ភ្នំពេញ៖ សហគមន៍បឹងកក់បន្ដយុទ្ធនាការ ថ្ងៃចន្ទពណ៍ខ្មៅ ដោយមានរបៀបវារៈសំខាន់ៗបន្ថែមទៀត គឺទាមទារឲ្យតុលាការដោះលែងអ្នកស្រី ទេព វន្នី មន្ដ្រីការពារសិទ្ធិមនុស្ស សកម្មជននយោបាយ និង អ្នកតំណាងរាស្ដ្រដែលត្រូវបានចាប់ឃុំខ្លួន ឲ្យមានសេរីភាពឡើងវិញ។
ក្នុងសន្និសីទសារព័ត៌មានដែលធ្វើឡើងក្នុងសហគមន៍បឹងកក់នៅព្រឹកនេះ ស្ដ្រីសហគមន៍បឹងកក់ជាច្រើននាក់បានលើក បដា ជាច្រើនពាក់ព័ន្ធ និងបញ្ហារំលោភដីធ្លី បញ្ហារំលោភសិទ្ធិមនុស្ស។
ស្ដ្រីម្នាក់បានកាន់មេក្រូ ហើយស្រែកខ្លាំងៗរិះគន់ការដឹកនាំរបស់រដ្ឋាភិបាល ដែលមិនបានអនុវត្ដន៍ការគោរពសិទ្ធិមនុស្ស និងសិទ្ធិសេរីភាព របស់ប្រជាពលរដ្ឋដែលពួកគេ ចាត់ទុកថា ការអះអាងទាំងឡាយណា របស់ប្រមុខរាជរដ្ឋាភិបាលកន្លងមកជុំវិញការគោរពសិទ្ធិមនុស្សគ្រាន់តែជាការធ្វើឲ្យល្អមើលតែប៉ុណ្ណោះ។
សូមជម្រាបថា សន្និសីទសារព័ត៌មានរបស់ហគមន៍បឹងកក់នៅថ្ងៃនេះ នៅតែបន្ដស្លៀកពាក់សម្លៀកបំពាក់អាវខ្មៅបន្ដទៀត ទោះជាអាជ្ញាធរបានហាមប្រាមក៏ដោយ។ ប៉ុន្ដែពិធីនេះធ្វើឡើងដោយពុំមានវត្ដមានអ្នកស្រី ទេព វន្នី ដែលជាអ្នកដឹកនាំដូចសព្វដងនោះទេ ព្រោះអ្នកស្រីពេលនេះកំពុងឃុំខ្លួននៅពន្ធនាគារព្រៃស ករណី អាជ្ញាធរប្ដឹងចោទថា បានដឹកនាំឲ្យមានហិង្សាប្រឆាំងអ្នករាជការកាលពីឆ្នាំ ២០១៥ នៅខាងមុខផ្ទះសម្ដេច នាយករដ្ឋមន្ដ្រី៕