ក្រុងប៉េកាំង ៖ ព្យុះទីហ្វុងសារិកា (Sarika) បានបក់បោកមកលើកោះមួយ ដែលជា រមណីយដ្ឋាន នៃខេត្តហៃណាន ភាគខាងត្បូងប្រទេសចិន កាលពីថ្ងៃអង្គារ ទី១៨ តុលា ដោយបង្កឱ្យមានភ្លៀងធ្លាក់ខ្លាំង និងមានកម្លាំងខ្យល់រហូតដល់ ១៦២គីឡូម៉ែត្រក្នុងមួយម៉ោង។ បាតុភូតធម្មជាតិនេះ បានបង្ខំឱ្យអាជ្ញាធរជម្លៀស ពលរដ្ឋស្ទើរតែកន្លះលាននាក់ និងបានប្រកាសឱ្យបញ្ឈប់សេវាដឹកជញ្ជូន ដើម្បីបង្ការគ្រោះថ្នាក់។
សេវាកម្មផ្លូវដែក ត្រូវបានផ្អាកតាំងពីថ្ងៃចន្ទមកម្ល៉េះ ហើយជើងហោះហើរ នៅព្រលានយន្តហោះអន្តរជាតិក្រុងហៃគូ ប្រមាណ ២៥០ ជើង ត្រូវបានលុបចោលវិញ។ នេះបើយោងតាមការផ្សាយរបស់ទីភ្នាក់ងារព័ត៌មានចិន ស៊ីនហួ។
តាមរបាយការណ៍បានឱ្យដឹងថា មនុស្សជិត ៥ សែននាក់ ដែលភាគច្រើនជាប្រជានេសាទ និងជាប្រជាជន រស់នៅតាមតំបន់ទំនាបត្រូវបានជម្លៀសចេញ។ ចំណែក សាលារៀនត្រូវបានបិទក្នុងស្រុកចំនួនប្រាំបី និងតំបន់ទេសចរ ក៏ត្រូវបានបិទជាបណ្តុះអាសន្នផងដែរ៕ ប្រភពពី CNA
