ភ្នំពេញ៖ សាលារាជធានីភ្នំពេញបានចេញលិខិតនៅថ្ងៃទី ០៧ ខែ តុលានេះ ដោយបដិសេធ ការស្នើសុំ របស់គណៈកម្មការរៀបចំបុណ្យខួបគំរប់ ១០០ ថ្ងៃ លោក កែម ឡី នៅវត្ត «ពោធិយារាម» ហៅវត្តចាស់ ក្នុងរាជធានីភ្នំពេញ។
លិខិតរបស់សាលាក្រុង បានបញ្ជាក់ថា គណៈកម្មការរៀបចំបុណ្យ គួរធ្វើបុណ្យខួបគំរប់ ១០០ ថ្ងៃ ជូនលោក បណ្ឌិត កែម ឡី នៅឯស្រុកកំណើតរបស់លោក កែម ឡី។
លោកបណ្ឌិត កែម ឡី អ្នកវិភាគអំពីសង្គមត្រូវបានខ្មាន់កាំភ្លើងបាញ់សម្លាប់ចំនួនពីរគ្រាប់ កាលពីថ្ងៃទី១០ ខែកក្កដា ឆ្នាំ ២០១៦។រហូតមកពេលនេះ អាជ្ញាធរ បានឃុំខ្លួនជនសង្ស័យម្នាក់ ដែលបានអះអាងថា ឈ្មោះ ជួប សម្លាប់ ជាឃាតករ នៅក្នុងពន្ធធាគារព្រៃស។
ទោះយ៉ាងណាក៏ដោយ ព្រះអង្គ ប៊ុត ប៊ុនតិញ ដែលជាគណៈកម្មការរៀបចំបុណ្យសព លោកបណ្ឌិត កែម ឡី បានប្រកាសជំហរថា ព្រះអង្គនឹងប្រារព្ធពិធីបុណ្យ ១០០ ថ្ងៃ លោកបណ្ឌិត កែម ឡី ពីថ្ងៃទី ១៤ ដល់ ទី១៦ តុលា នៅវត្តចាស់ ដែលមានទីតាំងនៅក្នុងសង្កាត់ជ្រោយចង្វា ខណ្ឌជ្រោយចង្វា រាជធានីភ្នំពេញ ទោះជាមានការរារាំង ពីអាជ្ញាធរក៏ដោយ៕
