ភ្នំពេញ៖ ក្រុមស្ត្រីសហគមបឹងកក់ចង់ឲ្យអ្នកស្រី ហ៊ីលឡារី គ្លីនតុន ជាប់ឆ្នោតជាប្រធានាធិបតីសហរដ្ឋអាមេរិក ព្រោះពួកគាត់សង្ឃឹមថា ស្ត្រីក្លាយជាមេដឹកនាំនឹងអាចជួយដោះស្រាយបញ្ហាស្ត្រី ពិសេសបញ្ហារំលោភសិទ្ធិមនុស្ស និងការរំលោភបំពានកម្មសិទ្ធិដីធ្លីនៅតំបន់បឹងកក់ជាដើម។
ពួកគាត់បានថ្លែងដូចនេះក្នុងសន្និសីទសារព័ត៌មាននៅ សហគមន៍បឹងកក់នៅព្រឹកថ្ងៃទី ២៩សីហានេះក្នុងយុទ្ធនាការ ថ្ងៃចន្ទពណ៍ខ្មៅ ដើម្បីទាមទារឲ្យតុលាការដោះលែងអ្នកស្រី ទេព វន្នី មន្ដ្រីការពារសិទ្ធិមនុស្ស សកម្មជននយោបាយ និង អ្នកតំណាងរាស្ដ្រដែលត្រូវបានចាប់ឃុំខ្លួនឲ្យមានសេរីភាពឡើងវិញ។
សហគមន៍បឹងកក់ម្នាក់គឺ អ្នកស្រី ប៊ូវ សោភា បានមានប្រសាសន៍យ៉ាងដូច្នេះថា៖ «សូមចូលរួម និងគាំទ្រឲ្យលោកស្រី ហ៊ីលឡារី គ្លីនតុន ជាប់ជាប្រធានាធិបតីសហរដ្ឋអាមេរិកនៅក្នុងអាណត្តិនេះ មែនអត់! មែន សង្ឃឹមជឿជាក់ថា ជាប់ជាប្រធានាធិបតីសហរដ្ឋអាមេរិកហើយ លោកស្រីនឹងរកកិច្ចអន្តរាគមន៍ជួយដល់ស្ត្រីទូទាំងពិភពលោក ដែលកំពុងខ្វះភាពកក់ក្តៅ ដូចជាពួកយើង»។
នៅក្នុងយុទ្ធនាការថ្ងៃចន្ទពណ៍ខ្មៅ ក្នុងសប្តាហ៍ទី១៧ ក្រុមស្ត្រីសហគមន៍បឹងកក់បានឈរលើក បដា និងរូបថត អ្នកស្រី ទេព វន្នី លោកបណ្ឌិត កែម ឡី រួមទាំងរូបថត អ្នកស្រី ហ៊ីលឡារី គ្លីន តុន ដែលធ្លាប់ជួយអន្តរាគមន៍ឲ្យមានការដោះលែងស្រី្តសហគមន៍បឹងកក់ កាលពីឆ្នាំ ២០១២ និងក៏បានផ្តល់ពានរង្វាន់ជ័យលាភីរង្វាន់ស្ត្រីជាអ្នកដឹកនាំរបស់អង្គការ Vital Voices ដល់អ្នកស្រី ទេព វន្នី។
លោកស្រី ហ៊ីលឡារី គ្លីនតុន អតីតរដ្ឋមន្ត្រីការបរទេសអាមេរិក លោកស្រី គឺជាបេក្ខជន ប្រធានាធិបតីអាមេរិក នៅក្នុងការបោះឆ្នោត នៅថ្ងៃទី ៨វិច្ឆិកា ហើយ គូប្រកួតរបស់លោកស្រី គឺលោក ដូណាល ត្រាំ មហាសេដ្ឋីអចលនទ្រព្យមកពីគណបក្សសាធារណរដ្ឋ៕
