ភ្នំពេញ៖ នៅទីបំផុត លោក កឹម សុខា ប្រធានស្ដីទីគណបក្សសង្គ្រោះជាតិ បានចាកចេញពីស្នាក់ការគណបក្ស នៅសង្កាត់ចាក់អង្រែ ដើ់ម្បីទៅចុះឈ្មោះបោះឆ្នោត នៅព្រឹកថ្ងៃពុធទី៥តុលាដែលជាលើកដំបូង បន្ទាប់ពីលោក សម្ងំរស់នៅក្នុងស្នាក់ការនេះ ជាង៤ខែដោយសារមានរឿងក្ដីនៅតុលាការ ។
ការចាកចេញពីស្នាក់ការគណបក្សនៅថ្ងៃនេះ ដើម្បីចុះឈ្មោះបោះឆ្នោត នៅសង្កាត់ចាក់អង្រែលើ ខណ្ឌមានជ័យ រាជធានីភ្នំពេញ គឺលោក កឹម សុខា បាន ជ្រើសរើស ទីតាំងមួយ ដែលទីនោះ ស្នាក់ការសង្កាត់ ត្រូវទឹកជន់លិច ហើយ លោក កឹម សុខា បាន ដើរលើក្ដាតូចមួយ ឆ្លងទឹក ចូលទៅកាន់ កន្លែងចុះឈ្មោះ ដោយ ហៀបនឹងលិចទឹកដែរនោះ។
លោក កឹម សុខា ដែលមានទឹកមុខ ញញឹមតិចៗ លោកក៏បានអំពាវនាវឱ្យពលរដ្ឋ ទៅចុះបោះឆ្នោត ឱ្យបានគ្រប់ៗគ្នា។
ប្រធានស្ដីទីគណបក្សប្រឆាំងរូបនេះ ត្រូវបានតុលាការរាជធានីភ្នំពេញ ផ្ដន្ទាទោស លោក ឱ្យមានទោស ៥ខែ ករណីលោក មិនចូលខ្លួន មកកាន់តុលាការតាមដីកាកោះ ក្នុងសំណុំរឿង សញ្ចារកម្ម នៃទំនាក់ទំនងជាមួយ ស្នេហាជាមួយនាង ខុម ចាន់តារ៉ា ហៅស្រីមុំ។
យ៉ាងណាក៏ដោយ ករណីរបស់លោក កឹម សុខា ត្រូវបាន សហគមន៍អន្តរជាតិ និងអ្នកសង្កេតការណ៍ ចាត់ទុកជារឿងនយោបាយ៕
