ភ្នំពេញ៖ រដ្ឋមន្ត្រីក្រសួងបរិស្ថាន លោក សាយ សំអាល់ បានថ្លែងថា ប្រទេសកម្ពុជាបានលក់កាបូនរេដបូកដែលមានទឹកប្រាក់ជិត ៣ លានដុល្លារសហរដ្ឋអាមេរិកទៅក្រុមហ៊ុនអន្តរជាតិមួយមានឈ្មោះថា Disney មកពីសហរដ្ឋអាមេរិក។
តាមលោកសាយសំអាល់ការលក់កាបូនរេដបូកនេះ ដើម្បីការពារអភិរក្សព្រៃឈើ និងជួយសម្រួលទៅដល់ជីវភាពរស់នៅរបស់ប្រជាសហគមន៍ដែលរស់នៅក្នុងតំបន់អភិរក្សព្រៃឈើនោះ។
ការថ្លែងដូចនេះធ្វើទ្បើងនៅក្នុងពិធីចុះហត្ថលេខាលើកិច្ចព្រមព្រៀងស្តីពី «គម្រោងកាបូនរេដបូកដែនជម្រកសត្វព្រៃកែវសីមា»កាលពីថ្ងៃទី ១១ខែសីហា ម្សិលមិញនៅទីស្តីការក្រសួងបរិស្ថាន។ លោក ជួន សារ៉េតរាយការណ៍បន្ត៖
ជាលើកទីមួយហើយដែលប្រទេសកម្ពុជាបានចុះកិច្ចព្រមព្រៀងស្តីពីគម្រោង «ការកាត់បន្ថយការបំភាយឧស្ម័នផ្ទះកញ្ចក់ពីការបាត់បង់និងការរេចរិលព្រៃឈើ ឬហៅកាត់ថា រេដបូក (REDD+)» នៅក្នុងតំបន់ដែនជម្រកសត្វព្រៃកែវសីមា។
រដ្ឋមន្ត្រីក្រសួងបរិស្ថាន លោក សាយ សំអាល់ បានផ្តល់បទសម្ភាសន៍ជាមួយអ្នកសារព័ត៌មានថា ការលក់កាបូនក្រេឌីតកម្ពុជាទៅឱ្យក្រុមហ៊ុន Disney របស់សហរដ្ឋអាមេរិកមានទឹកប្រាក់ជិត ៣លានដុល្លារសហរដ្ឋអាមេរិក។
លោក សាយ សំអាល់ បន្តថាការលក់កាបូននេះគោលដៅ នឹងយកថវិការទាំងនោះទៅអភិរក្សព្រៃឈើ និងជួយសម្រួលទៅដល់ជីភាពប្រជាសហគមន៍ ដែលរស់នៅក្នុងតំបន់កែវសីមាដែលជាតំបន់នៃការលក់កាបូននោះឱ្យមានភាពប្រសើរទ្បើង។
លោក សាយ សំអាល់៖«នេះជាការទទួលខុសត្រូវរួមរបស់លោករបស់យើង នៅក្នុងពិភពលោករបស់យើងនេះ អញ្ចឹងចំពោះសហរដ្ឋអាមេរិកដែលជាប្រទេសជឿនលឿន ប្រទេសឧស្សាហកម្ម ដែលគាត់ចង់ជួយមកប្រទេសតូចតាចដូចជាកម្ពុជា ដើម្បីអភិរក្សព្រៃនៅកម្ពុជាយើងនេះ»។
លោក សាយ សំអាល់ គូសបញ្ជាក់ដែរថាថវិកាដែលទាញចេញពីការលក់កាបូននោះ នឹងយកទៅជួយដល់ប្រជាសហគមន៍តាមរយៈការបង្រៀនឱ្យពួកគេចេះចិញ្ចឹមសត្វ ធ្វើកសិកម្មជាដើមដើម្បីកុំឱ្យពួកគេកាប់ព្រៃឈើ ងាកមកចាប់អារម្មណ៍អភិរក្សព្រៃឈើវិញ។
លោក សង្កត់ធ្ងន់ថាចំពោះប្រទេសជឿនលឿន ដែលបានបញ្ចេញសារធាតុពុលច្រើនត្រូវមានតួនាទីក្នុងការចេញសំណងទៅដល់ប្រទេស ដែលស្រូបយកសារធាតុពុលទាំងនោះ ហើយលោកសង្ឃឹមថានឹងពង្រីក ការលក់កាបូនបន្ថែមទៀត។
លោក សាយ សំអាល់៖ « ចំពោះប្រទេសជឿនលើនជាពិសេសប្រទេសឧស្សាហកម្មទាំង ៨ អញ្ចឹងបានន័យថាគាត់បានបញ្ចេញនូវជាតិកាបូនហ្នឹងច្រើន ជាតិហ្គេសកាបូនហ្នឹងច្រើន អញ្ចឹងទេគាត់ក្នុងការទទួលខុសត្រូវរបស់គាត់ហ្នឹងដើម្បីជាសំណងទៅវិញក្នុងការបំពុលរបស់គាត់ជាការបញ្ចេញ ឧស្ម័នរបស់គាត់ហ្នឹងគាត់មកជួយប្រទេសតូចតាចដូចប្រទេសកម្ពុជាចឹង ដើម្បីថាឥលូវកុំប៉ះពាល់ព្រៃហ្នឹងអីទុកទៅព្រៃហ្នឹងគាត់នឹងជួយជាសំណង ជួយជាថវិកាមក»។
ឯកអគ្គរដ្ឋទូតសហរដ្ឋអាមេរិកប្រចាំប្រទេសកម្ពុជា បានសរសេរក្នុងសេចក្តីប្រកាសព័ត៌មានរបស់ក្រសួងបរិស្ថានចុះថ្ងៃទី ១១ខែសីហា ឆ្នាំ២០១៦ ថា ៖«ការការពារព្រៃឈើរបស់ប្រទេសកម្ពុជា និងការជួយដល់កម្ពុជាក្នុងការទប់ស្កាត់ការប្រែប្រួលអាកាសធាតុ គឺជាសកម្មភាពអាទិភាពរបស់រដ្ឋាភិបាល សហរដ្ឋអាមេរិក។ លោកបន្តថាទាំងនេះគឺជាបញ្ហាដែលមានសារៈសំខាន់ ហួសព្រំដែននៃប្រទេសកម្ពុជាតទៅទៀត ភាពជាដៃគូររវាងក្រុមហ៊ុនដ៏ល្បីរបស់សហរដ្ឋអាមេរិក និងប្រទេសកម្ពុជា គឺជានិម្មិតរូបមួយដែលបង្ហាញពិភពលោកឱ្យឃើញថា គេមានវិធីប្រកបដោយគំនិតច្នៃ ដោយប្រឌិតក្នុងការការពារភពផែនដី បង្ហាញឱ្យឃើញដៃគូនានាដែលអាចផ្តល់ការជួយបាន។ យើងពិតជាមានមោទនភាពដែលបានរួមចំណែក គាំទ្រភាពជាដៃគូនេះ ហើយយើងនឹងបន្តជួយបង្កើតយុទ្ធសាស្ត្រ ដែលអាចជួយការពារព្រៃឈើកុំឱ្យរងការកាប់បំផ្លាញ គឺស៊ូឱ្យដើមឈើនៅឈេរ ជាជាងឃើញវារលំ»។
ចំណែកនាយកអង្គការសមាគមអភិរក្សសត្វព្រៃ លោក រ៉ូស សិន ខ្មែរ បានសរសេរក្នុងសេចក្ដីប្រកាសនេះដែរ៖ «គូសបញ្ជាក់ថា ពិធីចុះហត្ថលេខារវាងសហរដ្ឋអាមេរិក និង កម្ពុជា គឺជាជោគជ័យមួយដ៏ធំធេងនៃការផ្តល់ហិរញ្ញប្បទានសម្រាប់អភិរក្សព្រៃឈើនៅក្នុងប្រទេសកម្ពុជា។ កិច្ចព្រមព្រៀងនេះនឹងមានរួមបញ្ចូលសកម្មភាពមួយចំនួនដែលអាចជួយការពារដែនជម្រកសត្វព្រៃកែវសីមា និងសហគមន៍ដែលកំពុងនៅក្នុង និងជុំវិញតំបន់ព្រៃមួយយនេះ ជាងនេះទៅទៀតកិច្ចព្រមព្រៀងនេះនឹងជួយគាំទ្រដល់សកម្មភាពអភិរក្ស និងគ្រប់គ្រងព្រៃឈើដែលរួមមានទាំងការបណ្តុះបណ្តាល មន្ត្រីរាជការអំពីការគ្រប់គ្រងព្រៃឈើ និងការពារសត្វព្រៃជាដើម»។
គម្រោងកាបូនរេដបូកនៅដែនជម្រកសត្វព្រៃកែវសីមា បានចាប់ដំណើរការនៅឆ្នាំ២០១០នៅក្នុងខេត្តមណ្ឌលគិរី និងខេត្តក្រចេះ ហើយអនុវត្តដោយក្រសួងបរិស្ថាន និងអង្គារ WCS ក្រោមជំនួយឧបត្ថម្ភពីគម្រោងគាំទ្រព្រៃឈើ និងជីវចម្រុះនៃទីភ្នាក់ងារ USAID ដែលជាគម្រោងមួយអនុវត្តដោយអង្គារ Winrock International និងម្ចាស់ជំនួយដទៃទៀត៕
