ក្រសួងទេសចរណ៍បានរៀបចំ និងដាក់ឱ្យអនុវត្ត “ស្តង់ដាផ្ទះស្នាក់កម្ពុជា” ក្នុងគោលបំណងពង្រឹងគុណភាពសេវាផ្ទះស្នាក់នៅក្នុងព្រះរាជាណាចក្រកម្ពុជា ដោយផ្តល់នូវសេវាគុណភាពល្អ និងភាពកក់ក្តៅដល់ភ្ញៀវទេសចរជាតិ និងអន្តរជាតិ ដែលនឹងគាំទ្រដល់យុទ្ធសាស្ត្រពីកម្មវិធីវិស័យទេសចរណ៍នៅកម្ពុជា។
យោងតាមសេចក្តីប្រកាសព័ត៌មានរបស់ក្រសួងទេសចរណ៍នាពេលថ្មីៗនេះ បានឱ្យដឹងថា ដើម្បីជំរុញការអនុវត្តស្តង់ដាផ្ទះស្នាក់កម្ពុជា ស្របតាមអនុសាសន៍របស់សម្តេច ហ៊ុន សែន ក្រសួងទេសចរណ៍ បានដាក់ចេញនូវ “យុទ្ធនាការផ្ទះស្នាក់ខ្មែរ” ក្នុងគោលបំណងជំរុញផ្សព្វផ្សាយការរៀបចំផ្ទះស្នាក់ឱ្យកាន់តែទូលំទូលាយ ប្រកបដោយគុណភាព និងប្រសិទ្ធភាព ដើម្បីផ្តល់ឱកាសឱ្យភ្ញៀវទេសចរអាចស្នាក់នៅជាមួយប្រជាពលរដ្ឋកម្ពុជាផ្ទាល់តែម្តង ដែលនឹងផ្តល់លទ្ធភាពឱ្យពួកគេស្វែងយល់ពីប្រពៃណី វប្បធម៌ និងការរស់នៅរបស់ប្រជាជនកម្ពុជា។
ដើម្បីឱ្យការដាក់ចេញនូវ “យុទ្ធនាការផ្ទះស្នាក់ខ្មែរ” នេះមានដំណើរការប្រព្រឹត្តទៅប្រកបដោយជោគជ័យក្រសួងទេសចរណ៍ប្រកាសជ្រើសរើសយុវជនស្ម័គ្រចិត្តចូលរួមក្នុង បណ្តាញយុវជនទេសចរណ៍ និងទីក្រុងស្អាត ដែលនឹងទទួលបានការបណ្តុះបណ្តាលក្លាយជាគ្រូបង្គោលក្នុងការផ្សព្វផ្សាយ បញ្ច្រាបការយល់ដឹងអំពីវិស័យទេសចរណ៍ ភាពស្អាត និងបៃតង បដិសណ្ឋារកិច្ចល្អ និងស្តង់ដាផ្ទះស្នាក់កម្ពុជាឱ្យកាន់តែទូលំទូលាយទៅដល់ប្រជាពលរដ្ឋនៅតាមមូលដ្ឋាន។
លក្ខណ្ឌនៃការជ្រើសរើស យុវជនទាំងពីរភេទ ត្រូវមានអាយុចាប់ពី ១៨ឆ្នាំ ដល់ ៣៥ ឆ្នាំ មានចំណាប់អារម្មណ៍ក្នុងការស្វែងរកចំណេះដឹងថ្មីៗនិងទទួលបទពិសោធល្អៗ បំពេញភារកិច្ចប្រកបដោយការប្តេជ្ញាចិត្ត ឆន្ទះ និងស្មារតីគឺទំនួលខុសត្រូវខ្ពស់។
អត្ថប្រយោជន៍ គឺយុវជនស្ម័គ្រចិត្តនិងទទួលបានការបណ្តុះបណ្តាលលើជំនាញបដិសណ្ឋារកិច្ច និងជំនាញបច្ចេកទេសពាក់ព័ន្ធនានា ដើម្បីក្លាយជាគ្រូបង្គោលក្នុងការអនុវត្តកម្មវិធី “យុទ្ធនាការផ្ទះស្នាក់ខ្មែរ” យុវជនស្ម័គ្រចិត្តនឹងទទួលបានបទពិសោធ ជំនាញ និងចំណេះដឹងបន្ថែមទៀតលើការងារសង្គម ក្រសួងទេសចរណ៍ និងគណៈកម្មាធិការជាតិវាយតម្លៃទីក្រុងស្អាត នឹងផ្តល់ជូននូវវិញ្ញាបនបត្រ បញ្ជាក់ការសរសើរដល់យុវជដែលបានចូលរួម។
គួរបញ្ជាក់ថា ការប្រកាសជ្រើសរើស យុវជន សិស្ស-និស្សិត ស្ម័គ្រចិត្តខាងលើនេះចាប់ ទទួលពាក្យចាប់តាំងពីថ្ងៃទី២៦ ខែកុម្ភៈ ឆ្នាំ២០១៦ ដោយមិនមានរយៈពេលកំណត់ឡើយ។
