ភ្នំពេញ៖ ឯកអគ្គរដ្ឋទូតសហភាពអឺរ៉ុប ប្រចាំនៅប្រទេសកម្ពុជា លោក ច្សច អេដហ្គា (George Edgar) បានទៅសួរសុខទុក្ខ ប្រធានស្តីទីគណបក្សសង្គ្រោះ លោក កឹម សុខា នៅទីស្នាក់ការកណ្តាលបក្ស នៅរសៀសថ្ងៃទី ០៦ ខែ តុលា ឆ្នាំ ២០១៦នេះ។
តាមហ្វេសប៊ុករបស់លោក កឹម សុខា ដែលបាន បង្ហោះជាសាធារណៈ គឺលោក ច្សច អេដហ្គា បានចាប់ដៃរលាក់ជាមួយលោក កឹម សុខា ដោយមានកូនស្រីរបស់លោក កឹម សុខា អ្នកជួយបកប្រែភាសា។
ក្នុងជំនួបនេះ ឥស្សរជនទាំង២បានពិភាក្សាគ្នាអំពី៖ «ដំណើរការចុះឈ្មោះបោះឆ្នោត ជាពិសេសភាពមិនប្រក្រតីដែលនៅកើតមាន និងការវិវត្ដន៍ នយោបាយចុងក្រោយបង្អស់នេះ»។
តែអ្វីជាការកត់សម្គាល់ លោក ឯកអគ្គរដ្ឋទូតសហភាពអឺរ៉ុបប្រចាំនៅប្រទេសកម្ពុជា ច្សច អេដហ្គា ជួបលោក កឹម សុខា នៅថ្ងៃនេះ គឺមុនមួយថ្ងៃ ដែលលោក កឹម សុខា សម្រេចថានឹងទៅចូលរួមប្រជុំសភា ពេញអង្គនៅថ្ងៃសុក្រ ស្អែកនេះ ។
លោក យែម បុញ្ញាឬទិ្ធ អ្នកនាំពាក្យគណបក្សសង្គ្រោះជាតិ និយាយថាលោក កឹម សុខា អតីតអនុប្រធានទី១ នៃរដ្ឋសភានិងជាប្រធានស្ដីទីគណបក្សសង្គ្រោះជាតិ នឹងទៅប្រជុំ សភាវិញនៅថ្ងៃសុក្រ ទី៧ តុលា ឆ្នាំ២០១៦ស្អែកនេះ បើសិនជាស្ថានភាពនយោបាយកាន់តែល្អ។ លោកសង្ឃឹមថាការដែលលោកកឹម សុខា ទៅប្រជុំសភា អាចនឹងមានជំនួបជាមួយបក្សកាន់អំណាច។
លោក យែម បុញ្ញាឬទិ្ធ បញ្ជាក់ដូចនេះ ថា ៖«ថ្ងៃស្អែកនេះ ក្រុមសមាជិកសភា មកពីគណបក្សសង្គ្រោះជាតិហ្នឹង លោកនឹងអាចចូលប្រជុំ ក៏ប៉ុន្ដែករណី ឯកឧត្ដម កឹម សុខា យើងមិនទាន់ប្រាកដដែរ។ក៏ប៉ុន្ដែក្ដីសង្ឃឹមមួយអ្វី ដែលប្រមុខរាជរដ្ឋាភិបាល លោកបានលើកឡើងថានឹងអាចមានការជួបជជែកគ្នា នៅរដ្ឋសភា ដូច្នេះការនោះ មានកិច្ចការចឹងមែន គាត់នឹងអាចអញ្ជើញទៅដែរ »។
ថ្ងៃទី៧ ខែតុលា ឆ្នាំ២០១៦ស្អែកនេះ ជាថ្ងៃដែលសភាបើកកិច្ចប្រជុំពេញអង្គ និងជាការបើក បវេសនកាលថ្មីមួយទៀតរបស់រដ្ឋសភា នីតិកាលទី៥។
លោក កឹម សុខា បានទៅជ្រកកោន នៅស្នាក់ការបក្សសង្គ្រោះជាតិ ជាង៤ខែមកហើយ។ ក្នុងពេល លោកនៅទីនោះ មានមន្ត្រីការទូតជាច្រើន បាន ជួបលោក កឹម សុខា ក្នុងនោះមាន ទូតអាមេរិក បារាំង អាល្លឺ ម៉ង កាណាដា ស៊ុយ អ៊ែតជាដើម៕
