តាមមជ្ឈមណ្ឌលសកម្មភាពកំចាត់មីនកម្ពុជា CMAC ថាចិនបានផ្ដល់ជំនួយឥតសំណងជាង៤លានដុល្លា សម្រាប់លុបបំបាត់គ្រាប់មីននៅកម្ពុជាក្នុងឆ្នាំ២០២៤។ គម្រោងក្នុងឆ្នាំ២០២៤នេះ CMAC បញ្ជាក់ថា មានផែនការបន្ដកិច្ចប្រតិបត្តិការបោសសម្អាតមីន និងសំណល់យុទ្ធភណ្ឌសង្គ្រាមក្នុងខេត្តចំនួន៣ មានខេត្តកំពង់ធំ ខេត្តសៀមរាប និងខេត្តព្រះវិហារ។
បើតាមការឱ្យដឹងពី CMAC សកម្មភាពសំខាន់ៗដែលត្រូវធ្វើមានដូចជា ការបោសសម្អាតផ្ទៃដីមានបញ្ហាគ្រាប់មីន និងសំណល់យុទ្ធភណ្ឌ សង្គ្រាមចំនួនជាង៣៤០០ហិកតា ការស្រាវជាវ និងប្រមូលព័ត៌មានអំពីសំណល់យុទ្ធភណ្ឌសង្គ្រាម និងគ្រាប់បែកចង្កោមចំនួនប្រមាណ៩០០០ពហុកោណ(ទីតាំង) និងការពង្រឹងសមត្ថភាពថ្នាក់ក្រោមជាតិលើការងារអប់រំយល់ដឹងពីគ្រោះថ្នាក់ដោយសារមីន និងសង្គ្រោះជនពិការដោយសារមីនចំនួនជាង៣០០គោលដៅ។ គម្រោងនេះផ្តល់ផលប្រយោជន៍ដោយផ្ទាល់ និងដោយប្រយោលដល់ប្រជាពលរដ្ឋប្រមាណ៧០ម៉ឺននាក់។
កម្ពុជាទើបប្រកាសថា ខេត្តក្រចេះ ជាខេត្តទី១៥ ដែលប្រកាសថាជាខេត្តអស់មីន។ ជាមួយគ្នា អាជ្ញាធរមីនបញ្ជាក់ថា ថាចំនួនជនរងគ្រោះដោយសារគ្រាប់មីនបានថយមកនៅត្រឹម៣២នាក់ ក្នុងឆ្នាំ២០២៣ ខណៈកាលពីឆ្នាំ១៩៩៦ មានដល់ ៤៣២០ នាក់។
យ៉ាងណា កម្ពុជាអះអាងថា ត្រឹមឆ្នាំ២០២៥កម្ពុជានឹងអស់មីន ខណៈខេត្តចំនួន១០ ប្រតិបត្តិករកំពុងបោសសម្អាត រួមមានខេត្តសៀមរាប រតនគិរី បាត់ដំបង កោះកុង ពោធិ៍សាត់ ប៉ៃលិន បន្ទាយមានជ័យ ឧត្តរមានជ័យ កំពង់ធំ និងខេត្តព្រះវិហារ។
ចំណែករាជធានី-ខេត្តចំនួន១៥ ដែលត្រូវបានប្រកាសថា អស់មីនរួចហើយ រួមមានខេត្តស្ទឹងត្រែង ខេត្តកែប ខេត្តព្រៃវែង ខេត្តព្រះសីហនុ រាជធានីភ្នំពេញ ខេត្តកណ្តាល ត្បូងឃ្មុំ កំពង់ចាម ស្វាយរៀង កំពង់ឆ្នាំង តាកែវ កំពត មណ្ឌលគិរី កំពង់ស្ពឺ និងខេត្តក្រចេះ៕
