អង្គការសង្គមស៊ីវិល នៅទូទាំងអាស៊ី សំដែងក្ដីបារម្ភ យ៉ាងខ្លាំងចំពោះការធ្លាក់ចុះការគោរពសិទ្ធិមនុស្ស និងលទ្ធិប្រជាធិបតេយ្យ នៅកម្ពុជា ដោយអង្គការទាំងនេះ ទទូចឱ្យកម្ពុជានិងភាគីអន្តរជាតិជួយធានាឱ្យគោរព និងអនុវត្តកិច្ចព្រមព្រៀងសន្តិភាពក្រុងប៉ារីសឡើងវិញ។
សេចក្ដីថ្លែងការណ៍រួមរបស់អង្គការសង្គមស៊ីវិលនៅអាស៊ី ដែលធ្វើការងារពាក់ព័ន្ធលើ កិច្ចការពារសិទិ្ធមនុស្ស និងប្រជាធិបតេយ្យ បានចុះផ្សាយនៅថ្ងៃពុធទី១៩តុលានេះ បានសរសេរថា អស់រយៈពេល ២៥ឆ្នាំមកហើយ ដែលកិច្ចព្រមព្រៀងសន្តិភាពក្រុងប៉ារីស ត្រូវបានបង្កើតឡើង សម្រាប់ ប្រទេសកម្ពុជា តែ មកដល់ពេលនេះ កម្ពុជា មិនបានអនុវត្ត ស្មារតីនៃកិច្ចព្រមព្រៀងនេះបានល្អប្រសើរឡើយ។
សេចក្ដីថ្លែងការណ៍រួមរបស់អង្គការអន្តរជាតិ នៃបណ្ដាប្រទេសនៅអាស៊ី បានបន្តថា គេបានមើលឃើញពីការធ្លាក់ចុះ ការគោរពសិទ្ធិមនុស្ស និង ប្រជាធិបតេយ្យ នៅកម្ពុជា ដែលត្រូវបាន កំណត់ដោយកិច្ចព្រមព្រៀងសន្តិភាពក្រុងប៉ារីស២៣ តុលា១៩៩១។
អង្គការអន្តរជាតិនៅអាស៊ី ទាំង៤០នេះ ក៏បានបានទទូចឱ្យកម្ពុជា បញ្ចប់វិបត្តិនយោបាយ ដោះលែងក្រុមប្រឆាំង សង្គមស៊ីវិល ហើយបានទាមទារ ការបោះឆ្នោត ក្រុមប្រឹក្សាឃុំសង្កាត់ និង បោះឆ្នោតសភា ប្រកបដោយ បរិយាកាសដែល គ្មានការភិតភ័យ និង មានភាពត្រឹមត្រូវ។
ទាក់ទិនសេក្ដីថែ្លងការណ៍នេះ អ្នកនាំពាក្យបក្សកាន់អំណាច លោក សុខ ឥសាន្ត អះអាងថា កម្ពុជា បានអនុវត្តស្មារតីនៃកិច្ចព្រមព្រៀងបានល្អច្រើនណាស់ហើយ ក្នុងរយៈពេល ២៥ឆ្នាំមកនេះ ដែលលោកថា លទ្ធិប្រជាធិបតេយ្យ និងមានការគោរពសិទ្ធិមនុស្សបានដំណើរល្អ ជាងប្រទេសដទៃ។
ចំណែក គណបក្សសង្គ្រោះជាតិ ដែលជាបក្សប្រឆាំងធំជាងគេ នៅកម្ពុជា បានប្រកាស ថានៅថ្ងៃទី ២៣ តុលាខាងមុខ នេះ គណបក្សនឹងរៀបចំ ធ្វើការប្រមូលផ្ដុំគ្នាមួយ នៅទីលានប្រជាធិបតេយ្យ ដើម្បីរម្លឹកខួប២៥ឆ្នាំ នៃកិច្ចព្រមព្រៀងសន្តិភាពក្រុងប៉ារីស ដែលគេថា មិនត្រូវបានអនុវត្តឡើយ ។
កិច្ចព្រមព្រៀងសន្តិភាពទីក្រុងប៉ារីស ២៣ តុលា ១៩៩១ បាននាំឱ្យកម្ពុជាមានសន្តិភាពមានប្រជាធិបតេយ្យ និងមានការអភិវឌ្ឍប្រទេសឡើងវិញ បន្ទាប់ពីកម្ពុជាធ្លាក់ក្នុងសង្គ្រាមស៊ីវិល ជាង២ទសវត្ស៕