ភ្នំពេញ៖ ក្រសួងធនធានទឹក និងឧតុនិយម បានឱ្យដឹងថា ដោយសារសម្ពាធទាប និងប្រព័ន្ធសម្ពាធទាបនៅបន្តឥទ្ធិពលលើព្រះរាជាណាចក្រកម្ពុជា ជាហេតុធ្វើឱ្យទឹកភ្លៀងនៅតែបន្តធ្លាក់ទៀត។
សេចក្តីជូនដំណឹងរបស់ក្រសួងធនធានទឹក និងឧតុនិយមចុះថ្ងៃទី ១៨ ខែតុលា ឆ្នាំ២០១៦នេះ បានឱ្យដឹងថា ភ្លៀងបន្តធ្លាក់ចាប់ពីថ្ងៃទី ១៨ រហូតទៅដល់ថ្ងៃទី២៣ ខែតុលា ឆ្នាំ២០១៦ ហើយខេត្តដែលទទួលរងសម្ពាធធ្លាក់ភ្លៀងទាំងនោះមានដូចជា៖
1-ខេត្តឧត្តរមានជ័យ បន្ទាយមានជ័យ បាត់ដំបង សៀមរាប ពោធិ៍សាត់ ព្រះវិហារ កំពង់ធំ ស្ទឹងត្រែង ក្រចេះ កំពង់ឆ្នាំង និងខេត្តប៉ៃលិន អាចនឹងមានភ្លៀងធ្លាក់តិច។
2-ខេត្តកំពង់ចាម ត្បូងឃ្មុំ ស្វាយរៀង ព្រៃវែង កណ្តាល ភ្នំពេញ និងខេត្តកំពង់ស្ពឺ អាចនឹងមានភ្លៀងធ្លាក់ពីតិចទៅ បង្គួរ។
3-ខេត្តកោះកុង ព្រះសីហនុ កំពត កែប និងខេត្តតាកែវ អាចនឹងមានភ្លៀងធ្លាក់ពីបង្គួរទៅច្រើន។
រយៈពេលប៉ុន្មានថ្ងៃចុងក្រោយនេះ ទឹកភ្លៀវបាន ធ្លាក់យ៉ាងនៅទូទាំងប្រទេស។ តាមប្រភពព័ត៌មានមួយ ដែលស្រង់សម្ដី មន្ត្រីជាន់ខ្ពស់ ខេត្តកំពង់ស្ពឺ យ៉ាងហោចណាស់ ស្រូវ៤,៧៧៦ហិកតានៅ ស្រុកគងពិសី សំរោងទង និងភ្នំស្រួច ត្រូវជនលិច ដោយសារទឹកធ្លាក់ពីស្ទឹងព្រែកត្នោត និងភ្នំឱរ៉ាល់។
នៅថ្ងៃអង្គារទី ១៨តុលានេះ បណ្ដាញសង្គមជាច្រើន បានបង្ហោះ រូបភាព នៃការជនលិចកំណាត់ ផ្លូវជាតិ លេខ៣ នៅតំបន់មួយចំនួន ដោយបណ្ដាលស្ថានីយចាក់សាំងបានបិទ។ ដោយសារស្ថានភាពនេះ ក្រសួងធនធានទឹក និងសាលារាជធានីភ្នំពេញ កំពុងចាត់វិធានការទប់ទឹកហូរកាត់ទំនប់ស្ទឹងព្រែកត្នោត មិនឱ្យលិចតំបន់ខ្លះនៅរាជធានីភ្នំពេញ៕
