ភ្នំពេញ៖ ប្រធានគណបក្សសង្គ្រោះជាតិលោក សម រង្ស៊ី ដែលកំពុងនិរទេសខ្លួនឯងទៅរស់នៅក្រៅប្រទេសបានអះអាងជាថ្មីទៀតថាលោកនឹង ត្រលប់មកកាន់ប្រទេសកម្ពុជាវិញក្នុងថ្ងៃណាមួយ ។
ការអះអាងរបស់លោក សម រង្ស៊ី ជាថ្មីទៀតនេះ គឺធ្វើឡើងភ្លាមៗ បន្ទាប់ពីប្រមុខរដ្ឋាភិបាល សម្ដេច ហ៊ុន សែន បានថ្វាយលិខិតពន្យល់ព្រះមហាក្សត្រថា ទាំងលោក សម រង្ស៊ី និង លោក កឹម សុខា សុទ្ធតែបានប្រព្រឹត្តកំហុស ផ្លូវច្បាប់។
ការពន្យល់របស់សម្ដេច ហ៊ុន សែន ធ្វើឡើងជាការទូលថ្វាយតាមលិខិត របស់ព្រះមហាក្សត្រ ដែលស្នើឱ្យប្រមុខរដ្ឋាភិបាល ពិនិត្យតាមសំណើរបស់ លោក សម រង្ស៊ី ស្នើសុំការប្រទានការលើកលែងទោស ដល់មេបក្សប្រឆាំងរូបនេះ បានត្រឡប់មកប្រទេសវិញ។
លោក សម រង្ស៊ី កាលពីថ្ងៃទី១៣តុលា បានសរសេរលើ ហ្វេសប៊ុក របស់លោកថា«ខ្ញុំនឹងវិលត្រឡប់មកប្រទេសកម្ពុជាវិញ ក្នុងពេលណាមួយសមស្រប ដូចកាលពី ៣ ដងមុន ក្រោយពីការនិរទេសរបស់ខ្ញុំ ៣ ដងមុន ក្នុងកាលៈទេសៈដូចគ្នាអញ្ចឹងដែរ ដែលតម្រូវឲ្យមានដំណោះស្រាយនយោបាយមួយ ដោយជៀសមិនផុត»។
កាលពីម្សិលមិញនេះលោក សម រង្ស៊ី និងលោក កឹម សុខា ក៏បានថ្វាយលិខិត សុំការព្រះរាជទានទោសពីព្រះករុណា ជីវិតតម្កល់លើត្បូង ព្រះបាទនរោតម្តសីហមុនី ព្រះមហាក្សត្រ នៃព្រះរាជាណាចក្រកម្ពុជាផងដែរ ហើយព្រះករុណាប្រគល់ការងារ នេះទៅសម្តេច ហ៊ុន សែន ។
លោកសមរង្ស៊ីបានសរសេរបន្ថែមដោយលើកឡើងពី រឿងរ៉ាវអតីតកាលមួយ ដែលលោកថា៖"សម្រាប់ប្រធានចលនាតស៊ូរំដោះប្រទេសជាតិ ការតស៊ូពីក្រៅប្រទេស ក្នុងរយៈពេលមួយបណ្តោះអាសន្ន អាចជាជម្រើសតែមួយគត់ ដើម្បីធានាជោគជ័យ នៅទីបញ្ចប់"។
លោកសមរង្ស៊ី ធ្លាប់បានព្រះមហាក្សត្រលើកលែងទោស ចំនួន៣លើកមកហើយ ទោះជា លោកត្រូវបានកាត់ទោស ជាច្រើនឆ្នាំក័ដោយ ៕