ភូមា៖ លោកស្រី អង់ សានស៊ូជី ប្រធានក្រុមប្រឹក្សារដ្ឋ និងជារដ្ឋមន្ដ្រីការបរទេស នៃប្រទេសភូមា ដែលបានថ្លែងសុរន្ទកថាដំបូង ទៅកាន់មហាសន្និបាត អង្គការសហប្រជាជាតិ នៅថ្ងៃពុធ ទី២១ ខែកញ្ញា ម្សិលមិញ ដោយបញ្ជាក់ជំហរជាថ្មីទៀត ចំពោះការគ្រប់គ្រង ជនអន្ដោប្រវេសន៍ ឬគេហៅថាជនជាតិដើមភាគតិច សហគមន៍រ៉ូហ៊ឹងយ៉ា នៃប្រទេសបង់ក្លាដេស។
លោកស្រី អង់ សានស៊ូជី បានថ្លែងធ្វើឱ្យមានការភ្ញាក់ផ្អើលយ៉ាងខ្លាំង ពីសំណាក់គណប្រតិភូ ដែលបានចូលរួមមហាសន្និបាតនេះ ខណៈលោកស្រីថ្លែងថា៖ «រដ្ឋាភិបាលភូមា មិនបារម្ភខ្លាំងពេកទេ ចំពោះការព្រួយបារម្ភពីសហគមន៍អន្ដរជាតិ ប៉ុន្ដែអ្វីដែលភូមាត្រូវការនៅពេលនេះ គឺ សុំឱ្យសហគមន៍អន្ដរជាតិ យោគយល់ និងចូលរួមចំណែកចំពោះវិបត្តិ នៃជនអន្ដោប្រវេសន៍ដោយន័យស្ថាបនា និងយោគយល់»។
តាមទីភ្នាក់ងារសារព័ត៍មាន Reuters នេះជាលើកដំបូងហើយដែលជ័យលាភីនូបែលសន្ដិភាព និងជាជើងឯកខាងលទ្ធិប្រជាធិបតេយ្យ លោកស្រី អង់ សានស៊ូជី បានបង្ហាញវត្តមាននៅឯមហាសន្និបាតអង្គការសហប្រជាជាតិលើកទី៧១ឆ្នាំនេះ នៅពេលដែលលោកស្រីទើបតែមានឱកាសដឹកនាំ ប្រទេសភូមា បន្ទាប់ពីត្រូវបានពួកយោធា ឃុំខ្លួនក្នុងផ្ទះរយៈពេលជិត២០ឆ្នាំ។
លោកស្រីបានថ្លែងទៅកាន់មហាសន្និបាតដោយទឹកមុខរីករាយ និងប្រើប្រាស់វោហាសាស្ដ្រ ដ៏ប៉ិនប្រសប់ ទៅកាន់ប្រតិភូទៀតថា៖«យើងបានប្ដេជ្ញាថាករណីនេះ ត្រូវមានដំណោះស្រាយ សមហេតុសមផល ដែលចាំបាច់ធ្វើអោយមានសន្ដិភាព ហើយនិងស្ថេរភាព និងការអភិវឌ្ឍន៍សម្រាប់សហគមន៍ទាំងអស់ ដែលមាននៅក្នុងប្រទេសរបស់យើង តែរដ្ឋាភិបាលយើងក៏ត្រូវពិនិត្យផងដែរចំពោះការធ្វើអោយមានជម្លោះកើតឡើង ដោយយើងត្រូវដាក់ចុះ នូវកម្មវិធីដែលមានរយៈពេលយូរ សំដៅអោយមានការយោគយល់ទុកចិត្តគ្នាជាមុនសិន»។
លោកស្រីបានបញ្ជាក់ទៀតថា ក្នុងន័យនេះហើយដែលប្រទេសភូមាបង្កើតគណៈកម្មាការប្រឹក្សាសម្រាប់រដ្ឋរ៉ាក់ឃីង ដោយស្នើសុំអតីតអគ្គលេខាធិការអង្គការសហប្រជាជាតិ កូហ្វីអាណាន ជួយលើកិច្ចការនេះ។
សូមជម្រាបថា ជនអន្ដោប្រវេសន៍រ៉ូហ៊ឹងយ៉ា គឺជាផ្នែកមួយនៃជនជាតិបង់ក្លាដេស ដែលបានឆ្លងចូលមករស់នៅប្រទេសភូមា តាមរយៈអាណានិគមអង់គ្លេស ហើយក្រោយមករបបយោធាបានដាក់សហគមន៍នេះថា ជាជនអន្ដោប្រវេសន៍ខុសច្បាប់ និងបានចេញច្បាប់មិនអោយផ្ដល់សញ្ជាតិដល់ជនជាតិទាំងនេះឡើយ។
បច្ចុប្បន្នជនជាតិរ៉ូហ៊ឹងយ៉ា មានប្រមាណ៨០ម៉ឺននាក់ដែលរស់នៅក្នុងរដ្ឋរ៉ាក់ឃីន ភាគខាងលិចនៃប្រទេសភូមា។
កាលពីឆ្នាំ២០១២ អំពើហិង្សាលើជាតិសាសនេះ បានបណ្ដាលឱ្យស្លាប់មនុស្សយ៉ាងតិច២០០នាក់៕ប្រភព CNA
