ភ្នំពេញ៖ ភ្នាក់ងារសហរដ្ឋអាមេរិកសំរាប់អភិវឌ្ឍន៍អន្តរជាតិ បានចុះអនុស្សរណៈយោគយល់រវាង សាកលវិទ្យាល័យភូមិន្ទកសិកម្ម ដែលជាផ្នែកមួយពង្រឹងសហប្រតិបត្តិ ទ្វេភាគី។ អនុស្សរណៈ នេះ គឺស្តីពី«ការបង្កើតមជ្ឈមណ្ឌលឧត្តមភាពប្រពលវប្បកម្ម កសិកម្មនិរន្តភាព និងអាហារូបត្ថម្ភ» ដោយធ្វើឡើងនៅព្រឹកថ្ងៃទី ២២ ខែកញ្ញា ឆ្នាំ២០១៦នេះ នៅសាកលវិទ្យាល័យភូមិន្ទកសិកម្ម។ លោក ជួន សារ៉េត រាយការណ៍៖
នាយកទីភ្នាក់ងារសហរដ្ឋអាមេរិកសំរាប់អភិវឌ្ឍអន្តរជាតិ លោកស្រី Polly Dunford មានប្រសាសន៍ថា អនុស្សរណៈយោគយល់នេះគឺដើម្បីដោះស្រាយបញ្ហាប្រឈមធំៗនៅលើពិភពលោកលើផ្នែកកសិកម្ម និងសន្តិសុខស្បៀង ដែលភ្នាក់ងារចាប់ដៃគូ សាកលវិទ្យាល័យភូមិន្ទកសិកម្ម ជាផ្នែកមួយ កិច្ចសហប្រតិបត្តិការទ្វេភាគី។
ព្រឹត្តិបត្រព័ត៌មានរបស់ទីភ្នាក់ងារសហរដ្ឋអាមេរិក សំរាប់អភិវឌ្ឍអន្តរជាតិ ប្រចាំកម្ពុជាដែលបានចែកចាយក្នុងកម្មវិធីនេះ បានឱ្យដឹងថា ការបង្កើតមជ្ឈមណ្ឌលឧត្តមភាព ប្រពលវប្បកម្ម កសិកម្មនិរន្តភាព និងអាហារូបត្ថម្ភ គឺដើម្បីជំរុញនវានុវត្តន៍វិស័យឯកជន ការស្រាវជ្រាវ ការអប់រំ និងការបណ្តុះបណ្តាល កសិកម្ម។
បើតាមឯកសារនេះ គឺពង្រឹងផងដែរចំពោះការកសាងសមត្ថភាព វិស័យសាធារណៈ តាមរយៈការសហការ និងការចែករំលែកចំណេះដឹងដោយផ្តោតលើការធ្វើឱ្យប្រសើរទ្បើងនូវ សន្តិសុខស្បៀង និងអាហារូបត្ថម្ភនៅក្នុងប្រទេសកម្ពុជា។
នៅខណៈនេះដែរសាកលវិទ្យាធិការនៃសាកលវិទ្យាល័យភូមិន្ទកសិកម្ម លោក ង៉ោ ប៊ុនថាន បានថ្លែងនៅក្នុងសុន្ទរកថារបស់លោកថា អនុស្សារណៈនេះពិតជាមានអត្ថប្រយោជន៍ច្រើន ដល់ ការធ្វើទំនាក់ទំនង លើ វិស័យ ស្បៀងអាហារ និងសន្តិសុខស្បៀង។
លោក ង៉ោ ប៊ុនថាន មានជំនឿថា មជ្ឈមណ្ឌលដែលបានបង្កើតថ្មីនេះនឹងផ្តល់នូវការ បណ្តុះបណ្តាល និងគាំទ្រការស្រាវជ្រាវ ដល់អ្នកជំនាញកសិកម្មកម្ពុជា នាពេលអនាគត ដែលពួកគេត្រូវការដើម្បីទទួលបានជោគជ័យ។
ជុំវិញការបង្កើតមន្ទីរពិសោធន៍ថ្មីនេះ ឯកអគ្គរដ្ឋទូតសហរដ្ឋអាមេរិកប្រចាំព្រះរាជាណាចក្រកម្ពុជា លោក William Heidt មានប្រសាសន៍ថា នេះជាលើកទីមួយសម្រាប់លោក ដែលបានមកទស្សនៈកិច្ចមន្ទីរពិសោធន៍នៅសាកលវិទ្យាល័យភូមិន្ទកសិកម្ម។
លោក បន្តថាដើម្បីចូលរួមចំណែកជួយដល់វិស័យ កសិកម្មកម្ពុជា ឱ្យកាន់តែមានភាពល្អប្រសើនោះ សហរដ្ឋអាមេរិកបានផ្តល់ថវិកាចំនួន ២,៥ លានដុល្លារអាមេរិក មកដល់សាកលវិទ្យាល័យភូមិន្ទកសិកម្ម ហើយការផ្តល់ថវិកានេះក្នុងគោលបំណងដូចជា៖
លោក William Heidt ៖«ការផ្តល់ថវិកានេះមានគោលបំណងសំខាន់ៗដូចជា ការចុះអនុស្សរណៈ យោគយល់គ្នារវាង កម្ពុជា និងសហរដ្ឋអាមេរិក ស្តីពីវិស័យកសិកម្ម ដើម្បីចែករំលែកចំណេះដឹងដោយផ្តោតលើការធ្វើឱ្យប្រសើរទ្បើង នូវសន្តិសុខស្បៀង និងអាហារូបត្ថម្ភនៅក្នុងប្រទេសកម្ពុជា មួយវិញទៀតគឺចូលរួម បណ្តុះបណ្តាលធនធានមនុស្ស តាមរយៈការបណ្តុះសិស្សនិស្សិត ដែលពួកគេនឹងចុះទៅអនុវត្តដោយផ្ទាល់ជាមួយនឹងកសិករ»។
ចំណែករដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទ លោក វេង សាខុន បានផ្តល់បទសម្ភាសន៍ឱ្យអ្នកសារព័ត៌មាននៅថ្ងៃនេះថា ការបង្កើតឱ្យមានមន្ទីរពិសោធន៍ថ្មីនេះមានសារៈសំខាន់ណាស់សម្រាប់និស្សិត។ លោក បន្តថាដើម្បីឱ្យប្រទេសកម្ពុជាមានការវិវត្តន៍ រុងរឿងរហ័សនោះគឺត្រូវចាប់ផ្តើម ពីការបណ្តុះបណ្តាលធនធានមនុស្ស ដើម្បីឱ្យពួកគេបានយល់ដឹងពីបញ្ហាប្រឈមថ្មីៗដើម្បីរកវិធីទប់ស្កាត់ នូវបញ្ហាប្រឈមទាំងនោះ។
លោក វេង សាខុន៖ «ការពិសោធន៍នេះគឺផ្សាភ្ជាប់នូវការបញ្ជូលបច្ចេកវិទ្យាថ្មីដែលចាំបាច់ណាស់ អ្នកកសិកររបស់កម្ពុជារបស់យើងនេះត្រូវទទួលនូវបច្ចេកវិទ្យាថ្មី ព្រោះនៅពិភពលោកនេះ មានប្រទេសមួយចំនួនគេនិយាយអំពីការធ្វើបដិវត្តន៍វិស័យកសិកម្ម ធ្វើបដិវត្តន៍វិស័យកសិកម្មនេះ គេសំដៅទៅលើការបញ្ចូលនូវបច្ចេកវិទ្យាថ្មីៗធ្វើម៉េចឱ្យកសិករហ្នឹងមានភាពងាយស្រួលជាងមុន គាត់មិនធុញនឹងជីវិតរបស់គាត់ហើយកាត់បន្ថយការចំណាយពលកម្មរបស់គាត់នៅក្នុង វិស័យកសិកម្ម»។
សូមជំរាបដែរថាបច្ចុប្បន្នមានមន្ទីរពិសោធន៍ នវានុវត្តន៍ នៃកម្មវិធីសន្តិសុខស្បៀងសម្រាប់អនាគតចំនួន ៦ ដែលកំពុងធ្វើសកម្មភាពក្នុងប្រទេសកម្ពុជា និងធ្វើការក្នុងតំបន់នៃអានុភាពដែលបានកំណត់ដោយផ្តោតលើ ខ្សែសង្វាក់ផលិតកម្មចំបងៗដូចជា៖
មន្ទីរពិសោធន៍នវានុវត្តន៍ប្រពលវប្បកម្មដោយនិរន្តភាព មន្ទីរពិសោធន៍នវានុវត្តន៍ អាហារូបត្ថម្ភ មន្ទីរពិសោធន៍នុវានុវត្តន៍ សាកវប្បកម្ម មន្ទីរពិសោធន៍នវានុវត្តន៍ វិធានការចម្រុះគ្រប់គ្រងកត្តាចង្រៃ មន្ទីរពិសោធន៍នវានុវត្តន៍ វារីវប្បកម្ម និងជលផល និងមន្ទីរពិសោធន៍នវានុវត្តន៍ ប្រព័ន្ធផលិតកម្មសត្វ៕