ភ្នំពេញ៖ មន្ត្រីក្រសួងអប់រំយុវជននិងកីទ្បាលោក ចឹក លីម លើកទ្បើងថា យុវជនបានដើរតួនាទីយ៉ាងសំខាន់នៅក្នុងដំណើរការអភិបាលកិច្ចល្អនៅក្នុងសង្គមកម្ពុជា ព្រោះយុជនជាអ្នកក្រេបជញ្ជក់ចំណេះដឹង នឹងបទពិសោធន៍ផ្សេងៗទៀតពីស្ថាប័នពាក់ព័ន្ធ ដើម្បីយកទៅអនុវត្តក្នុងការកសាងប្រទេសជាតិ។ ការលើកទ្បើងដូចនេះធ្វើទ្បើងនៅក្នុងវេទិកាយុវជនកម្ពុជា ក្រោមប្រធានបទស្តីពី«ការវិនិយោគទៅលើយុវជនដើម្បីលើកម្ពស់អភិបាលកិច្ចល្អនិងការអភិវឌ្ឍប្រកបដោយចីរភាព» ព្រឹកថ្ងៃទី ២៩ ខែកក្កដា ឆ្នាំ២០១៦ នៅមជ្ឈមណ្ឌលដាយកូនៀរ (ICF)។
យុវជនត្រូវបានរាជរដ្ឋាភិបាលកម្ពុជា ក៏ដូចជាអង្គការសង្គមស៊ីវិលតែងតែយកចិត្តទុកដាក់ទៅលើពួកគេ ការយកចិត្តទុកដាក់នេះព្រោះយុវជន គឺជាទំពាំងស្នងឬស្សី ដែលមិនអាចខ្វះខាតបាន ហើយការចូលរបស់យុវជន ក៏ជាកត្តាចាំបាច់មួយដែលជំរុញឱ្យប្រទេសជាតិមានការអភិវឌ្ឍន៍។ ការលើកទ្បើងដូចនេះគេតែងតែឮចេញពីមន្ត្រីរដ្ឋាភិបាល ក៏ដូចជាអង្គការសង្គមស៊ីវិលដែលធ្វើការពាក់ព័ន្ធជាមួយយុវជននាពេលកន្លងមកក៏ដូចជាបច្ចុប្បន្ននេះដែរ។ នេះជាលើកឡើងពីសំណាក់មន្ត្រីរដ្ឋាភិបាល និងមន្ត្រីអង្គការសង្គមស៊ីវិលដែលធ្វើការពាក់ព័ន្ធនិងយុវជន ដែលបានចូលរួមក្នុងវេទិកាយុវជនកម្ពុជា ក្រោមប្រធានបទស្តីពី«ការវិនិយោគទៅលើយុវជនដើម្បីលើកម្ពស់អភិបាលកិច្ចល្អនិងការអភិវឌ្ឍប្រកបដោយចីរភាព»
អគ្គនាយករងនៃអគ្គនាយកដ្ឋានយុវជននៃក្រសួងអប់រំ យុវជន និងកីទ្បា លោក ចឹក លីម បានផ្តល់បទសម្ភាសន៍ជាមួយអ្នកសារព័ត៌មាននៅថ្ងៃនេះថា នៅក្នុងប្រទេសកម្ពុជាគឺមានចំនួនប្រជាពលរដ្ឋជាយុវជនច្រើនជាងគេបើប្រៀបធៀបជាមួយនឹងបណ្តាប្រទេសនៅក្នុងអាស៊ាន។ ហើយនៅក្នុងដំណាក់កាលយុវជននេះ គឺជាដំណាក់កាលក្រេបជញ្ជក់ចំណេះដឹង ជំនាញ និងបទពិសោធន៍ដើម្បីយកទៅអភិវឌ្ឍប្រទេសជាតិ។
លោកបន្ថែមថា ការចូលរួម ឬការបញ្ចេញមតិ របស់យុវជនពិតជាមានសារៈសំខាន់ក្នុងដំណើរការអភិបាលកិច្ចល្អ ព្រោះការចូលរួមនេះ គឺដើម្បីជាប្រយោជន៍ទៅដល់យុវជនខ្លួនឯងផ្ទាល់ ក៏ដូចជាប្រទេសជាតិផងដែរ។លោក ចឹក លីម៖ «សម្រាប់យុវជនដែលមានអាយុចន្លោះពីអាយុ ១៥ ដល់ ៣០ ដែលជាកម្រិតនិយមន័យរបស់រាជរដ្ឋាភិបាលហ្នឹងគឺមានរហូតទៅដល់ ៣៣ ភាគរយ នេះបើតាមជំរឿននៅឆ្នាំ២០០៨ ហើយសម្រាប់យុវជនដែលមានអាយុក្រោម ៣៥ ឆ្នាំមានរហូតទៅដល់ ៦៥ភាគរយ ដូច្នេះនេះគឺសបញ្ជាក់ឱ្យឃើញអំពីចំនួនយុវជនវ័យក្មេងគឺមានច្រើនហើយជាកម្លាំងប្រកបដោយសក្តានុពលនៅក្នុងការរួមចំណែកដើម្បីអភិវឌ្ឍប្រទេសជាតិ…»។
លោក ចឹក លីម គូសបញ្ជាក់ទៀតថា ដើម្បីចូលរួមចំណែកក្នុងការលើកកម្ពស់យុវជនឱ្យចូលរួមអភិវឌ្ឍប្រទេសជាតិដែរនោះ ក្រសួងអប់រំបានចេញនូវគោលនយោបាយរបស់ខ្លួនចំនួន ១២ យុទ្ធសាស្ត្រ។ នៅក្នុងចំណោមយុទ្ធសាស្ត្រយុទ្ធសាស្ត្រទាំង ១២ នោះ ក្រសួងអប់រំបានផ្តោតអទិភាពទៅលើវិស័យមួយចំនួន ដូចជា ពង្រឹងវិស័យអប់រំតាមរយៈការប្រទ្បងបាក់ឌុប វិស័យការងារ និងទៅលើសុខភាពជាដើម។ មន្ត្រីក្រសួងអប់រំរូបនេះ ស្នើឱ្យយុវជនត្រូវយល់ពីតួនាទី និងភារកិច្ចក្នុងនាមជាយុវជន ត្រូវពង្រឹងសមត្ថភាពរបស់ខ្លួននៅតាមបណ្តាគ្រឹះស្ថានដែលខ្លួនកំពុងសិក្សា ជាពិសេសចូលរួមសកម្មភាពសង្គមនានាជាមួយរដ្ឋាភិបាល ឬវេទិការបស់អង្គការសង្គមស៊ីវិលជាដើម។
ទាក់ទងនឹងការលើកទ្បើងខាងលើនេះដែរ យុវជន រិន សុគន្ធតារា សិក្សានៅសាកលវិទ្យាល័យជាតិគ្រប់ គ្រងជំនាញគណនេយ្យ បានលើកទ្បើងថា យុវជនពិតជាមានសារៈសំខាន់ក្នុងការរួមចំណែកកសាងប្រទេសជាតិឱ្យមានភាពរីកចំរើន។ យុវជន សុគន្ធតារា បន្តថា យុវជនគឺជាទំពាំងស្នងឬស្សីដែលរាជរដ្ឋា ភិបាល និងអង្គការសង្គមស៊ីវិលផ្សេងៗទៀតត្រូវតែយកចិត្តទុកដាក់។ យុវជនរូបនេះបន្តទៀតថា ការចូលរួមរបស់យុវជននៅក្នុងសង្គមនឹងធ្វើឱ្យប្រទេសជាតិមានអភិបាលកិច្ចល្អ ជាពិសេសនឹងធ្វើឱ្យប្រទេសជាតិមានការផ្លាស់ប្តូរឱ្យកាន់តែមានភាពល្អប្រសើរទ្បើង។ ទន្ទឹមនឹងការលើកទ្បើងដូចនេះដែរ សុគន្ធតារា បញ្ជាក់ថា យុវជនកំពុងតែជួបកត្តារាំងស្ទះមួយចំនួនដែលមិនអាច ឱ្យពួកគេអាចចូលរួមអភិវឌ្ឍប្រទេសជាតិ។ តារា ថាកត្តារាំងស្ទះទាំងនោះគឺការទទួលបានព័ត៌មាននៅមានកម្រិត មានន័យថាកាលដែលយុវជនបាត់បង់ព័ត៌មានទាក់ទងនិងវិស័យអប់រំ វិស័យការងារជាដើមនោះយុវជនពិតជាមិនអាចចូលរួមចំ ណែកកសាងប្រទេសជាតិជាមួយរាជរដ្ឋាភិបាលបាននោះទេ។ រិន សុគន្ធតារា៖ «ខ្ញុំគិតថារាជរដ្ឋាភិបាលគួរតែផ្តល់ព័ត៌មាន ក៏ដូចជាបើកឱកាសឱ្យបានច្រើនសម្រាប់ឱ្យយុវជនបានស្វែងយល់ដូចជាឱកាសព័ត៌មានផ្សេងៗនៅក្នុងស្ថាប័នអង្គការ ក៏ដូចជាឱ្យយុវជនអាចចូលរួមឱ្យបានច្រើននៅក្នុងស្ថាប័នអង្គការ ក៏ដូជានៅក្នុងសង្គមកម្ពុជាឱ្យបានច្រើន»។
ចំណែក តំណាងរៀបចំកម្មវិធី និងជានាយកប្រតិបត្តិអង្គការស្ម័គ្រចិត្តដើម្បីសង្គម ហៅកាត់ថា CVS លោក ប៉េន សុមុនី មានប្រសាសន៍ថា គោលបំណងសំខាន់នៃវេទិកាយុវជននៅថ្ងៃនេះ គឺដើម្បីបើកឱកាសឱ្យយុវជនបានជួបជាមួយមន្ត្រីក្រសួងពាក់ព័ន្ធ ដើម្បីលើកពីបញ្ហាប្រឈមរបស់ពួកគេក្នុងការចូលរួមចំណែកអភិវឌ្ឍប្រទេសជាតិ។
លោក ប៉េន សុមុនី បញ្ជាក់ថា ការចូលរួមរបស់យុវជននៅក្នុងការកសាងជាតិ គឺជារឿងមិនអាចខ្វះខាតបាន ដែលគ្រប់ស្ថាប័នពាក់ព័ន្ធត្រូវតែគិតគូរពិចារណា ដើម្បីជម្រុញឱ្យយុជនអាចចូលរួមចំណែកក្នុងការអភិវឌ្ឍប្រទេសជាតិ។
លោក ប៉េន សុមុនី ក៏លើកទ្បើងដែរថា ដើម្បីចូលរួមធ្វើយ៉ាងណាឱ្យមានអភិបាលកិច្ចល្អប្រកបដោយចីរភាពនោះ យុវជនត្រូវពង្រឹងសមត្ថភាពចំណេះដឹង និងជំនាញរបស់ខ្លួនជាមុនសិន ហើយរដ្ឋាភិបាលក៏ត្រូវគាំទ្រ និងធ្វើការបណ្តុះបណ្តាលយុវជនឱ្យបានច្រើន ជាពិសេសត្រូវផ្តល់ឱកាសឱ្យយុជនអាចកាន់តួនាទីសំខាន់ៗមួយចំនួនឱ្យកាន់តែច្រើនថែមទៀត។ ប៉ុន្តែលោក ប៉េន សុមុនី សង្កត់ធ្ងន់ថា កត្តាសំខាន់ដែល រាំងស្ទះទៅដល់យុជនចូលរួមកសាងជាតិបាននោះ គឺការប្រព្រឹត្តិអំពើពុករលួយ។ លោកមានប្រសាសន៍យ៉ាងដូច្នេះថា៖«អំពើពុករលួយយើងឃើញថាប្រទេសកម្ពុជាយើងទាំងអស់គ្នាបានទទួលស្គាល់ ហើយបានដឹងថានៅតែជាបញ្ហាធំមួយដែលប៉ះពាល់ដល់ដំណើរការអភិវឌ្ឍរបស់ប្រទេសកម្ពុជាជាពិសេសគឺយុវជនខ្លួនឯងតែម្តងដោយសារអំពើពុករលួយជាមេរោគដែលរាំងស្ទះដល់ដំណើរការរាំងស្ទះការចូលរួមរបស់យុវជន…»
សូមបញ្ជាក់ថាវេទិកាយុវជនកម្ពុជា ស្តីពី ការវិនិយោគទៅលើយុវជនដើម្បីលើកកម្ពស់អភិបាលកិច្ចល្អ និងការអភិវឌ្ឍប្រកបដោយចីរភាពមានការចូលរួម ១៦ អង្គការមានដូចជាអង្គការស្ម័គ្រចិត្តដើម្បីសង្គម(CVS) អង្គការទស្សនៈពិភពលោក (WVS) អង្គការយុវជនខ្មែរនិងអភិវឌ្ឍន៍សង្គម (KYSD) អង្គការកម្មវិធីអភិវឌ្ឍន៍ធនធានយុវជន (YRDP) ជាដើម ព្រមទាំងមានស្ថាប័នរដ្ឋចូលរួមផងដែរដូចជា តំណាងក្រសួងអប់រំយុវជននិងកីទ្បា តំណាងក្រសួងរៀបចំដែនដីនគរូបនីយកម្មនិងសំណង់ និងតំណាងក្រសួងការងារ សរុបដែលចូលរួមមានប្រមាណជា ១៥០ នាក់៕