ភ្នំពេញ៖ រដ្ឋាភិបាលនឹងបញ្ចេញថវិកាយ៉ាងតិច២០លានដុល្លារអាមេរិក ដើម្បីធ្វើទុនផ្នែកផ្សេងទៀត គាំទ្រលើតម្លៃស្រូវនៅកម្ពុជា។នេះបើយោងតាមគណនីហ្វេសប៊ុក របស់សម្តេច ហ៊ុន សែន នាយករដ្ឋមន្ត្រីកម្ពុជា នៅថ្ងៃទី ១៦ កញ្ញា ឆ្នាំ២០១៦នេះ។
ក្នុងហ្វេសប៊ុកនេះ សម្ដេចបានបញ្ជាក់ដូច្នេះថា៖ «រយៈពេលកន្លងទៅនេះតម្លៃស្រូវនិងកសិផល របស់ប្រជាពលរដ្ឋមិនថាតែនៅកម្ពុជាទេ គឺនៅប្រទេសដទៃក៏មានការធ្លាក់ចុះផងដែរ ហើយជាពិសេស មួយរយៈពេលចុងក្រោយនេះគឺតម្លៃស្រូវនៅកម្ពុជាបានធ្លាក់ចុះយ៉ាងខ្លាំង»។
សម្ដេចប្រមុខរដ្ឋាភិបាលបានបញ្ជាក់ថា រដ្ឋាភិបាលកំពុងយកចិត្តទុកដាក់លើបញ្ហានេះនិងបានបញ្ជាទៅក្រសួងសេដ្ឋកិច្ចនិងហិរញ្ញវត្ថុ និងស្ថាប័នពាក់ព័ន្ឋ ដែលបានរៀបចំការប្រជុំឱ្យរកដំណោះស្រាយលើបញ្ហានេះជាបន្ទាន់។
តាមហ្វេសប៊ុក រាជរដ្ឋាភិបាលបានរកឃើញនូវវិធានការចាំបាច់មួយចំនួន ដើម្បីដាក់ចេញជួយអន្តរាគមន៍លើ តម្លៃស្រូវរបស់កសិករដែលក្នុងនោះរួមទាំងការបញ្ចេញថវិកាយ៉ាងតិច២០លានដុល្លារអាមេរិក ដើម្បីចូលរួមជាទុននៃផ្នែកផ្សេងទៀតដើម្បីគាំទ្រលើតម្លៃស្រូវ៕