តាកែវ៖ សម្ភារៈការិយាល័យចុះឈ្មោះបោះឆ្នោត ឃុំព្រៃល្វា ស្រុកព្រៃកប្បាស ខេត្តតាកែវ ត្រូវបានចោរលួច អស់ជាច្រើន កាលពីយប់ថ្ងៃទី២០ ខែតុលា ឆ្នាំ២០១៦។ នេះបើតាមប្រសាសន៍លោក គង់ សំអូន ស្នងការរងនៃស្នងការដ្ឋាននគរបាលខេត្តតាកែវ។
លោកបន្តថាពេលនេះស្នងការ កំពុងតាមដាននិងកំណត់មុខសញ្ញា ជនសង្ស័យដើម្បីឈានដល់ការចាប់ខ្លួន។ ទោះជាយ៉ាណាពេលនេះលោក មិនទាន់មុខសញ្ញាបាននៅឡើយនោះទេ។
ជុំវិញបញ្ហានេះ លោក ថំ បណ្តូល អនុប្រធាននាយកដ្ឋានគ្រប់គ្រង់ទិន្នន័យអ្នកបោះឆ្នោត និង បញ្ជីបោះឆ្នោត នៃគណៈកម្មាធិការជាតិរៀបចំបោះឆ្នោត មានប្រសាសន៍ថា កុំព្យូទ័រផ្ទុកទិន្នន័យ ចោរមិនលួចយកទៅទេ ព្រោះប្រធានមណ្ឌលចុះឈ្មោះបោះឆ្នោត លោកយកកុំព្យូទ័រ ទៅសាកថ្មនៅផ្ទះ។
ចំណែកសម្ភារៈដែលបាត់បង់មានឌុយសាកថ្មកុំព្យូទ័រ១, ម៉ូឌឹម (អ៊ិនធើណេត)១ កាមេរ៉ា១ Mouse កុំព្យូទ័រ១ ផ្លាស់១ ទ្រនាប់Mouse ១ និង ខ្សែ Network ១ឈុត។ ម៉ូនីទ័រកុំព្យូទ័រ១ ម៉ាស៊ីនស្កែនក្រយៅដៃ១ អាគុយផ្ទុកថាមពល១។
លោកបញ្ជាក់ថាទិន្នន័យចំនួនអ្នកចុះឈ្មោះបោះឆ្នោត មិនបាត់ទេហើយការរិយាល័យ នោះនៅតែបន្តការចុះឈ្មោះបោះឆ្នោតបានព្រោះនៅក្នុងខេត្តមានសម្ភារៈបម្រុង។
ការចុះឈ្មោះបោះឆ្នោត ចាប់ផ្តើមពី ថ្ងៃទី០១ កញ្ញា ដល់ថ្ងៃទី ២៩វិច្ឆិកា ដោយប្រើប្រព័ន្ធកុំព្យូទ័រ និងផ្ដិតស្នាមមេដៃ ៕