បុណ្យភ្ជុំបិណ្ឌគឺជាបុណ្យដ៏ធំមួយប្រចាំឆ្នាំដែលប្រជាជនម្នាក់ៗរមែងធ្វើដំណើរទៅស្រុកកំណើតដើម្បីជួបជុំគ្រួសារ និងប្រគេនចង្ហាន់ព្រះសង្ឃតាមប្រពៃណីជាតិរៀងមក។ ប៉ុន្ដែនេះក៏ជាកំឡុងពេលដែលមានគ្រោះថ្នាក់ចរាចរណ៍កើនឡើងគួរអោយកត់សម្គាល់ផងដែរ។ ដូច្នោះហើយ ដោយមានការគាំទ្ររបស់អង្គការស័ម្ពន្ធអន្តរជាតិទប់ស្កាត់ផលប៉ះពាល់នៃគ្រឿងស្រវឹងIARD កាកបាទក្រហមកម្ពុជា និងដៃគូពាក់ព័ន្ធទាំងអស់បានរួមគ្នារៀបចំយុទ្ធនាការអប់រំផ្សព្វផ្សាយជូនដល់ប្រជាពលរដ្ឋអ្នកធ្វើដំណើរឲ្យបានយល់ដឹងនិងត្រៀមបញ្ចៀសខ្លួនពីគ្រោះថ្នាក់ចរាចណ៍នេះ។
តាមរបាយការណ៍ប្រព័ន្ធព៌តមានជនរង និងគ្រោះថ្នាក់ចរាចរណ៍បានបង្ហាញថាក្នុងរយៈពេល មួយសប្ដាហ៍ចន្លោះពេលបុណ្យភ្ជុំបិណ្ឌក្នុងឆ្នាំ២០១៥ (មុនថ្ងៃភ្ជុំបីថ្ងៃ និងក្រោយថ្ងៃភ្ជុំបីថ្ងៃ មានគ្រោះថ្នាក់ចរាចរណ៍ផ្លូវគោកកើតឡើង បណ្ដាលឲ្យមានមនុស្សស្លាប់ចំនួន ៥៦នាក់ ដោយកើនឡើង៦នាក់បើធៀបទៅនឹងឆ្នាំ២០១៤។
មិនទាន់អាចដឹងបានថាតើក្នុងពេលបុណ្យភ្ជុំបិណ្ឌឆ្នាំនេះដែលនឹងមកដល់ក្នុងពេលប៉ុន្មានថ្ងៃខាងមុខនេះ នឹងមានជនរងគ្រោះដល់ជិវិត អ្នករងរបួសប៉ុន្មាននាក់ និងការខាតបង់ផ្សេងទៀតប៉ុន្មានឡើយ?
អាស្រ័យដូចនេះ ដើម្បីរួមចំណែកកាត់បន្ថយគ្រោះថ្នាក់ចរាចរណ៍នាក្នុងឧិកាសនេះ ក្រោមជំនួយបច្ចេកទេសនិងហិរញ្ញវត្ថុពីអង្គការ IARD កាកបាទក្រហមកម្ពុជា បានសហការជាមួយអង្គការក្រៅរដ្ឋាភិបាលនិងក្រុមហ៊ុនឯកជននានា រៀបចំធ្វើយុទ្ធនាការអប់រំប្រជាពលរដ្ឋនៅតាមខេត្ត រាជធានី ដើម្បីឲ្យប្រជាពលរដ្ឋបានដឹង ប្រយ័ត្នប្រយែង និងចូលរួមគោរពច្បាប់ចរាចរណ៍ទាំងអស់គ្នា ដើម្បីចញ្ចៀស គ្រោះថ្នាក់ដែលអាចកើតឡើងដោយយថាហេតុនេះ។ យុទ្ធនាការអប់រំផ្សព្វផ្សាយនេះចាប់ផ្ដើមពីថ្ងៃទី២០ខែកញ្ញា រហូតដល់ ថ្ងៃទី៣ ខែតុលា ។
ដោយឡែកនៅរាជធានីភ្នំពេញ កាលពីវេលាម៉ោង៧ព្រឹក ថ្ងៃទី២៥ កញ្ញា ឆ្នាំ២០១៦នេះ ក្រុមយុវជន និងអ្នកស្ម័គ្រចិត្តកាកបាទក្រហមកម្ពុជា បុគ្គលិកអង្គការស្ថាបនាជីវិត សិល្បករ សិល្បការីនីនៃសមាគមសិល្បករជួយដល់ការសង្គម សិស្ស និស្សិត សាស្ត្រាចារ្យ មន្ត្រីរាជការជឹត២០០នាក់បានមកជួបជុំនៅទីស្នាក់ការកាកបាទក្រហមកម្ពុជា ។ ការប្រមូលផ្ដុំនេះ គឺដើម្បីបើកយុទ្ធនាការផ្សព្វផ្សាយទៅក្នុងរាជធានីភ្នំពេញ។
មានវត្តមាននៅក្នុងពិធីជួបជុំគ្នាព្រឹកនោះ គេឃើញមានវត្តមានរបស់លោកជំទាវ ម៉ែន នារីសោភ័គ អគ្គលេខាធិការរងទីមួយ កាកបាទក្រហមកម្ពុជា ឯកឧត្តម ប៉ែន បូរាណ អនុរដ្ឋលេខាក្រសួងសាធារណការនិងដឹកជញ្ជូន និងជាអគ្គលេខាធិការរងនៃគណកម្មាធិការជាតិសុវត្ថិភាពចរាចរណ៍ផ្លូវគោក ឯកឧត្តមឧត្តមសេនីយឯក រុន រ័ត្នវាសនា ប្រធាននាយកដ្ឋាននគរបាលចរាចរណ៍ និងសណ្ដាប់ធ្នាប់សាធារណៈ នៃអគ្គស្នងការនគរបាលជាតិ ក្រសួងមហាផ្ទៃ លោក ប្រ៊ែត ប៊ីវែន្ស អគ្គនាយករងជាន់ខ្ពស់អង្គការសម្ព័ន្ធអន្តរជាតិទប់ស្កាត់ផលប៉ះពាល់នៃគ្រឿងស្រវឹង ព្រមដោយមន្ត្រីកាកបាទក្រហម និងតំណាងក្រសួងដទៃទៀតជាច្រើនកុះករ។
មានប្រសាសន៍នៅក្នុងឧិកាសនោះ លោកជំទាវអគ្គលេខាធិការរងទីមួយ កាកបាទក្រហមកម្ពុជា បានថ្លែងសង្កត់ធ្ងន់ថា គ្រោះថ្នាក់ចរាចរណ៍គឺជាមហន្តរាយបណ្ដាលមកពីមនុស្ស ហើយមហន្ដរាយនេះត្រូវបានចាត់ទុកថាជាអាទិភាពស្នូលទីមួយនៃកាកបាទក្រហមកម្ពុជា។ ហេតុនេះ មិនមែនជាលើកទីមួយទេដែលកាកបាទក្រហមកម្ពុជាបានរៀបចំសហការជាមួយដៃគូនានាធ្វើយុទ្ធនាការមុនពេលបុណ្យភ្ជុំបិណ្ឌ ។
ការរៀបចំយុទ្ធនាការពេលនេះ ក្រៅពីចង់ផ្សព្វផ្សាយដល់ប្រជាពលរដ្ឋអ្នកធ្វើដំណើរឲ្យយល់ដឹងនិងចៀសផុតពីគ្រោះថ្នាក់ ក៏ជាការចង់ឲ្យយុវជនមានការទទួលខុសត្រូវខ្ពស់ និងធ្វើជាគម្រូក្នុងការលើកកម្ពស់សុវត្ថិភាពចរាចរណ៍ផងដែរ។ ឆ្នាំនេះ កាកបាទក្រហមកម្ពុជាបានរៀបចំយុទ្ធនាកាផ្សព្វផ្សាយនៅក្នុងខេត្តចំនួនប្រាំបីដោយអប់រំនៅតាមសហគមន៍ និងអ្នកធ្វើដំណើរ ឲ្យគោរពច្បាប់ចរាចរណ៍ផ្លូវគោក ចេះមានអធ្យាស្រ័យនៅលើដងផ្លូវ ជាពិសេសមិនត្រូវបើកបរក្រោយពេលទួលទានគ្រឿងស្រវឹង។
ក្រុមយុវជនកាកបាទក្រហមកម្ពុជា ស្ម័គ្រចិត្ត មន្ត្រីអង្គការស្ថាបនាជីវិត (SCO) និងក្រុមសិល្បករជួយដល់សង្គមដែលមានវត្តមានអ្នកនាងចន ច័ន្ទលក្ខិណា និងសហការី បានចាប់ផ្ដើមធ្វើយុទ្ធនាការផ្សព្វផ្សាយនៅតាមជុំវិញផ្សារធំថ្មី និងផ្សារអូឡាំពិកដោយ បានប្រើប្រាសឧបករណ៍បំពងសម្លេង រួមដោយការចែកប័ណ្ណផ្នត់ស្ទីកគ័រ ដែលប្រកបដោយខ្លឹមសារអប់រំ និងកូនសៀវភៅច្បាប់ចរាចរណ៍ ព្រមទាំងផ្តល់សារខ្លីៗផ្ទាល់មាត់លើកទឹកចិត្តឲ្យមានការចូលរួមពីអ្នកធ្វើដំណើរទាំងអស់ ដើម្បីបង្ការខ្លួនពីគ្រោះថ្នាក់នាឱកាសកាន់បិណ្ឌ និពេលបុណ្យភ្ជុំបិណ្ឌខាងមុខនេះ។
គួររំលឹកថា ការធ្វើយុទ្ធនាការអប់រំផ្សព្វផ្សាយតាមទីសាធារណៈនាពេលនេះគឺស្របពេលដែលមានការរឹតបន្ដឹងច្បាប់ចរាចរណ៍ផ្លូវគោកដោយភ្នាក់ងារនគរបាលចរាចរណ៍ផងដែរ។ ជាក់ស្ដែង នារាត្រីថ្ងៃទី២៥ ខែកញ្ញានេះ នៅរាជធានីភ្នំពេញ មានការដាក់ចំណុចត្រួតពិនិត្យគ្រប់ខ័ណ្ឌទូទាំងរាជធានី ជាពិសេសនាពេលយប់ដើម្បីត្រួតពិនិត្យលើបទល្មើសបើកបរក្រោមឥទ្ធិពលនៃគ្រឿងស្រវឹងដែលតែងតែបង្កសកនាដកម្មសឹងគ្មានលស់មួយរាត្រីណាឡើយ។ ការធ្វើបែបនេះនឹងជួយបណ្ដុះនូវវប្បធ៌មបើកបរដោយទទួលខុសត្រូវ។
កាកបាទក្រហមកម្ពុជា និងដៃគូដែលបានចូលរួមរំពឹងថាកិច្ចខិតខំប្រឹងប្រែងនាពេលនេះនឹងអាចជួយឲ្យប្រជាពលរដ្ឋយល់ដឹងនិងយកទៅអនុវត្តដើម្បីសុវត្ថិភាពចរាចរណ៍ទាំងអស់គ្នា ហើយរំពឹងថាផលដែលទទួលបានគឺចំនួនអ្នកបាត់បង់ជីវិតនាក្នុងឧិកាសបុណ្យភ្ជុំបិណ្ឌឆ្នាំនេះមានការថយចុះ ហើយក៏សូមបួងសួងសូមឲ្យទេវតា និងវត្ថុស័ក្តសិទ្ធទាំងឡាយជួយអោយពលរដ្ឋដែលធ្វើដំណើរទៅកាន់ទីជិត រឺទីឆ្ងាយជួបប្រទះតែសេចក្តីសុខសប្បាយគ្រប់ៗគ្នា៕