ភ្នំពេញ៖ ឯកអគ្គរាជទូត ជប៉ុន ប្រចាំព្រះរាជាណាចក្រកម្ពុជា នឹងចុះហត្ថលេខា លើលិខិតប្តូរ សារ និងកំណត់ហេតុ នៃការពិភាក្សាស្តីពីការផ្តល់ហិរញ្ញប្បទាន ឥតសំណងនូវទឹកប្រាក់ ៣២០៦លានយ៉េន ស្មើនឹង ៣១.៩៣ លានដុល្លារសហរដ្ឋអាមេរិក។ នេះបើយោងតាមសេចក្តីជូនព័ត៌មានរបស់ក្រសួងការបរទេស ចុះផ្សាយកាលពីម្សិលមិញ។
ការផ្តល់ហិរញ្ញប្បទានឥតសំណងជាង ៣០លានដុល្លារនេះ ទៅលើគម្រោងចំនួន ២ គឺ សមាហរណកម្មបោសសម្អាតគ្រាប់មីន និងសង្គ្រោះជនពិការ ដោយសារគ្រាប់មីនដំណាក់ទី៣ និងគម្រោងធ្វើឲ្យប្រសើរឡើង នូវសមត្ថកិច្ចដឹកជញ្ជូនរបស់រថយន្តក្រុងក្នុងរាជធានីភ្នំពេញ។
លោក ឡុង វីសាលោ រដ្ឋលេខាធិការ និងជារដ្ឋមន្ត្រីស្តីទី នៃក្រសួងការបរទេសកម្ពុជា ជាមួយ លោក យូជី គូម៉ា ម៉ារូ ឯកអគ្គរាជទូតជប៉ុន ប្រចាំនៅកម្ពុជា នឹងចុះហត្ថលេខា នៃការផ្តល់ហិរញ្ញប្បទាននៅរសៀល ថ្ងៃទី២៧ ខែកញ្ញា ឆ្នាំ២០១៦៕