អាជ្ញាធរនៃប្រទេសអេព្យួរពី បានចាប់ឃុំខ្លួនមនុស្ស១៦០០នាក់ ខណៈពួកគេបានព្យាយាម បុករបាំងរបស់ប៉ូលីសដែលបិទផ្លូវ នៅពេលដែលប្រទេសនេះដែលរដ្ឋគ្រាមានអាសន្ន។ នេះបើយោងតាមមន្ដ្រីរដ្ឋាភិបាលម្នាក់ បានប្រាប់បណ្ដាញផ្សាយព័ត៌មាន BBC កាលពីថ្ងៃព្រហស្បត្តិ៍ ទី២០ តុលា។
ប្រភពដដែលនេះបានឱ្យដឹងថា កាលពីថ្ងៃច័ន្ទ គេបានចាប់ខ្លួនមនុស្ស១ពាន់នាក់រួចទៅហើយ។
សេចក្ដីថ្លែងការណ៍ដែលស្រង់មកចុះផ្សាយ ដោយគេហទំព័រ FBC បានឱ្យដឹងថា ការចាប់ខ្លួនមនុស្សដោយច្រើនសន្ធឹកសន្ធាប់នេះ គឺធ្វើឡើង នៅរដ្ឋអូរ៉ូពីយ៉ា និងនៅរដ្ឋអាំហារ៉ា ដែលនៅទីនោះ បាតុកម្មបានផ្ទុះឡើងយ៉ាងខ្លាំងក្លា ប្រឆាំងនឹងការដាក់ច្បាប់គ្រាមានអាសន្នរបស់រដ្ឋាភិបាល។
បណ្ដាញផ្សាយព័ត៌មាន BBC បានបញ្ជាក់ទៀតថា ការដាក់ច្បាប់គ្រាមានអាសន្ននៅពេលនេះ គេធ្វើឡើងដើម្បីទប់ទល់នឹងរលកនៃការប្រឆាំងរដ្ឋាភិបាល។
ក្រុមអង្គការសិទ្ធិមនុស្សនិយាយថា អំឡុងរយៈពេល១៤ខែ មកនេះ មនុស្សស្លាប់យ៉ាងតិច៥០០នាក់ ដោយសារប៉ះទង្គិចជាមួយសន្ដិសុខរបស់រដ្ឋ។
ការដាក់ច្បាប់គ្រាមានអាសន្ន បានធ្វើឡើងជាថ្មីម្ដងទៀតនៅថ្ងៃទី៩តុលា ឆ្នាំ២០១៦នេះ គឺ មួយសប្ដាហ៍ប៉ុណ្ណោះ បន្ទាប់ពីមានមនុស្សយ៉ាងតិច ៥៥នាក់ បានស្លាប់ដោយសារការជាន់គ្នា នៅ ក្នុងអំឡុងពិធីសាសនា រដ្ឋអូរ៉ូម៉ូ ហើយព្រឹត្តិការណ៍នេះបានធ្វើមានផ្ទុះការតវ៉ាទូទាំងប្រទេស៕ ប្រភព៖ BBC
