លោក ឡុង គឹមឃន អ្នកស្រាវជ្រាវគោលនយោបាយការបរទេស និងច្បាប់អន្តរជាតិ បានឱ្យវិទ្យុស្ត្រី FM102 ដឹងថា លោក បាន គីមូន អគ្គលេខាធិការអង្គការសហប្រជាជាតិ បានជួបជាមួយប្រមុខរដ្ឋាភិបាលកម្ពុជា សម្ដេច ហ៊ុន សែន នៅទីក្រុងវៀងច័ន្ទ ប្រទេសឡាវ ដែលជំនួបនេះ លោកថា លោក បាន គីមូន បានលើកឡើងពីវិបត្តិនយោបាយនៅកម្ពុជា។
លោកបានបញ្ជាក់ថា ជំនួបនេះបើកើតពិតមែនគឺជាប្រការល្អមួយ ដែលអគ្គលេខាធិការអង្គការសហប្រជាជាតិ ពិតជាជួយស្វែងរកដំណោះស្រាយ ចំពោះវិបត្តិនយោបាយ នៅកម្ពុជា ហើយតាមរយៈនេះ លោក សង្ឃឹមថា អ្នកនយោបាយកម្ពុជា នឹងអាចវិលទៅរកតុចរចាជាមួយគ្នាឡើងវិញ។
តាមលោក ឡុង គឹមឃន ព័ត៌មាននេះដែលលោកទទួលបានគឺតាមរយៈប្រភពមួយផ្ដល់មក ឱ្យលោកពីប្រទេសឡាវ គឺទីដែលសម្ដេចនាយករដ្ឋមន្រី្ត បានទៅចូលរួមកិច្ចប្រជុំកំពូលអាស៊ាន នៅទីនោះ ហើយក្នុងនោះមានជំនួប ឥស្សរជនបរទេស ជាច្រើន មានទាំងលោក បាន គីមូន ផងដែរ។
យ៉ាងណាក៏ដោយ អ្នកនាំពាក្យគណបក្សប្រជាជន លោក សុខ ឥសាន បានលើកឡើងថា គឺ ពិតជាមានជំនួបរវាងលោកបានគីមូន និងសម្ដេចនាយករដ្ឋមន្ដ្រីពិតមែន។ ប៉ុន្ដែ លោក អះអាងថា លោក បាន គីមូន មិនបានពិភាក្សា អំពី បញ្ហានយោបាយនៅកម្ពុជានោះទេ។
លោក សុខ ឥសាន បន្ដទៀតថា លោកអគ្គលេខាធិការអង្គការសហប្រជាជាតិ បានលើកឡើងតែពីបញ្ហា ការឡើងកម្ដៅអាកាសធាតុ បេសកកម្មរបស់កងទ័ពកម្ពុជា ក្រោមក្របខណ្ឌនៃកងរក្សាសន្ដិសុខអង្គការសហប្រជាជាតិ និងចំនុចចុងក្រោយ និយាយពីដំណើរការកាត់ទោសអតីតមេដឹកនាំខ្មែរក្រហម។
សូមរម្លឹកថា លោក បាន គីមូន ធ្លាប់បានទូរស័ព្ទមកផ្ទាល់ មកកាន់រដ្ឋមន្ដ្រីការបរទេសកម្ពុជា លោក ប្រាក់ សុខុន ដោយលោកបានលើកឡើង ពីវិបត្តិនយោបាយនៅកម្ពុជា ដែល ក្នុងនោះ លោក បាន គីមូន ចង់ឃើញអ្នកនយោបាយ មានជម្លោះគ្នា វិលមករកតុចរចាឡើងវិញ៕
