ភ្នំពេញ៖រដ្ឋមន្ដ្រីការពារជាតិនៃប្រទេសជប៉ុន Tomomi Inada បាននិយាយថា ជប៉ុននឹងបង្កើតសកម្មភាពខ្លាំងថែមទៀត តាមរយះការល្បាតសមុទ្រ និងហ្វឹកហ្វឺន នាវាចរសមុទ្រនៃសមុទ្រចិនខាងត្បូង និងសមុទ្រចិនខាងកើត។
លោករដ្ឋមន្ដ្រីបានថ្លែងដូចនេះ នៅក្នុងសុន្ទរកថា មួយនៅមជ្ឈមណ្ឌលសិក្សាយុទ្ធសាស្ដ្រនិងអន្ដរជាតិ នៅទីក្រុងវ៉ាស៊ីនតោន នៅថ្ងៃព្រហស្បត្តិ៍ ទី១៥កញ្ញា ម្សិលមិញនេះ។
លោក Inada បានបញ្ជាក់ថា ប្រទេសជប៉ុន បង្កើនការពារសន្ដិសុខរបស់ខ្លួន គឺ ដូចសហរដ្ឋអាមេរិកផងដែរ ដែលបារម្ភអំពីជម្លោះដែនសមុទ្រនៃតំបន់អាស៊ី ជាពិសេសសមុទ្រចិនខាងត្បូង។ ប្រទេសជប៉ុនផងដែរកំពុងមានជម្លោះជាមួយចិន លើដែនសមុទ្រចិនខាងកើត។
លោករដ្ឋមន្ដ្រី Inada បានបញ្ជាក់ទៀតថា ជប៉ុនគាំទ្រយ៉ាងពេញទំហឹងចំពោះ សហរដ្ឋអាមេរិក ដែលធ្វើអោយមាននាវាចរ ដោយសេរីនៅសមុទ្រចិនខាងត្បូង គឺ ព្រោះតែវាអនុលោមទៅតាមច្បាប់សមុទ្រអន្ដរជាតិ។
ឆ្លើយតបនឹងការលើកឡើងរបស់រដ្ឋមន្ដ្រីជប៉ុន សេតវិមាន បានចេញសេចក្ដីថ្លែងការណ៍គាំទ្រដោយចាត់ទុកជប៉ុន គឺជាសម្ព័ន្ធមិត្តខ្លាំងមួយដើម្បី សន្ដិភាព ស្ថេរភាពតំបន់៕ប្រភព: CNA
