ពួកមន្ដ្រីអាមេរិកនិយាយថា រដ្ឋាភិបាលប្រធានាធិបតីអូបាម៉ា បានសម្រេចផ្ដល់ជំនួយមនុស្សធម៌ នូវទឹកប្រាក់៣៦៤លានដុល្លារ ដល់ជនភៀសខ្លួននៃប្រទេសស៊ីរី។
តាមបណ្ដាញផ្សាយព័ត៌មានBBC ជំនួយនេះ និងផ្ដល់តាមរយៈ អង្គការសហប្រជាជាតិ និងទីភ្នាក់ងារ ស្បៀងអន្ដរជាតិមួយចំនួនទៀត ដែលកំពុងធ្វើសកម្មភាព ការងារ របស់ពួកគេ នៅតំបន់ មួយចំនួននៃជនភៀសសឹកនៃប្រទេសស៊ីរី។
តាមប្រភពដដែលនេះ អង្គការសុខភាពពិភពលោក ក៏បានអំពាវនាវ ឱ្យជួយសង្គ្រោះបន្ទាន់ ចំពោះជនភៀសសឹក ដែលពួកគេបានជួបគ្រោះថ្នាក់ ដោយសារជំងឺ ដោយការវាយប្រហារ។ ជាមួយគ្នានេះ អង្គការសុខភាពមួយនេះក៏បានបញ្ជូនគ្រូពេទ្យរបស់ខ្លួនចំនួន៣៥នាក់ទៅទីនោះផងដែរ។
ចាប់តាំងពីប្រទេសស៊ីរី ធ្លាក់ចូលក្នុងភ្លើងសង្គ្រាមនៅឆ្នាំ២០១១ ប្រជាជនប្រទេសនេះបានរត់ភៀសខ្លួន ទៅនៅជំរុំ និងទៅប្រទេសជិតខាង ជាច្រើនរាប់លាននាក់ ខណៈដែលអ្នកស្លាប់ដោយសារសង្គ្រាមកើនឡើងជាង ៣០ម៉ឺននាក់៕ ប្រភពៈ BBC
