ភ្នំពេញ៖ គណបក្សសង្គ្រោះជាតិ បានលើកឡើងថាបញ្ហាស្រូវធ្លាក់ថ្លៃ គឺជាកំហុសរបស់រដ្ឋាភិបាល ដោយរដ្ឋាភិបាល ពុំមាននយោបាយលើវិស័យកសិកម្មត្រឹមត្រូវ ទើបបណ្តាលឱ្យពលរដ្ឋខ្មែរជាកសិកររងគ្រោះ ព្រោះតែគ្មានទីផ្សារសម្រាប់លក់ផលិតផលរបស់ខ្លួន។
នេះបើតាមសេចក្តីថ្លែងការណ៍របស់ក្រុមសមាជិកសភា គណបក្សសង្គ្រោះជាតិ ដែលបានចេញផ្សាយកាលពីថ្ងៃទី១៩ ខែកញ្ញា ម្សិលមិញនេះ។ ប៉ុន្តែអ្នកនាំពាក្យរដ្ឋាភិបាលថាការលើកឡើងនេះ គ្រាន់តែចង់កេងចំណេញនយោបាយតែប៉ុណ្ណោះ។ កញ្ញា ណាតា រាយការណ៍៖
ក្រុមសមាជិកសភាគណបក្សសង្គ្រោះជាតិ បាននិយាយនៅក្នុងសេចក្ដីថ្លែងការណ៍ របស់ខ្លួនថា ក្រៅពីទទួលកំហុស គឺត្រូវរៀបកែលម្អ នយោបាយក្នុងការជួយទ្រទ្រង់ដល់កសិករខ្មែរជាបន្ទាន់ ដោយមិនត្រូវប្រើកម្លាំងទ័ព និងកម្លាំងតុលាការ ទៅគម្រាមកំហែងកសិករ ដែលកំពុងទាមទារឱ្យមានការដោះស្រាយ លើបញ្ហាដែលរដ្ឋាភិបាល ជាអ្នកទទួលខុសត្រូវនេះទេ។
ជាមួយគ្នានេះ ក្រុមតំណាងរាស្ត្ររបស់គណបក្សប្រឆាំងធំជាងគេ ក៏បានទាមទារឱ្យមាននយោបាយត្រឹមត្រូវ ដើម្បីលើកស្ទួយជីវភាពកសិករខ្មែរ ដោយរដ្ឋាភិបាលត្រូវផ្តល់ដីធ្លី មធ្យោបាយ និងបច្ចេកទេសសម្រាប់ការបង្កបង្កើតផល និងបង្កើតទីផ្សារសម្រាប់លក់ផលិតផលបានចំណេញ។
សេចក្តីថ្លែងការណ៍របស់ក្រុមតំណាងរាស្ត្រ របស់គណបក្សប្រឆាំងនេះបន្តថា ការតវ៉ារបស់កសិករ នៅស្រុកសង្កែកាលពីថ្ងៃទី ១៨កញ្ញា គឺជាលទ្ធិផលដែលបានកើតជាបណ្តើរៗពីនយោបាយខុស របស់រដ្ឋាភិបាល ដែលផ្តល់ដីសម្បទានសេដ្ឋកិច្ច ៩៩ឆ្នាំ ធ្វើឱ្យកសិករខ្វះ និងបាត់បង់ដី។ បន្ថែមលើនេះរដ្ឋាភិបាល មិនបានផ្តល់ជំនួយបច្ចេកទេស ដល់កសិករបានទូលំទូលាយសម្រាប់ការបង្កបង្កើនផល ពុំបង្កើតមូលដ្ឋានទីផ្សារសម្រាប់កសិផល និងការផ្តល់ព័ត៌មានទាន់ពេលវេលា ពីតម្លៃ កសិផល ជាដើម។
តែបែបនេះក្ដី ក្នុងពិធីចែកសញ្ញាបត្រ ដល់និស្សិតមកពីសាកលវិទ្យាល័យ បញ្ញាជាតិ នៅវិទ្យាស្ថានជាតិអប់រំ កាលពីថ្ងៃចន្ទទី ១៩កញ្ញា សម្ដេចនាយករដ្ឋមន្ត្រី ហ៊ុន សែន បានបញ្ជាក់ថា មិនមែនតែប្រទេសកម្ពុជា ដែលតម្លៃស្រូវធ្លាក់ថ្លៃ នៅប្រទេសផ្សេង ក៏តម្លៃស្រូវនេះ ធ្លាក់ថ្លៃដែរ។ សម្ដេចថា បញ្ហានេះ ជាបញ្ហានៅទូទាំងអាស៊ីអាគ្នេយ៌។
ទាក់ទិននឹងសេចក្ដីថ្លែងការណ៍របស់គណបក្សសង្គ្រោះជាតិ លោក ផៃ ស៊ីផាន អ្នកនាំពាក្យរដ្ឋាភិបាល បានប្រាប់វិទ្យុស្ត្រីនៅថ្ងៃទី ២០កញ្ញានេះថា ការលើកឡើងរបស់ក្រុមតំណាងរាស្ត្រគណបក្សប្រឆាំង គឺគ្រាន់តែចង់កេងចំណេញនយោបាយ តែប៉ុណ្ណោះ ដោយមិនយល់ពីសភាពការណ៍ ហើយមិនបានមើលថារដ្ឋាភិបាល បានធ្វើអ្វីខ្លះជួយដល់កសិករ។
លោកបន្តថា ខណៈដែលអន្តរជាតិ និងប្រទេសក្នុងតំបន់អាស៊ីអាគ្នេយ៍ ដូច ថៃ ម៉ាឡេស៊ីដែលសុទ្ធតែជួបវិបត្តិនេះទាំងអស់គ្នា រដ្ឋាភិបាលកម្ពុជា បានរៀបចំវិធានចាំជួយការពារហានិភ័យនៃការធ្លាក់តម្លៃស្រូវ ដោយផ្ដល់ថវិកាជាតិសម្រាប់ជួយទិញស្រូវពីកសិករ។
លោកប្រាប់បន្ថែមថា ជាមួយនេះ រដ្ឋាភិបាលក៏មានគោលនយោបាយ បង្កើនកសិផលរបស់កសិករ រៀបចំឱ្យមានប្រព័ន្ធធារាសាស្ត្រល្អសម្រាប់កសិករ មិនយកពន្ធលើដីស្រែ និង សម្ភារៈកសិកម្ម ព្រមទាំងមានវិធានការ រកទីផ្សារសម្រាប់កសិករផងដែរ។
លោកព្រមានផងដែរថា នឹងចាត់វិធានការទៅលើអ្នកញុះញង់ឱ្យកសិករធ្វើការតវ៉ា ជាពិសេសគណបក្សសង្គ្រោះជាតិ ដែលចង់កេងចំណេញ នយោបាយ ពីបញ្ហានេះ។
លោក ផៃ ស៊ីផាន បញ្ជាក់ថា៖«នៅថ្ងៃសុក្រយើងសម្រេចទម្លាក់លុយ២០លាន ទៅ៣០លាន សម្រាប់មកទិញស្រូវ ប៉ុន្តែថ្ងៃអាទិត្យ នាំគ្នាយកស្រូវមកចាកចោលលើថ្នល់ ដែលប្រឆាំងនឹងវប្បធម៌កម្ពុជា ដែលយើងហៅស្រូវនឹងជាព្រះមេ ដូច្នេះពួកចាក់ចុចទេ ជាពិសេសគណបក្សសង្គ្រោះជាតិ បន្ទាប់មកចេញសេចក្តីថ្លែងការណ៍ គឺរដ្ឋាភិបាលបានដោះស្រាយរួចស្រេចទៅហើយតើ តាំងពីថ្ងៃសុក្រ ចុះហេតុដូចម្តេចបានជាមានព្រឹត្តិការណ៍នេះឡើង ហើយលោកជំទាវ មូរ សុខហួរ ហ្នឹងគាត់ធ្វើសេចក្តីថ្លែងការណ៍ គាត់និយាយហ្នឹងប្រៀបដូចមនុស្សទើបងើបពីដេក គ្មានបានធ្វើអីសោះ គ្រាន់តែឆកនយោបាយប៉ុណ្ណោះ គាត់ញុះញ៉ង់យើងចាត់វិធានការ»។
ជុំវិញបញ្ហានេះ លោក សម វិទូ នាយកមជ្ឈមណ្ឌលសិក្សា និងអភិវឌ្ឍន៍កសិកម្មកម្ពុជា ហៅកាត់ថា CEDAC បានលើកឡើងថា ដើម្បីបញ្ចៀសបញ្ហា ស្រូវធ្លាក់ថ្លៃគំហុកបែបនេះរដ្ឋាភិបាលត្រូវរៀបចំកញ្ចប់ថវិកា អោយបានមុនរដូវកសិករច្រូតកាត់ ហើយកញ្ចប់ថវិកានោះត្រូវរៀបចំឱ្យត្រឹមត្រូវ។
ជាមួយនេះលោកថា រដ្ឋាភិបាលគួរតែ ជំរុញដល់ស្ថាប័នពាក់ព័ន្ធ រៀបចំសមាគម កសិកម្ម ដើម្បីប្រមូលផ្តុំកសិករ និងប្រមូលនូវផលិតផលកសិកម្ម។
លោក សម វិទូ៖«ហើយបង្កើតឱ្យមានសហគមន៍ផលិតស្រូវ ដែលសហគមន៍ ហ្នឹងមានតួនាទីសំខាន់ក្នុងការកសិកម្មនូវបច្ចេកទេស ក៏ដូចជាក្នុងការផលិតដើម្បីឱ្យការផលិតរបស់គាត់មានតម្លៃសមស្រប អាចប្រកួតប្រជែងជាមួយប្រទេសជិតខាងបាន»។
កាលពីថ្ងៃទី ១៨កញ្ញា ប្រជាកសិករនៅស្រុកសង្កែរ ខេត្តបាត់ដំបង ជិត២០០០នាក់ បានផ្ទុះការតវ៉ា ដោយនាំគ្នាចាក់ស្រូវចោលនៅលើផ្លូវជាតិលេខ៥ ដើម្បីបង្ហាញទៅរដ្ឋាភិបាលថាស្រូវរបស់ពួកគាត់រាប់តោនត្រូវកប់ចោល ដោយមិនមានទីផ្សារ ដែលធ្វើឱ្យប៉ះពាល់ធ្ងន់ធ្ងរជីវភាពពួកគាត់៕
