ភ្នំពេញ៖ មន្ត្រីសង្គមស៊ីវិលដែលធ្វើការពាក់ព័ន្ធ នឹងវិស័យអប់រំនៅកម្ពុជា បានលើកទ្បើងថា វិស័យអប់រំកំរិតមធ្យមសិក្សាទុតិយភូមិ នឹងកាន់តែមានភាពល្អប្រសើរបន្ថែមទៀត ប្រសិនបើក្រសួងអប់រំប្រើប្រាស់កម្ចី ADB ឱ្យចំគោលដៅនោះ។ ការលើកទ្បើងនេះបន្ទាប់ពីធនាគារ ADB អនុម័តផ្តល់ប្រាក់កម្ចី ៤៥ លានដុល្លារដើម្បីលើកកម្ពស់វិស័យអប់រំនៅកម្ពុជា។ លោក ជួន សារ៉េត រាយការណ៍៖
ធនាគារអភិវឌ្ឍន៍អាស៊ី (ADB) បានអនុម័តផ្តល់កម្ចីទឹកប្រាក់ចំនួន ៤៥ លានដុល្លារ ដើម្បីលើកកម្ពស់ការទទួលបានការអប់រំ ប្រកបដោយគុណភាព នៅកម្រិតមធ្យមសិក្សាទុតិយភូមិក្នុងប្រទេសកម្ពុជា។
យោងតាមសេចក្តីប្រកាសព័ត៌មានរបស់ធនាគារ ADB ចុះថ្ងៃទី ១៧ ខែតុលា ឆ្នាំ២១០៦ កម្មវិធីអភិវឌ្ឍន៍វិស័យអប់រំ កម្រិតមធ្យមសិក្សាទុតិយភូមិ ហៅកាត់ថា (USESDP) នឹងផ្តល់ការគាំទ្រដល់កិច្ចខិតខំប្រឹងប្រែង របស់រដ្ឋាភិបាល ក្នុងការបង្កើនគុណភាពនៃធនធានមនុស្ស ដើម្បីធានានិរន្តរភាពនៃការអភិវឌ្ឍសេដ្ឋកិច្ចនៅកម្ពុជា និងបង្កើនភាពប្រកួតប្រជែងរបស់ប្រទេស។
ប្រភពដដែលបានឱ្យដឹងទៀតថា នាយកធនាគារ អភិវឌ្ឍន៍អាស៊ី លោក Samiuela Tukuafu មានប្រសាសន៍ថា កម្មវិធីអភិវឌ្ឍន៍វិស័យអប់រំកម្រិតមធ្យមសិក្សាទុតិយភូមិ នឹងគាំទ្រដល់ការធ្វើកំណែទម្រង់ សំដៅបង្កើនប្រសិទ្ធភាពនៃការអប់រំកម្រិតមធ្យមសិក្សាទុតិយភូមិ ដើម្បីឆ្លើយតបចំពោះតម្រូវការពលករ ជំនាញដែលកំពុងតែកើនទ្បើង ក្នុងទីផ្សារការងារ។ បន្ថែមពីនេះទៀតនោះ សិស្សមកពីតាមបណ្តាខេត្តជួបការលំបាក ជាពិសេសសិស្សស្រី នឹងទទួលបានឱកាសបន្ថែមទៀត ដើម្បីទទួលបានការអប់រំកម្រិតមធ្យមសិក្សាទុតិយភូមិប្រកបដោយគុណភាព។ វិធានការជាក់លាក់ក្នុងកម្មវិធីនេះរួមមាន ការពង្រីកសម្ភាររូបវ័ន្តសម្រាប់ការអប់រំកម្រិត មធ្យមសិក្សាទុតិយភូមិ ដូចជាមន្ទីរពិសោធន៍វិទ្យាសាស្ត្រ និងការបំពាក់សម្ភាររូបវ័ន្តសម្រាប់សិក្សាបច្ចេកវិទ្យាព័ត៌មាន និងសារគមនាគមន៍ (ICT)ជាដើម។
ឆ្លើយតបនឹងការផ្តល់ប្រាក់កម្ចីរបស់ធនាគារ ADB នាយកប្រតិបត្តិសម្ព័ន្ធគណនេយ្យភាពសង្គមកម្ពុជា លោក សន ជ័យ បានផ្តល់បទសម្ភាសន៍ឱ្យវិទ្យុស្ត្រីនៅថ្ងៃនេះថា ប្រាក់កម្ចីនេះនឹងមានទិសដៅផ្តល់លទ្ធភាពឱ្យការសិក្សា របស់សិស្សមានភាពល្អប្រសើទ្បើងជាពិសេសសិស្សដែលរស់នៅតាមទីតំបន់ជនបទ។
លោក សន ជ័យ បន្តថាការផ្តល់ប្រាក់កម្ចីនេះនឹងមានប្រយោជន៍ទៅដល់វិស័យអប់រំ តាម រយៈការផ្តល់សេវាសាធារណៈ ជូនប្រជាពលរដ្ឋប្រសិនបើក្រសួង សាម៉ីយកថវិការនោះទៅប្រើប្រាស់ឱ្យចំគោលដៅ។
លោក សន ជ័យ បន្តថាដើម្បីឱ្យវិស័យអប់រំ មានភាពល្អប្រសើរ នោះក្រសួងត្រូវតែយកចិត្តទុកដាក់សាលាដែលនៅតាមទីដាច់ស្រយាល និងត្រូវធ្វើកំណែទម្រង់តាំងពីថ្នាក់ក្រោមរហូតដល់ថ្នាក់លើ។ «យើងស្នើឱ្យក្រសួងអប់រំហ្នឹង ពិចារណាទៅលើសាលានៅទីជនបទដាច់ស្រយាលហ្នឹងឱ្យបានច្រើនព្រោះអីឆ្នាំកន្លងមក នឹងបច្ចុប្បន្ននេះ ក្រសួងនៅប្រើប្រាស់រូបមន្តមួយដដែលគឺការបែងចែកថវិកាទៅតាមសាលាហ្នឹង គឺស្មើនឹង២០ភាគរយ នៃថវិកាសរុបរបស់ក្រសួងអញ្ចឹងថវិកា អភិវឌ្ឍន៍សាលារៀននេះគួតែកើនពី២០ ដល់ ២៥ភាគរយនៃថវិកាសរុបរបស់ក្រសួងទើបល្អប្រសើ។ ការធ្វើកំណែទម្រង់វិស័យអប់រំ នេះវាទាល់តែជារឿងមួយចាប់ ផ្តើមពីមូលដ្ឋានគ្រឹះនៃការអប់រំដែរ គឺថ្នាក់បឋមហើយទ្បើងមកដល់បឋមភូមិ ហើយហ្នឹងដល់ទុតិយភូមិ»។
ជុំវិញនឹងការលើកទ្បើងនេះដែរ វិទ្យុស្ត្រីមិនទាន់អាចសុំការឆ្លើយតប ពីអ្នកនាំពាក្យក្រសួងអប់រំយុវជន និងកីទ្បា លោក រស់ សាលីន បាននៅទ្បើយនោះទេនៅថ្ងៃនេះ ដោយទូរស័ព្ទចូលប៉ុន្តែពុំមានអ្នកទទួល។
សូមជំរាបថា ធនាគារ ADB បានចូលរួមចំណែកក្នុងវិស័យអប់រំ និងអប់រំបណ្តុះបណ្តាលបច្ចេកទេសវិជ្ជាជីវៈនៅកម្ពុជាក្នុងរយៈពេល១៥ឆ្នាំចុងក្រោយនេះ ហើយ ADB បានផ្តល់ការគាំទ្រសំខាន់ៗក្នុងការវិភាគតាមវិស័យ និងក្នុងការអនុវត្តកំណែទម្រង់អប់រំតាមរយៈការវិនិយោគ និងការផ្តល់ជំនួយបច្ចេកទេស៕