លោក សម រង្ស៊ី ប្រធានគណបក្សង្គ្រោះជាតិ នឹងប្តឹងទាស់ទៅសាលាឧទ្ធរណ៍ក្នុងសំនុំរឿងបរិហាកេរ្តិ៍ សម្តេច ហេង សំរិន បន្ទាប់ពីសាលាដំបូងរាជធានីភ្នំពេញប្រកាស សាលក្រមបង្គាប់ឲ្យមេបក្សប្រឆាំង រូបនេះបង់ប្រាក់ពិន័យចំនួន ១៦០លានរៀល កាលពីម្សិលមិញ។
អ្នកតំណាងរាស្ត្រ CNRP លោក ឃី វណ្ណដេត បានថ្លែងថា ប្រធានគណបក្សសង្គ្រោះជាតិ លោក សម រង្ស៊ី នឹងប្តឹងទាស់សាលក្រមរបស់សាលាដំបូងរាជធានីភ្នំពេញ ដែលបានបង្គាប់ឲ្យមេបក្សប្រឆាំងបង់ប្រាក់ពិន័យចូលរដ្ឋចំនួន ១០លានរៀល និង ១៥០លានរៀលទៅឲ្យដើមបណ្តឹង។
លោក ឃី វណ្ណដេត៖«សាលក្រមសាលាដំបូងបានកាត់ទោស លោកប្រធាន សម រង្ស៊ី ឲ្យបង់ប្រាក់ពិន័យជូនរដ្ឋ ១០លានរៀល ហើយបង់ប្រាក់សងជំងឺចិត្ត ១៥០លានរៀល។ សូមបញ្ជាក់ថា សាលក្រមនេះលោកប្រធាន សម រង្ស៊ី លោកនឹងឲ្យមេធាវីលោកប្តឹងជំទាស់ សាលក្រមនេះ»។
សូមជម្រាបថា លោក គី តិច មេធាវីការពារក្តីឲ្យសម្តេច ហេង សំរិន ប្រធានសភា បានប្តឹងលោក សម រង្ស៊ី មេបក្សប្រឆាំង ពីបទបរិហារកេរ្តិ៍ជាសាធារណៈ ធ្វើឡើងបន្ទាប់ពី លោក សម រង្ស៊ី បានសរសេរ និងបង្ហោះវីឌីអូមួយនៅលើបណ្តាញសង្គមហ្វេសប៊ុករបស់លោក កាលពីកំឡុងខែ វិច្ឆិកា ឆ្នាំ២០១៥ កន្លងមក ដោយមេបក្សប្រឆាំងសរសេរយ៉ាងនេះថា៖«យើងចងចាំថារបបកើតថ្ងៃ ៧មករា ១៩៧៩ បានឲ្យតុលាការរបស់គេកាត់ទោសប្រហារជីវិតសម្តេចព្រះនរោត្តម សីហនុ ដោយចោទព្រះអង្គថាជាជនក្បត់ជាតិ»។
វីដេអូដែលលោក សម រង្ស៊ី បានបង្ហោះនោះគឺសម្ដេច សីហនុ បានរៀបរាប់ពីកងទ័ពវៀតណាមចូលមកកម្ពុជា និងពាក់ព័ន្ធនឹងសម្ដេច ហេង សំរិន ជាប្រធានរដ្ឋសភាពេលបច្ចុប្បន្ននេះ។
ជាមួយគ្នានេះ លោក សម រង្ស៊ី បានសរសេរលើហ្វេសប៊ុករបស់លោកដោយ ចាត់ទុកសាលក្រមនេះ ថាជារឿងនយោបាយ។ ករណីលោកគិតថា សម្ដេច ហេង សំរិន ប្ដឹងលោកតាមនាមជាដើមបណ្ដឹង ក្នុងសម័យកាលណា ថាតើតាមនាមប្រធានរដ្ឋសភា ឬតាមនាម ប្រមុខរដ្ឋនៃរបបសាធារណរដ្ឋប្រជាមានិតកម្ពុជា៕
