ភ្នំពេញ៖ រដ្ឋមន្ត្រីក្រសួងបរិស្ថានថា ឈ្មួញឈើធំៗមួយចំនួននៅកម្ពុជាបានដូរមុខ របរ ហើយ ខណៈមេឈ្មួញមួយចំនួនទៀតកំពុងប្រឈមមុខនឹងការប្ដឹងទៅតុលាការ។
លោក សាយ សំអាល់ រដ្ឋមន្ត្រីក្រសួងបរិស្ថាន បានឆ្លើយតបទៅនឹងសំនួរអ្នកសារព័ត៌មានថា ឈ្មួញឈើល្បីល្បាញនៅកម្ពុជា បានផ្លាស់ប្តូរមុខរបរហើយ។
លោកថា ឈ្មួញឈើផ្សេងទៀតក៏កំពុងប្រឈមមុខការប្ដឹងទៅតុលាការដែរ ព្រោះលោកបានដាក់ពាក្យប្តឹងទៅតុលាការហើយ ប៉ុន្តែលោកមិនបានបញ្ជាក់អត្តសញ្ញាណពួកគេនោះឡើយ។
លោក សាយ សំអាល់៖«យើងនិយាយអំពីឧកញ៉ា ខ្នា ទ្រី ភាព ថៃ អុល។ ពួកគាត់និយាយថា បានប្តូរមុខរបរហើយ»។
លោករដ្ឋមន្ត្រី មានប្រសាសន៍ដូចនេះនៅក្នុងវេទិកានិពន្ធនាយកស្ដីពី«ការចូលរួមចំណែករបស់ វិស័យសារព័ត៌មាន ដើម្បីលើកកម្ពស់ ការការពារបរិស្ថាននៅកម្ពុជា និង តំបន់ទន្លេមេគង្គ» នៅព្រឹកថ្ងៃទី ០៦ ខែ តុលា ឆ្នាំ ២០១៦។
លោក ឧកញ៉ា ទ្រី ភាព ត្រូវបានគេដឹងថា គឺជាឈ្មួញឈើដ៏ល្បីល្បាញ ហើយបច្ចុប្បន្ននេះ លោក ឧកញ៉ាកំពុងអភិវឌ្ឍន៍ លើវិស័យឧស្សាហកម្មដំណាំម្រិច និងកៅស៊ូ លើផ្ទៃដីរាប់ម៉ឺនហិចតា ក្នុងខេត្តមួយចំនួន៕