ភ្នំពេញ៖ ក្រសួងការបរទេស និងសហប្រតិបត្តិការអន្តរជាតិនៃព្រះរាជាណាចក្រកម្ពុជាបានចេញកំណត់ទូតតវ៉ាប្រទេស វៀតណាម ដែលប្រទេសជិតខាងនេះរំលោភព្រំដែនកម្ពុជា។
នេះបើយោងតាមកំណត់ទូតរបស់ក្រសួងការបរទេស ដែលបានចេញផ្សាយកាលពីថ្ងៃទី ១៨ ខែសីហា ឆ្នាំ២០១៦ម្សិលមិញ។ ករណីនេះ អ្នកវិភាគ បញ្ហាសង្គម ថា លើកទី១ វៀតណាម មិន ឆ្លើយតប ហើយ ឥឡូវលើកទី២ ទៀត។ លោកថា ជារឿង ត្រូវចងចាំបន្តទៀតតែលោក យល់ថា ជាគុណវិបត្តិដែល អ្នកនយោបាយបែកបាក់គ្នា។ លោក ជួន សារ៉េត រាយការណ៍បន្ត៖
កំណត់ទូតរបស់ក្រសួងការបរទេសកម្ពុជាធ្វើឡើងនៅថ្ងៃទី១៨សីហា ដោយស្នើឱ្យប្រទេសវៀតណាមបញ្ឈប់សកម្មភាពនានាដែលបានរំលោភបំពានមកលើព្រំដែនកម្ពុជា។
កំណត់ទូតបញ្ជាក់ថាការ សង់ប៉ុស្តិ៍រដ្ឋបាល ការជីកស្រះ និងសាងសង់ផ្លូវជាដើមដោយត្រូវរង់ចាំគណៈកម្មការចម្រុះព្រំដែននៃប្រទេសទាំងពីរបានបញ្ចប់ការខណ្ឌសីមាជាស្ថាពរនៅតំបន់ពាក់ព័ន្ធទាំងនោះ។
យោងតាមកំណត់ទូតនេះ គឺ ក្រសួងការបរទេសកម្ពុជាបានស្នើឱ្យប្រទេសវៀតណាម បញ្ឈប់សកម្មភាពនានា និងការរំលោភបំពានមកលើកម្ពុជានៅតាមបណ្តាខេត្តមួយចំនួនដូចជា ខេត្តមណ្ឌលគិរី ខេត្តរតនគិរី ខេត្តស្វាយរៀង ខេត្តកណ្តាលជាដើម រហូតដល់គណៈកម្មការចម្រុះព្រំដែននៃប្រទេសទាំងពីរបាន បញ្ចប់ខណ្ឌសីមាជាស្ថាពរនៅតំបន់ទាំងនេះ។
ស្របតាមស្មារតីខ្លឹមសារនៃកំណត់ទូតខាងលើនេះ រាជរដ្ឋាភិបាលកម្ពុជាស្នើឱ្យរដ្ឋាភិបាលនៃសាធារណរដ្ឋសង្គមនិយមវៀតណាមជាថ្មីម្តងទៀត សូមឱ្យបញ្ឈប់សកម្មភាពសាងសង់ទាំងអស់ជាបន្ទាន់ និងធ្វើឱ្យស្ថានភាពបរិស្ថាននៅតំបន់ដែលរំលោភបំពានទាំងនោះឱ្យមានសភាពដូចដើមវិញ ព្រមទាំងចាត់វិធានការរារាំងកុំឱ្យពលរដ្ឋវៀតណាម ចូលមកដាំដុះ ឬធ្វើសកម្មភាពនៅតំបន់ព្រំដែន ទាំងទ្បាយណាដែលមិនទាន់បញ្ចប់ការខណ្ឌសីមា និងបោះបង្គោលព្រំដែន។
ចំណែកអ្នកស្រាវជ្រាវពីការអភិវឌ្ឍសង្គម លោកបណ្ឌិត មាស នី បានផ្តល់បទសម្ភាសន៍វិទ្យុស្ត្រីនៅថ្ងៃនេះថា លោកមិនទាន់មានជំនឿចិត្តថា វៀតណាមអាចនឹងធ្វើតាមសំណើរបស់កម្ពុជានៅទ្បើយនោះទេ។ លោកលើកទ្បើងថា នាពេលកន្លងមករាជរដ្ឋាភិបាលកម្ពុជាក៏ធ្លាប់ ស្នើឱ្យវៀតណាមបញ្ឈប់ការរំលោភបំពានមកលើប្រទេសកម្ពុជាផងដែរ ប៉ុន្តែជាលទ្ធផលវៀតណាម នៅតែមិនគោរពតាមសំណើរបស់រដ្ឋាភិបាលដដែល។
លោកបណ្ឌិត មាស នី បន្តថានេះជាកំណត់ការទូតលើកទី០២ ហើយ ដែលរាជរដ្ឋាភិបាលកម្ពុជាស្នើឱ្យវៀតណាមបឈ្ឈប់ការរំលោភបំពានមកលើប្រទេសកម្ពុជា។ ត្រង់ចំនុចនេះលោកបានចោទជាសំណួរថាតើ កំណត់ការទូតលើកទី០២ អាចនឹងធ្វើឱ្យវៀតណាមគោរពតាមសំណើនេះដែរឬទេ។
លោកបណ្ឌិត មាស នី៖ «នៅពេលនេះជាកំណត់ការទូតទី០២ បាទហើយយើងរង់ចាំមើលទៀតមើលថាតើនៅពេលដែលកំណត់ការទូតទី០១ វៀតណាមគេមិនធ្វើតាម ហើយឥលូវនេះទី០២ទៀតថាតើវៀតណាមគេនឹងឆ្លើយតបយ៉ាងម៉េច ឬក៏វៀតណាមគេនៅតែប្រកាន់ជំហរថាគេមិនខ្វល់ជាមួយយើង គេចង់ធ្វើអីក៏ធ្វើទៅអាហ្នឹងចាំមើលថាតើកំណត់ការទូតរបស់កម្ពុជាមានតម្លៃសំរាប់វៀតណាមដែរឬអត់ នេះគឺជារឿងដែលយើងរង់ចាំមើល»។
លោក មាស នី ផ្ដល់អនុសាសន៍ថាដើម្បីទប់ស្កាត់ការរំលោភបំពានផ្សេងៗ ពីបណ្តាប្រទេសជិតខាងនោះថ្នាក់ដឹកនាំប្រទេស ត្រូវពង្រឹងវិស័យនយោបាយ និងសេដ្ឋកិច្ចឱ្យបានរឹងមាំជាមុនសិន ជាពិសេសអ្នកនយោបាយត្រូវផ្សះផ្សាគ្នាទ្បើងវិញ មួយវិញទៀតមិនត្រូវយកខ្មែរជាសត្រូវគ្នាឯងនោះទេ ដែលអាចធ្វើឱ្យខ្មែរឈានទៅរកការបែកបាក់គ្នា។
លោក មាស នី ៖«ខ្ញុំគិតថាសម្រាប់រដ្ឋាភិបាលទីក្រុងភ្នំពេញបច្ចុប្បន្ននេះ បើសិនជាយើងនៅតែមិនទាន់បានពង្រឹងខ្លួនយើងឱ្យបានរឹងមាំទេ ហើយយើងនៅតែចំណាយពេលឈ្លោះគ្នាឯង ហើយរករឿងតែគ្នាឯងដូចសព្វថ្ងៃនេះទៀតខ្ញុំគិតថាទី០១ វាប៉ះពាល់ទៅដល់សេដ្ឋកិច្ចរបស់យើងបើកាលណាសេដ្ឋកិច្ច ហើយនិងនយោបាយរបស់យើងវាមិនមានភាពខ្លាំងទេនោះគឺទោះបីជា យើងទៅទាក់ទងប្រទេសមហាអំណាចក៏នៅតែធ្វើឱ្យប្រទេសយើងស្ថិតនៅភាពងាយរងគ្រោះ»។
យោងតាមលទ្ធផលនៃកិច្ចប្រជុំរវាងថ្នាក់ដឹកនាំគណបក្សប្រជាជនកម្ពុជា និងបក្សកុម្មុយនីស្តវៀតណាម កាលពីថ្ងៃទី ១៩ខែមីនា ឆ្នាំ២០១៦ នៅទីក្រុងហូជីមីញ ថ្នាក់ដឹកនាំប្រទេសទាំងពីរបានឯកភាពគ្នាស្នើសុំប្រទេសបារាំងផ្តល់អ្នកជំនាញបច្ចេកទេសខាងផែនទីមកចម្លងខ្សែព្រំដែនពីផែនទីបោន ខ្នាត ១/១០០ ០០០ ទៅលើផែនទី UTM ខ្នាត១/ ៥០ ០០០។
ចំណុចព្រំដែនដែលបានឯកភាពគ្នានេះ គឺនៅចន្លោះបង្គោលព្រំដែនលេខ ៣០-៤០ ស្ថិតក្នុងខេត្តរតនគិរី និងនៅចន្លោះបង្គោលព្រំដែនលេខ១៣៨-១៤៧ ស្ថិតក្នុងភូមិដូងខេត្តស្វាយរៀង ។
ក្រសួងការបរទេសនិងសហប្រតិបត្តិការអន្តរជាតិកម្ពុជា សង្ឃឹមថា គណៈកម្មការចម្រុះព្រំដែននៃប្រទេសទាំងពីរ ដែលគ្រោងនឹងប្រជុំចង្អៀត នៅថ្ងៃទី២៩ ខែសីហា ឆ្នាំ២០១៦ នៅភ្នំពេញ៕
>
