ញូវយ៉ក៖ រដ្ឋមន្ត្រីការបរទេសអាមេរិកលោក ចន ឃ៊ែរី(John Kerry) កាលពីថ្ងៃអាទិត្យទី១៨ កញ្ញា បានជំរុញឱ្យកូរ៉េខាងជើងបង្កកកម្មវិធីនុយក្លេអ៊ែររបស់ខ្លួនជាជំហានដំបូង ដើម្បីឆ្ពោះទៅចាប់ផ្តើមការចរចាឱ្យប្រាកដប្រជាជាមួយនឹងសហរដ្ឋអាមេរិក និងពិភពលោកទាំងមូល ពីអនាគតរបស់ប្រទេសឯកោមួយនេះ។
ថ្លែងនៅក្នុងកិច្ចប្រជុំមួយជាមួយរដ្ឋមន្ត្រីការបរទេសជប៉ុន និង កូរ៉េខាងត្បូង លោក ឃ៊ែរី និយាយថា សហរដ្ឋអាមេរិកនៅតែមានការប្តេជ្ញាចិត្តយ៉ាងខ្លាំង ដើម្បីការពារជាតិទៅវិញទៅមកទប់ទល់ការបង្កហេតុត្រឡប់មកវិញពីប្រទេសកូរ៉េខាងជើង។
លោក ឃ៊ែរី និយាយថា សហរដ្ឋអាមេរិកបានត្រៀមខ្លួនជាស្រេចដើម្បីធ្វើការកិច្ចចរចាជាមួយទីក្រុងព្យុងយ៉ាង ជុំវិញកិច្ចពិភាក្សាសន្តិភាពនៅលើឧបទ្វីបកូរ៉េ និងដើម្បីបញ្ចប់ភាពឯកោរបស់កូរ៉េខាងជើង និងការអភិវឌ្ឍសេដ្ឋកិច្ចប្រទេសនេះឡើងវិញ ប្រសិនបើប្រទេសកូរ៉េខាងជើងយល់ស្របទៅនឹងការដកអាវុធនុយក្លេអ៊ែរ។
លោក Kerry និយាយថា៖«តម្រូវការជាបន្ទាន់សម្រាប់ពួកគេ គឺការបង្កកអាវុធនុយក្លេអ៊ែរដែលជាអ្វីដែលពួកគេមាន ហើយយល់ព្រមដើម្បីបង្កកអាវុធនុយក្លេអ៊ែរ និងមិនចូលរួមក្នុងសកម្មភាពបង្កហេតុណាមួយបន្ថែមទៀត និងមិនចូលរួមនៅក្នុងការធ្វើតេស្តមីស៊ីលទៀតឡើយ។ ក្នុងគោលបំណងរបស់យើង គឺដើម្បីនាំយកមកនូវបណ្តាប្រទេសរួមគ្នា និងដើម្បីចាប់ផ្តើមចរចាយ៉ាងប្រាកដប្រជាអំពីការនាពេលអនាគត»។
ក្នុងខែនេះ កូរ៉េខាងជើងបានធ្វើតេស្តនុយក្លេអ៊ែរលើកទីប្រាំ និងជាការធ្វើតេស្តធំបំផុតរបស់ខ្លួន ដែលទង្វើនៃការបាញ់មីស៊ីលនេះ បានរំលោភលើសេចក្តីសម្រេចរបស់អង្គការសហប្រជាជាតិ ដែលបានរារាំងការអភិវឌ្ឍនុយក្លេអ៊ែរ និងបច្ចេកវិទ្យាមីស៊ីលរបស់ក្រុងព្យុងយ៉ាង។
ប្រទេសចិន ដែលជាសម្ព័ន្ធមិត្តរបស់ទីក្រុងព្យុងយ៉ាង កំពុងត្រូវបានគេជំរុញឱ្យមានការចាប់ផ្តើមកិច្ចពិភាក្សាប្រាំមួយភាគីឡើងវិញ ស្តីពីកម្មវិធីនុយក្លេអ៊ែរកូរ៉េខាងជើង ដែលនឹងមានការចូលរួមពីសហរដ្ឋអាមេរិក, ជប៉ុន, រុស្ស៊ី និងប្រទេសកូរ៉េខាងត្បូង៕ប្រភព៖CNA
