ភ្នំពេញ៖សម្តេចនាយករដ្ឋមន្ត្រី ហ៊ុន សែន មានប្រសាសន៍ថា ការដឹកនាំរបស់លោករហូតមកដល់ពេលនេះ សម្ដេចមិនដែលយកប្រទេសណាធ្វើជាគម្រូ ទោះជាប្រទេសនោះជឿនលឿន ឬរីកចម្រើនយ៉ាងណាក៏ដោយ ។ អ្វីដែលសម្ដេចធ្វើគឺស្របទៅនឹងស្ថានភាពប្រទេសកម្ពុជា ។ តែអ្នកតាមដានបញ្ហាសង្គមយល់ថារាល់ការដឹកនាំ តែងមានការផ្សារភ្ជាប់ទៅនឹងទ្រឹស្តីវិទ្យានយោបាយ ឬសេដ្ឋកិច្ចពីខាងណាមួយ ។ កញ្ញា ឆេង ណាតា រាយការណ៍ព័ត៌មាននេះ៖
ថ្លែងក្នុងកម្មវិធីចែកសញ្ញាបត្រដល់និស្សិត IIC នៅវិទ្យាស្ថានជាតិអប់រំ នៅព្រឹកថ្ងៃទី១២ខែឧសភានេះ សម្តេចនាយករដ្ឋមន្ត្រី ហ៊ុន សែន មានប្រសាសន៍ថា សម្ដេច មិនយកប្រទេសណាធ្វើជាគម្រូក្នុងការដឹកនាំប្រទេសនោះទេ ។
សម្ដេចបន្តថា ប្រទេសលើពិភពលោក មានស្តង់ដារច្រើន ហើយមិនទាន់មានប្រទេសណាមួយអាចយកធ្វើជាស្តង់ដារបានទេ ។ សម្ដេចថា ប្រទេសខ្លះដើរវាយគេ ហើយប្រទេសខ្លះទៀតអាងខ្លួនជាអ្នកមានដាក់ទណ្ឌកម្មគេ ។ ដោយសារមើលឃើញដូចនេះសម្ដេច មិនអាច យកប្រទេសណាជាគ្រូទេ គឺធ្វើទៅតាមសភាពការរបស់ប្រទេស ។
សម្តេចនាយករដ្ឋមន្ត្រី មានប្រសាសន៍បន្តថា បទពិសោធន៍ខ្លះ លោកនឹងរៀនសូត្រពីគេ តែយកមកច្នៃឱ្យជារបស់កម្ពុជាវិញ ។ សម្ដេចបន្ថែមថាអាចមានបទពិសោធន៍ប្រទេសខ្លះដូចកម្ពុជា ប៉ុន្តែមិនត្រូវចម្លងយកមកទាំងស្រុងនោះទេ គឺធ្វើទៅតាមសភាពជាក់ស្តែងនៃកម្ពុជា ។
តែសម្រាប់អ្នកវិភាគបញ្ហាសង្គម យល់ផ្សេងពី ទស្សនៈរបស់សម្ដេចនាយករដ្ឋមន្ត្រីគឺ ការដឹកនាំ ប្រព័ន្ធសេដ្ឋកិច្ច និងនយោបាយ ។
លោក មាស នី អ្នកស្រាវជ្រាវពីការអភិវឌ្ឍសង្គម បានមានប្រសាសន៍ថា ការលើកឡើងនេះគ្រាន់តែជាការយល់ឃើញរបស់សម្តេចនាយករដ្ឋមន្ត្រីតែប៉ុណ្ណោះ ប៉ុន្តែរាល់ការដឹកនាំតែងមានការផ្សារភ្ជាប់ទៅនឹងទ្រឹស្តីវិទ្យានយោបាយ ពីខាងមួយគឺ អាចតាមទម្រង់ប្រទេសខាងលិច ប្រទេសខាងកើត ឬតាមកុម្មនីសជាដើម ។ លោកពន្យល់ថា ប្រព័ន្ធដឹកនាំសេដ្ឋកិច្ចគឺកម្ពុជា ក៏ប្រហាក់ប្រហែលប្រទេសដទៃដែរ តែបើនិយាយពីប្រព័ន្ធ នយោបាយ គឺដូចប្រទេសភូមា ។
ប្រទេសកម្ពុជា បានឆ្លងកាត់របបជាច្រើនមកហើយ គឺមានរបបអាណាព្យាបាលបារាំង របបសង្គមរាស្ត្រនិយម របស់សម្ដេចឪ នរោត្តមសីហនុ របបសាធារណៈរដ្ឋលន់នល់ របប កម្ពុជាប្រជាធិបតេយ្យ (ខ្មែរក្រហម) របបប្រជាមានិតកម្ពុជា (កុម្មុយនិស្ត) និងបច្ចុប្បន្ន របបរាជានិយម អាស្រ័យរដ្ឋធម្មនុញ្ញ ។
ប្រទេសកម្ពុជា ត្រូវបានមើលឃើញថាមានលំនាំសេដ្ឋកិច្ច មិនខុសពីប្រទេសដទៃនោះទេ គឺមានលំហូរទីផ្សារ លំហូរវិនិយោគទុន និងលំហូរហិរញ្ញវត្ថុក្នុងការអភិវឌ្ឍន៍ ប្រទេសប្រហាក់ប្រហែលគ្នា ។ តែកម្ពុជា ក៍ត្រូវបានរាប់ថាជាប្រទេសមានបំណុលសាធារណៈ និងបំណុលប្រទេស មានទំហំច្រើនគួរឱ្យព្រួយបារម្ភ ដែរ ។ បើតាមតួលេខ របស់បក្សប្រឆាំងថាកម្ពុជា ជំពាក់បំណុលបរទេស ជិត៦០០០លានដុល្លារ ៕
