឆាំងនឹងចៅហ្វាយក្រុងហ្សាកាតាកាន់ដែលកាន់សាសនាគ្រិស្ដ ព្រោះចៅហ្វាយក្រុងរូបនេះបានប្រមាថគម្ពីរកូរ៉ានរបស់សាសនិកឥស្លាម។
ហេតុការណ៍នេះ បានបណ្តាលឱ្យមានការពន្យារពេលនៃដំណើរទស្សនកិច្ចរបស់ប្រធានាធិបតីឥណ្ឌូនេស៊ីលោក ជូកូ វីដូដូ(Joko Widodo) ទៅកាន់ប្រទេសអូស្ត្រាលីនៅថ្ងៃសៅរ៍ ទី០៥ វិច្ឆិកានេះ ។
លោក វីដូដូ(Widodo) បានប្រឈមនឹងការរិះគន់ចំពោះភាពកម្សោយក្នុងការទប់ស្កាត់ក្រុមដែលមាននិន្នា ការប្រកាន់ខ្សែតឹង ដែលបណ្តោយឱ្យមនុ ស្សរាប់ម៉ឺននាក់មកកាន់ផ្លូវនៃរដ្ឋធានីហ្សាកាតានេះ។ តែយ៉ាងណាមានការដោះសារពីការិយាល័យ លោក វីដូដូ ដោយលើកហេតុផលថា ក្នុង អំឡុងពេលមានការតវ៉ាកាលពីថ្ងៃសុក្រនោះ លោក វីដូដូ កំពុងជាប់រវល់ត្រួតពិនិត្យគម្រោងផ្លូវដែកមួយខ្សែនៅឯព្រលានយន្តហោះ។
នៅក្នុងសន្និសីទកាសែតមួយ ធ្វើឡើងទាំងពាក់កណ្ដាលយប់ថ្ងៃសុក្រ លោក វី ដូដូ បានបន្ទោសលើបុគ្គលនយោបាយមួយចំនួន ដែលបានបព្ឆោះកំហឹងពលរដ្ឋឱ្យប្រឆាំងលើអភិបាលរដ្ឋធានីហ្សាកាតា លោក ប៉ាស៊ូគី ចាហាចា ភូណាម៉ា(Basuki Tjahaja Purnama) ដែលកំពុងឈរឈ្មោះសម្រាប់ការបោះឆ្នោតដែលគ្រោងធ្វើឡើងនៅខែកុម្ភៈ ហើយលោកនឹងត្រូវប្រកួតប្រជែងជាមួយបុគ្គលពីររូបទៀតដែលកាន់សាសនាម៉ូស្លីមសម្រាប់ដំណែងនេះ។
អភិបាលរដ្ឋធានីហ្សាកាតារូបនេះ គឺជាបុគ្គលមានតួនាទីពេញដោយអនុភាព ហើយមួយវិញទៀតលោក Widodo ក៏បានជួយជ្រោមជ្រែងអភិបាលរដ្ឋធានីរូបនេះផងដែរ មុនពេលដែលលោក វីដូដូ បានក្លាយជាប្រធានាធិបតីកាលពីរឆ្នាំមុន។
លោក វីដូដូ គ្រោងធ្វើដំណើរទស្សនកិច្ចរបស់លោកនៅថ្ងៃទី ៦ ដល់ទី ៨ វិច្ឆិកា ទៅកាន់ប្រទេសអូស្ត្រាលីដើម្បីពង្រឹង និងកែលម្អទំនាក់ទំនងផ្តោតលើកិច្ចសហប្រតិបត្តិការសេដ្ឋកិច្ចផ្លូវសមុទ្រ និងកិច្ចខិតខំប្រឹងប្រែងដើម្បីប្រឆាំងនឹងពួកសកម្មប្រយុទ្ធអ៊ីស្លាម។
សេចក្តីថ្លែងការណ៍ពីការិយាល័យរបស់លោកប្រធានាធិបតីបានសរសេរថា៖« លោកកំពុងរកមើលពីស្ថានភាពចុងក្រោយបំផុត និងស្ថានភាពនៅក្នុងប្រទេសឥណ្ឌូនេស៊ី ដែលតម្រូវឱ្យមានវត្តមានលោកក្នុងប្រទេសជាប្រធានាធិបតី។ ហើយចុងបញ្ចប់លោកប្រធានាធិបតី Joko Widodo បានសម្រេចចិត្តពន្យារពេលដំណើរទស្សនកិច្ចរបស់រដ្ឋរបស់លោកគ្រោងនឹងប្រទេសអូស្ត្រាលី»។
សូមរំលឹកថា ការតវ៉ាប្រឆាំងនឹងលោក ភូណាម៉ា(Purnama) អភិបាលរដ្ឋធានីហ្សាកាតា ដែលមានខ្សែស្រលាយជាជនជាតិចិនជាលើកដំបូងនេះ គឺធ្វើឡើងដោយសន្តិវិធីប៉ុណ្ណោះ ប៉ុន្តែកាលពីល្ងាចថ្ងៃដដែលនោះមនុស្សម្នាចូលរួមតវ៉ាមានការកើនឡើង ហើយបានបង្កឱ្យមានចលាចលមួយនាំឱ្យមានការប៉ះទង្គិច ជាមួយប៉ូលិសរហូតដឈានដល់ការសម្រេចចិត្តបាញ់ឧស្ម័នបង្ហូរទឹកភ្នែក និងបាញ់ទឹក ពីសំណាក់ប៉ូលិសតែម្តង។
ក្នុងហេតុការណ៍តវ៉ាទាមទារទម្លាក់អភិបាលរដ្ឋធានីហ្សាកាតានេះដែល ក៏បណ្តាលឱ្យមនុស្សម្នាក់ស្លាប់ និងមនុស្សជាង ១០០ នាក់ផ្សេងទៀតត្រូវរងរបួសក្នុងអំពើហិង្សានោះ ប៉ុន្តែចំនួនអ្នករងរបួសភាគច្រើនជាមន្ត្រីប៉ូលីស។ អ្នកនាំពាក្យប៉ូលិសជាតិលោក បាយ រ៉ាហ្វាល អាម៉ារ(Boy Rafli Amar) បានថ្លែងក្នុងសន្និសីទកាសែតមួយនៅថ្ងៃសៅរ៍នេះថា រថយន្តពន្លត់អគ្គិភ័យដែលប៉ូលិសយកមកដើម្បីបាញ់ទឹកបង្ក្រាបក្រុមអ្នកតវ៉ាចំនួនបីគ្រឿងត្រូវបានដុតបំផ្លាញផងដែរ។
ហាងជនជាតិចិន និងភោជនីយដ្ឋានមួយចំនួននៅភាគខាងជើងក្រុងហ្សាការតាត្រូវបិទទ្វារ នៅថ្ងៃសៅរ៍នេះ ខណៈដែលមន្ត្រីសន្តិសុខបានបន្ថែមកម្លាំងយាមព្រះវិហារបរិសុទ្ធ ក្នុងនោះក៏មានសាលារៀនផងដែរនេះបើយោងតាមការបញ្ជាក់របស់អ្នកស្រុក។
អ្នកនាំពាក្យនៃក្រុមរណសិរ្សការពារអ៊ីស្លាម ហើយដែលជាក្រុមដឹកនាំការតវ៉ានេះបានបដិសេធការទទួលខុសត្រូវចំពោះអំពើហិង្សា និងបាននិយាយថា "ការបង្កហេតុ" គឺផ្តើមចេញពីប៉ូលិសដែលបានបាញ់ឧស្ម័នបង្ហូរទឹកភ្នែក។
ក្រុមនេះអាចនឹងរៀបចំការតវ៉ាផ្សេងទៀត ប្រសិនបើដំណើរការផ្លូវច្បាប់ប្រឆាំងនឹងលោក Purnama សម្រាប់មតិយោបល់ប្រមាថគម្ពីរកូរ៉ា មិនត្រូវបានអនុវត្តនោះ៕ប្រភព៖CNA