ភ្នំពេញ៖ ខ្មាន់កាំភ្លើងបាញ់សម្លាប់ លោក កែម ឡី អ្នកវិភាគនយោបាយ ត្រូវបានបញ្ជូនមកកាន់សាលាដំបូងរាជធានីភ្នំពេញហើយ បន្ទាប់ពីមានការសាកសួរ នៅស្នងការដ្ឋានគរបាលរយៈពេល២ថ្ងៃ ។
តាមសេចក្ដីរាយការណ៍ ជនល្មើសដែលមានរហស្សនាម ជួប សម្លាប់ ត្រូវបានសមត្ថកិច្ច នាំខ្លួនមកកាន់ តុលាការនៅម៉ោង ៨ព្រឹក ថ្ងៃអង្គារនេះ ដោយសមត្ថកិច្ចដាក់ក្នុងរថយន្ត ដឹកចូល តុលាការយ៉ាងលឿន ដោយពុំមានអ្នកសារព័ត៌មាន ថតរូបជននេះបានឡើយ។
អ្នកនាំពាក្យសាលាដំបូងរាជធានីភ្នំពេញ លោក លី សុផាណា បានសរសេរក្នុង សារតេលេក្រាម កាលថ្ងៃច័ន្ទទី១១ កក្កដា អយ្យការសាលាដំបូងរាជធានីភ្នំពេញ បានទទួលសំណុំរឿងបាញ់សម្លាប់លោក បណ្ឌិត កែម ឡី រួចរាល់ហើយ។
កាលពីថ្ងៃចន្ទម្សិលមិញ សម្ដេចនាយករដ្ឋមន្ត្រី បានបញ្ជាឱ្យសមត្ថកិច្ចពង្រឹងសន្តិសុខ ខណៈសម្ដេច សម្ដែងការចូលរួមកាន់ទុក្ខគ្រួសារលោក កែម ឡី។
ទាក់ករណីនេះអង្គការក្នុងប្រទេសជាង៧០អង្គការបានចេញសេចក្ដីថ្លែងការណ៍ ដោយថ្កោលទោសយ៉ាងខ្លាំង ចំពោះអំពើឃាតកម្មលើ លោក កែម ឡី។ អង្គការទាំងនោះបានទាមទារ ឱ្យ ស្វែងរកយុត្តិធម៌ពិតៗជូនជនរងគ្រោះ។
សូមជំរាបថា លោក បណ្ឌិត កែម ឡី អ្នកវិភាគនយោបាយឯករាជ្យ ត្រូវបានឃាតករបាញ់សម្លាប់ នៅក្នុង Star Mart នៅក្នុងខណ្ឌចំការមន ក្បែរស្តុបបូកគោ នៅវេលាម៉ោង៨និង៤៥នាទីព្រឹក ដែលត្រូវនឹងថ្ងៃទី១០ ខែកក្កដា ឆ្នាំ២០១៦៕
