ភ្នំពេញ៖ សាលាដំបូងរាជធានីភ្នំពេញបានសម្រេចកាត់ទោសស្ត្រីបឹងកក់៤នាក់ឲ្យជាប់គុក ៦ខែ ពីបទប្រមាថអ្នករាជការសាធារណៈ និងបទចោទប្រឆាំងនឹងអ្នករាជការសាធារណៈដោយទុកពេលឲ្យសហគមន៍ស្ត្រីបឹងកក់មានរយៈ ១ខែ ដើម្បីប្តឹងទៅសាលាឧទ្ធរណ៍ជំទាស់។
មន្ត្រីអង្គការសង្គមស៊ីវិល និងស្ត្រីសហគមន៍ យល់ថា ការឃុំខ្លួនស្ត្រីបឹងកក់ក្នុងសំណុំរឿងចាស់ កាលពី ៥ឆ្នាំ គឺជារឿងចម្លែក ហើយ ជាសញ្ញានៃការបង្ក្រាប យុទ្ធនាការថ្ងៃចន្ទពណ៍ខ្មៅ។ លោក ធូ វិរៈ រាយការណ៍៖
បន្ទាប់ពីសាលាដំបូងរាជធានីភ្នំពេញ បានសម្រេចផ្តន្ទាទោស ស្ត្រីបឹងកក់ទាំង ៤រូបនេះ ឲ្យជាប់ពន្ធនាគារ សហគមន៍បឹងកក់ជាច្រើននាក់ដែល បាន មកប្រមូលផ្ដុំគ្នានៅខាងមុខតុលាការ បានស្រែកយំរិះគន់សេចក្តីសម្រេចរបស់តុលាការ ថាជារឿងអយុត្តិធម៌។
អ្នកស្រី គង់ ចន្ថា ស្ត្រីសហគមន៍ ម្នាក់ក្នុងចំណោម ៣នាក់ផ្សេងទៀត ត្រូវបានតុលាការកាត់ទោសជាប់គុកដែរនោះ បានប្រាប់អ្នកសារព័ត៌មានថា អ្នកស្រីនឹងប្តឹងទៅសាលាឧទ្ធរណ៍បន្តទៀត ដើម្បីជំទាស់ទៅនឹងសេចក្តីសម្រេចរបស់សាលក្រមសាលាដំបូងរាជធានីភ្នំពេញ។
ជាមួយគ្នានេះ អ្នកស្រី បូវ សោភា តំណាងសហគមន៍បឹងកក់ ម្នាក់ទៀត បានសម្តែងការខកចិត្តចំពោះ ការសម្រេចរបស់ តុលាការ កាត់ទោសស្ត្រីសហគមន៍បឹងកក់ ដោយអយុត្តិធម៌។ អ្នកស្រីថា ការចាប់ឃុំខ្លួនតំណាងសហគមន៍បឹងកក់ អ្នកស្ត្រី ទេព វន្នី និងតំណាងសហគមន៍ ៣នាក់ទៀតឲ្យជាប់ពន្ធធាគារ គឺជាការបំបិទសំឡេងប្រជាពលរដ្ឋ មិនឲ្យមានយុទ្ធនាការថ្ងៃចន្ទពណ៌ខ្មៅ ដើម្បីទាមទារឲ្យដោះលែងមន្ត្រីអង្គការសមាគម អាដហុក និងមន្ត្រីគ.ជ.ប រួមទាំងទាមទារឲ្យស្វែងរកយុត្តិធម៌ក្នុងឃាតកម្មបាញ់សម្លាប់លោកបណ្ឌិត កែម ឡី។
អ្នកស្រី ប៊ូវ សោភា៖«ការដាក់អ្នកស្រី ទេព វន្នី ក្នុងពន្ធធាគារនេះ គ្មានចំណេញដល់រដ្ឋាភិបាល មិនមានចំណេញអ្វីទៅដល់មុខមាត់ របស់ប្រទេសកម្ពុជាទេ មានតែខាតបង់ ដូច្នេះសូមឲ្យលោកនាយករដ្ឋមន្ត្រី គិតសារឡើងវិញអនុសាសន៍ ដែលគាត់បាននិយាយហើយ អញ្ចឹងគួរតែគាត់ចាត់ចែងមើលមន្ត្រីថ្នាក់ក្រោមកំពុងតែមើលងាយ និងប្រមាថ»។
ចំណែកមន្ត្រីអង្គការសង្គមស៊ីវិលឃ្លាំមើល បញ្ហាសិទ្ធិមនុស្ស លោក អ៊ំ សំអាត់ ក៏យល់ឃើញដូចអ្នកស្រី ប៊ូវ សុភា ដែរ។
លោក អ៊ំ សំអាត់៖«ដូចជាអត់ចម្លែកយូរទៅមិនចម្លែក ដោយរឿងបឹងកក់ គ្រប់រឿងទាំងអស់គ្មានរឿងណាមួយដែលត្រូវបានលើកលែងចោទប្រកាន់ បទល្មើសណាមួយទេគឺគេត្រូវតែដាក់ទាំងអស់ គឺថា អាចព្យួរឬ កាត់ទោស ក្នុងរឿងនេះប្រសិននៅពេលសាលក្រមស្ថាពរ គាត់និងត្រវអាចចាប់ខ្លួន បើសាលក្រមមិនទាន់ស្ថាព័រ មិនអាចចាប់ខ្លួនគាត់បានទេ អញ្ចឹងករណីនេះគេដាក់ គំនៀប ហើយដាក់គំនៀបទៀត ដើម្បីរារាំងនៅការចូលរួមតវ៉ា ឬក៍ការទាមទារផ្សេងៗរបស់អ្នកបឹងកក់»។
យ៉ាងណាក៏ដោយ អ្នកនាំពាក្យសាលាដំបូងរាជធានីភ្នំពេញ លោក លី សុផាណា បានប្រាប់អ្នកសារព័ត៌មានតាមបណ្តាញសង្គមតេឡេក្រាម ថា ការសម្រេចផ្តន្ទាទោស លើជនជាប់ចោទឈ្មោះ ទេព វន្នី បូ ឆវី ហេង មុំ និង គង់ ចន្ថា ដាក់ពន្ធនាគារ ៦ខែ ពីបទប្រមាថអ្នករាជការសាធារណៈ និងបទប្រឆាំងនឹងអ្នករាជការសាធារណៈ មានស្ថានទម្ងន់ទោសគឺស្របតាមមាត្រា ៥០២ និងមាត្រា ៥០៤ នៃក្រមព្រហ្មទណ្ឌ ដែលប្រព្រឹត្តនៅមុខសាលារាជធានីភ្នំពេញ កាលពីថ្ងៃទី ២៨ វិច្ឆិកា ២០១១។
តែនៅពេល លឺថា សាលក្រម បានផ្ដន្ទាទោស តំណាងរបស់ខ្លួនស្ត្រី ជាច្រើននាក់ មកប្រមូល ផ្ដុំគ្នា នៅខាងមុខតុលាការ បានសន្យា ធ្វើតវ៉ាដូចនេះ នៅពេលដែលចាំបាច់ ដើម្បី ឱ្យសាលា ឧទ្ធរណ៍ ទម្លាក់បទចោទ ប្រឆាំងតំណាងរបស់ ពួកគេ៕
