ភ្នំពេញ ៖ មណ្ឌលព័ត៌មានស្ដ្រីកម្ពុជាWMC បានធ្វើអត្ថាធិប្បាយមួយដែលមានចំណងជើងថា CNRPត្រូវបានវាយផ្ទប់ជញ្ជាំង ។ នៅសប្ដាហ៍នេះWMC ធ្វើអត្ថាធិប្បាយមួយជ្រុងទៀតរឿងរបស់CNRP ដដែលហើយជារឿងតភាគដោយមានចំណងជើងថា «ងើបពីសន្លប់ CNRP រត់ទៅប្ដឹងUN ដើម្បីជួយសង្គ្រោះខ្លួន» ។ ចុះហេតុអ្វីបានជាយើងត្រូវដាក់ចំណងជើងនៃការធ្វើអត្ថាធិប្បាយដូចនេះហើយមានអត្ថន័យដូចម្ដេច?
CNRPមានឈ្មោះពេញថាគណបក្សសង្គ្រោះជាតិ ឬគេហៅម្យ៉ាងថា គណបក្សប្រឆាំងនៅកម្ពុជា ។ ក្នុងកាលៈទេសៈនេះត្រូវបានគេមើលឃើញថាCNRP រងការវាយប្រហារយ៉ាងខ្លាំងក្លាដូចគេថាវាយផ្ទប់ជញ្ជាំងពីសំណាក់គូប្រកួតជាមួយគ្នា ដែលមានឥទ្ធិពលខ្លាំងទាំងផ្លូវច្បាប់គឺនិយាយឲ្យចំទៅអំណាចរដ្ឋទាំងស្រុង ។
ឥឡូវនេះគេប្រើពាក្យមួយឃ្លាទៀតគឺCNRP ក្រោយពីវាយផ្ទប់ជញ្ជាំងហើយនោះគឺដួលសន្លប់ ក្រោយពីដួលសន្លប់ដឹងខ្លួនរួចរត់ទៅប្ដឹងអង្គការសហប្រជាជាតិឲ្យជួយខ្លួន ។
តើកត្តាអ្វីខ្លះដែលនាំឲ្យCNRP សំរេចប្ដឹងអង្គការសហប្រជាជាតិ?
គេអាចនិយាយបានថាចាប់តាំងពីពាក់កណ្ដាលឆ្នាំ២០១៥មក CNRPរងទុក្ខទោសយ៉ាងខ្លាំងគឺពេលនោះហើយសកម្មជនរបស់គណបក្សនេះ១៥នាក់ ត្រូវបានចាប់ឃុំខ្លួនដាក់ក្នុងពន្ធនាគារវិញ ហើយភា្លមៗបន្ទាប់មកទៀតមេបក្សប្រឆាំងដ៏ល្បីល្បាញគឺលោក សម រង្ស៊ី ត្រូវបានដាក់ឲ្យស្ថិតនៅក្នុងដែនអំណាចរបស់តុលាការចាប់ខ្លួន ចោទប្រកាន់ក្នុងសំណុំរឿងចំនួន៥ដាច់ដោយឡែកពីគ្នាដែលគេហៅថាបទចោទបរិហារកេរ្តិ៍ មន្ត្រីជាន់ខ្ពស់បក្សកាន់អំណាច ។
នៅដំណាក់កាលចុងក្រោយទៀតតំណាងរាស្ដ្រពីររូបត្រូវបានចាប់ឃុំខ្លួន ដែលគេហៅថា «ធ្វើវិទ្ធង្សនាមួយប្រឆាំងរដ្ឋ» លើការបោះបង្គោលព្រំដែនជាមួយប្រទេសវៀតណាម ស្របពេលអ្នកតំណាងរាស្ដ្រពីររូបទៀតរបស់CNRPដដែលនេះ ត្រូវបានបាតុករមួយក្រុមដែលគេថាមកពីស្ថាប័នប្រដាប់អាវុធរបស់រដ្ឋបានវាយប្រហារ ឱ្យរងរបួសធ្ងន់ធ្ងរ ។ បន្ទាប់ពីរឿងនេះមកក៏មានរឿងថ្មីទៀតគឺលោក កឹម សុខា មេដឹកនាំជាន់ខ្ពស់ម្នាក់ដ៏ល្បីឈ្មោះរបស់CNRPត្រូវបានបណ្ដេញពីតំណែងអនុប្រធានទីមួយ នៃរដ្ឋសភា ។
បន្ថែមលើនេះ លោក កឹម សុខា ជួបរឿងអាស្រូវមួយទៀត គឺករណី កញ្ញា ខុម ចាន់តារាទីហៅស្រីមុំ ។ សំនុំរឿង កញ្ញាស្រីមុំ បានធ្វើឱ្យមេដឹកនាំបក្ស លំដាប់ទី២ របស់CNRP រងការ កោះហៅឡើងតុលាការ ចំនួន ២ករណី គឺករណីបរិហារប្ដឹងដោយ កញ្ញា ធី សុវណ្ណថា និង ករណី សញ្ជារកម្ម ។
ក្នុងសំណុំរឿងដដែលនេះតំណាងរាស្ដ្រពីររូបទៀត កំពុងស្ថិតក្នុងដែនសមត្ថកិច្ចរបស់តុលាការ ។ ពួកគាត់ត្រូវបានកោះហៅចូលខ្លួន ដើម្បីបំភ្លឺនូវអ្វីដែលគេចោទថាពេស្យាចាក្នុងសំណុំរឿងកញ្ញា ខុម ចាន់តារាទី ហៅស្រីមុំ ។
ដោយបង្ហាញពីជំហរក្នុងនាមជាបក្សធំមួយមានឥទ្ធិពល CNRP សំរេចមិនឲ្យតំណាងរាស្ដ្រ៣ រូបនេះទៅបំភ្លឺនៅតុលាការតាមការកោះហៅ ដោយសំអាងថាខ្លួនមានអភ័យឯកសិទ្ធិដែលធានាដោយរដ្ឋធម្មនុញ្ញត្រង់មាត្រា៨០ ។
តែយ៉ាងងណាក៏ដោយមើលទៅCNRP ទប់លំហ្នឹងខ្លួនលែងបានហើយមើលទៅ បានជារត់ទៅប្ដឹងអង្គការសហប្រជាជាតិឲ្យជួយខ្លួន ដោយទាមទារឲ្យស្ថាប័នពិភពលោកមួយនេះកោះប្រជុំសន្និសីទទីក្រុងប៉ារិស នូវអ្វីដែលលិខិតរបស់CNRPបញ្ចូនទៅ អគ្គលេខាធិការ បានគីមូន និយាយថា ជួយស្ដារលទ្ធិប្រជាធិបតេយ្យ និងសិទ្ធិសេរីភាពពហុបក្សនៅកម្ពុជាឡើងវិញ ។
យោងតាមលិខិតរបស់CNRP មានចុះហត្ថលេខាតំណាងរាស្ដ្ររហូតដល់ទៅ៥៥រូបធ្វើឡើងកាលពីថ្ងៃទី១៧ឧសភា ដោយជំរាបជូនអគ្គលេខាធិការអង្គការសហប្រជាជាតិ បាន គីមូន ថារយៈពេល២៥ឆ្នាំមកនេះ ពោលគឺតាំងពីកម្ពុជាបានសុខសន្ដិភាព២៣តុលា១៩៩១ គឺកម្ពុជាមិនបានធ្វើឲ្យប្រសើរនូវការគោរពសិទ្ធិមនុស្សប្រជាធិបតេយ្យអ្វីឡើយ ហើយថាកាន់តែថប់ថយនិងគ្រោះថ្នាក់ទៅវិញ ។
លិខិតសុំអន្ដរាគមន៍របស់CNRP ទៅUN គឺអាចជាការអង្រួនជួងនៅទីក្រុងញ៉ូយ៉ក ជាស្នាក់ការកណ្ដាលរបស់អង្គការនេះឲ្យដឹងពីភាពគ្រោះថ្នាក់ និងដំណើរការប្រជាធិបតេយ្យសេរីភាព នៅប្រទេសកម្ពុជាដល់កម្រិតមួយ ដែលគណបក្សនេះហៅថាគួរឲ្យព្រួយបារម្ភបំផុត ។
យន្ដការចុងក្រោយរបស់CNRP ដូចនេះអាចត្រូវបានមើលឃើញថា បក្សប្រឆាំងធំមួយនេះ ប្រហែលជាអស់ជំនឿលើការផ្សះផ្សារជាតិដោយជាតិសាសន៍ខ្លួនឯង ហើយបានជាសុំអន្តរាគមន៍ពីអ្នកដទៃ ។
លិខិតរបស់CNRPផ្ញើទៅលោក បាន គីមូន ធ្វើឡើងបន្ទាប់ពីCNRP សុំអន្តរាគមន៍ទៅព្រះមហាក្សត្រ ចំនួន២ដង ដែលមកទល់ពេលនេះ មិនទាន់មានការឆ្លើយតប ។
ក្រោយពីវាយផ្ទប់ជញ្ជាំងគឺCNRPបានដួលសន្លប់ ប៉ុន្តែបានដឹងខ្លួនហើយក៏ប្រញាប់រត់ទៅរកស្ថាប័នមួយដែលធ្លាប់ជួយឲ្យកម្ពុជាមានការបង្រួបបង្រួមជាតិនៅឆ្នាំ១៩៩១ ឲ្យជួយស្ដារអាយុជីវិតរបស់បក្សប្រឆាំងនេះបន្តរស់ទៅថ្ងៃមុខទៀត ។
តើផែនការរបស់CNRP បានសំរេចជោគជ័យឬយ៉ាងណានោះគឺគេមិនទាន់ដឹងនៅឡើយទេខណៈបក្សកាន់អំណាចធំនៅកម្ពុជា មិនទាន់ឃើញប្រតិកម្មជាផ្លូវការអ្វីឡើយ ។
យ៉ាងណាក៏ដោយគេមើលឃើញថាCNRPជ្រើសរើសយន្ដការនេះប្រហែលជាមានប្រសិទ្ធភាពហើយចង់មិនចង់ បក្សកាន់អំណាចក៏អាចគិតបានថាCNRP បានទៅអង្រួនជួងនៅក្រុងញ៉ូយ៉ក ឲ្យផ្អើលពិភពលោកអំពីរឿង កម្ពុជា ៕
ដោយ នួន បូរិន