ភ្នំពេញ៖ គណបក្សសង្គ្រោះជាតិ (CNRP) បានដាក់លិខិតមួយច្បាប់ស្នើឲ្យគណៈកម្មាធិការជាតិរៀបចំការបោះឆ្នោត(គ.ជ.ប)ឲ្យចាត់វិធានការ ករណីចាត់តាំងកងកម្លាំងប្រដាប់អាវុធ ឲ្យទៅចុះឈ្មោះបោះឆ្នោតនៅទីតាំងផ្សេងពីទីលំនៅ ឬខុសទីសំណាក់ពិតប្រាកដរបស់សាមីខ្លួន។
គណបក្សប្រឆាំងនេះថាការចាត់វិធានការនេះគឺដើម្បីធានាឲ្យការចុះឈ្មោះបោះឆ្នោតប្រព្រឹត្តិទៅដោយរលូន និងការបោះឆ្នោត ប្រកបដោយសេរី ត្រឹមត្រូវ និងយុត្តិធម៌។
អ្នកនាំពាក្យ គ.ជ.ប ថា ករណីនេះ គណៈកម្មាធិការជាតិរៀបចំការបោះឆ្នោត កំពុងធ្វើការស៊ើបអង្កេត។ ចំណែកមន្ត្រីឃ្លាំមើលកិច្ចការបោះឆ្នោត នៅកម្ពុជាយល់ថា ករណីនេះមិនរំលោភច្បាប់ទេ ប៉ុន្តែប្រសិនបើមានការបង្ខិតបង្ខំគឺជារំលោភច្បាប់យ៉ាងធ្ងន់ធ្ងរ។ លោក ធូ វិរៈ រាយាការណ៍៖
បើតាមលិខិតរបស់ CNRP ចុះថ្ងៃទី ២២ ខែ កញ្ញា ម្សិលមិញ គណបក្សនេះបានសង្កេតឃើញថា មានស្ថាប័ន កងទ័ព និងនគរបាល បានដឹកនាំកងកម្លាំងរបស់ខ្លួនឲ្យទៅចុះឈ្មោះបោះឆ្នោតនៅទីតាំងផ្សេងពីទីលំនៅ តាមមូលដ្ឋានក្នុងខេត្តមួយចំនួនដែលបក្សនេះថាជាការសកម្មភាពខុសច្បាប់។
លិខិតរបស់ CNRP បានបញ្ជាក់ថា ការចាត់តាំងកងកម្លាំងប្រដាប់អាវុធឲ្យទៅចុះឈ្មោះបោះឆ្នោតនៅទីតាំងផ្សេងនេះគឺជាសកម្មភាព រំលោភបំពានលើច្បាប់បោះឆ្នោត រំលោភលើបទបញ្ជា និងនីតិវិធី សម្រាប់ការចុះឈ្មោះបោះឆ្នោតថ្មីនេះ។ លិខិតដដែលក៏បានបញ្ជាក់ទៀតថា ករណីខាងលើនេះគឺមានលក្ខណៈបង្ខិតបង្ខំផ្ទុយពីឆន្ទៈ ពិតប្រាកដរបស់អ្នកបោះឆ្នោត និងបានបង្ហាញរូបភាពគំរាមកំហែងដល់អ្នកចុះឈ្មោះបោះឆ្នោតផ្សេងទៀត។
លិខិតរបស់ CNRP៖«ការចាត់តាំងកងកម្លាំងប្រដាប់អាវុធយោធា និងនគរបាល ឲ្យទៅចុះឈ្មោះបោះឆ្នោតនៅទីតាំងផ្សេង ឬទីសំណាក់របស់សម៉ីខ្លួនបែបនេះគឺជាសកម្មភាពរំលោភបំពានលើច្បាប់បោះឆ្នោត នៃការចុះឈ្មោះបោះឆ្នោត ឆ្នាំ ២០១៦ និងមានលក្ខណៈបង្ខិតបង្ខំផ្ទុយពីឆន្ទៈពិតប្រាកដ របស់សាម៉ីខ្លួន និងបានបង្ហាញរូបភាពគំរាមកំហែងដល់អ្នកចុះឈ្មោះបោះឆ្នោតផ្សេងទៀតជាជនស៊ីវិល »។
ជុំវិញករណីនេះ គណៈកម្មាធិការជាតិរៀបចំការបោះឆ្នោត (គ.ជ.ប) លោក ហង្ស ពុទ្ធា បានមានប្រសាសន៍ថា គណៈកម្មាធិការជាតិរៀបចំការបោះឆ្នោតបានបញ្ជូនមន្ត្រីរបស់ខ្លួនចុះ ទៅស៊ើបអង្កេតរឿងនេះហើយ។ លោក ហង្ស ពុទ្ធា បានបញ្ជាក់ថា កាលដែលគណបក្សសង្គ្រោះជាតិថាមានកងកម្លាំងប្រដាប់អាវុធ ទៅចុះឈ្មោះបោះឆ្នោត នៅទីតាំងផ្សេងពីលំនៅពិតប្រាកដគឺ មិនខុសច្បាប់ទេ។
លោក ហង្ស ពុទ្ធា បានពន្យល់ថា ការដឹកកម្លាំងប្រដាប់អាវុធទាំងឡានៗ គឺជាការជួយ សម្រួល និងផ្សព្វផ្សាយការចុះឈ្មោះឆ្នោតដល់ប្រជាពលរដ្ឋ។ តែលោកថា ប្រសិនបើបុគ្គលណាមួយត្រូវបានគេបង្ខិតបង្ខំឲ្យបោះឆ្នោតខុសពីឆន្ទៈរបស់ខ្លួន ពួកគាត់អាចប្តឹងមកស្ថាប័នគណៈកម្មាធិការជាតិរៀបចំការបោះឆ្នោត (គ.ជ.ប)។
លោក ហង្ស ពុទ្ធា៖«ប្រសិនបើយើងយល់ថា នេះជាការគំរាមកំហែងដល់ពួកគាត់អាចមានសិទ្ធិប្តឹង។ ស្ថាប័ន ឬអង្គភាពពាក់ព័ន្ធទាំងអស់លោកមានសិទ្ធិក្នុងផ្សព្វផ្សាយជម្រុញ សម្រួលដល់ប្រជាពលរដ្ឋទៅចុះឈ្មោះបោះឆ្នោត អញ្ចឹងការដឹកទាំងឡានអ្វីនេះគឺ ជាការសម្រួលហើយ។ បេះដូងពិតប្រាដករបស់គាត់ស្ថិតនៅក្នុងថ្ងៃបោះឆ្នោត ស្ថិតនៅក្នុងបន្ទប់សំងាត់ ស្ថិតនៅក្នុងដៃរបស់គាត់ដែលនិងធិចគាំទ្រគណបក្សនយោបាយណាមួយ»។
ចំណែកមន្ត្រីឃ្លាំមើលកិច្ចការបោះឆ្នោតនៃអង្គការ Comfrel គឺ លោក គល់ បញ្ញា យល់ថា ករណីកងកម្លាំងប្រដាប់អាវុធទៅចុះឈ្មោះបោះឆ្នោត ខុសពីទីតាំងរស់នៅរបស់ខ្លួនគឺមិនខុសច្បាប់ឡើយ ប៉ុន្តែបើសិនជាការបង្ខិតបង្ខំគឺជារំលោភច្បាប់យ៉ាងធ្ងន់ធ្ងរ។
លោក គល់ បញ្ញា៖ «បើសិនជាគាត់មិនមែនមានទីសំណាក់នៅទីនោះ ឬគាត់ជាអ្នកមិនមែន បានមានន័យថា គាត់ទៅចុះឈ្មោះកន្លែងនោះ ទៅបោះឆ្នោតមិនទៅតាមឆន្ទៈ ដោយសេរីរបស់គាត់ ដោយគេបង្ខំអាហ្នឹងខុសច្បាប់ហើយ ព្រោះការចុះឈ្មោះ ការបោះឆ្នោត គេត្រូវគោរពឆន្ទៈរបស់អ្នកបោះឆ្នោត។ អ្នកបោះឆ្នោតនិង គាត់ទៅដោយឆន្ទៈរបស់គាត់ មានន័យថាគាត់ចង់ទៅចុះកន្លែង គាត់ចង់បោះកន្លែង ហើយបើមានការចាត់តាំងជារបៀបគេហៅថា ការជម្រុញឲ្យគាត់ដោយប្រឆាំងនឹងឆន្ទៈរបស់គាត់ នេះជារំលោភច្បាប់ធ្ងន់ធ្ងរហើយ»។
បើតាម លោក ហង្ស ពុទ្ធា អ្នកនាំពាក្យ គ.ជ.ប ចាប់ពីដាក់ឱ្យដំណើរការនៃការចុះឈ្មោះបោះឆ្នោតថ្មី ឆ្នាំ២០១៦ ពីថ្ងៃទី ០១ កញ្ញា រហូតមកត្រឹមថ្ងៃទី ២៣ កញ្ញា គឺ គ.ជ.ប បានទទួលពាក្យបណ្ដឹង ជាង២០ពាក្យបណ្ដឹង និងមានអ្នកចូលរួមចុះឈ្មោះបោះឆ្នោតជាង ៣លាននាក់។
ការចុះឈ្មោះបោះឆ្នោតឆ្នាំនេះទៀត ធ្វើឡើងដោយមានអ្នកជំនាញបច្ចេកទេស កុំព្យូទ័រ អ្នកជំនាញមកពីប្រទេសជប៉ុន និងសហភាពអឺរ៉ុប។ អ្នកសង្កេតការណ៍មួយចំនួនគិតថា ការចុះឈ្មោះបោះឆ្នោត តាមប្រព័ន្ធកុំព្យូទ័រ ដោយមានផ្ដិតស្នាមមេដៃ និងថតមុខអ្នកចុះឈ្មោះបោះឆ្នោត គឺជាប្រព័ន្ធចុះឈ្មោះបោះឆ្នោតមានប្រសិទ្ធិភាព ដោយមិនអាចមានឈ្មោះស្ទួន ឈ្មោះខ្មោច និងអ្នកបោះឆ្នោតបន្លំទៀតឡើយ៕
