លោក លី ធុជ អនុប្រធានទី១ អាជ្ញាធរមីន នៅថ្ងៃទី២៦ ខែមីនា ឆ្នាំ២០២៤នេះ បានលើកឡើងថា ចំនួនជនរងគ្រោះដោយសារគ្រាប់មីនបានថយមកនៅត្រឹម៣២នាក់ ក្នុងឆ្នាំ២០២៣ ខណៈកាលពីឆ្នាំ១៩៩៦ មានដល់ ៤៣២០ នាក់។ ការលើកឡើងរបស់លោក លី ធុជ នៅពេលចូលរួមប្រកាសថាខេត្តក្រចេះ គឺជាខេត្តទី១៥ ដែលអស់មីន បន្ទាប់ពីខេត្តកំពង់ស្ពឺ និងខេត្តមណ្ឌលគិរី ក្នុងរយៈពេល៧ខែចុងក្រោយនេះ។
តាមលោក លី ធុជ រយៈពេលជាង ៣០ឆ្នាំ ចាប់ពីឆ្នាំ ១៩៩២ រហូតដល់ឆ្នាំ២០២៣ កម្ពុជា បានរំដោះផ្ទៃដីពីការគំរាមដោយសារមីន និងសំណល់ជាតិផ្ទុះពីសង្រ្គាមចំនួន ៣០២៤ គីឡូម៉ែត្រក្រឡា។ ផ្ទៃដីទាំងនេះបានយកទៅប្រើប្រាស់ និងបង្កបង្កើនផលក្នុងវិស័យកសិកម្ម៧៦% ហេដ្ឋារចនាសម្ព័ន្ធ ៥% និងផ្សេងៗ ១៩%។
លោក លី ធុជ ថាឆ្នាំ២០២៣ គឺជាឆ្នាំប្រវត្តិសាស្រ្តនៃការងារបោសសម្អាតមីន និងគ្រាប់ ដែលរដ្ឋាភិបាលបានធ្វើការបោសសម្អាតច្រើនជាងគេក្នុងរយៈពេលជាង ៣០ឆ្នាំមកនេះ។ តាមប្រភពដដែលថា ផ្ទៃដីដែលសម្រេចបានពីការសម្អាតមីនក្នុងឆ្នាំ២០២៣ មានរហូតដល់ ៤៤៤ គីឡូម៉ែត្រក្រឡា ដោយបានរកឃើញ និងបំផ្លាញចោលមីនប្រឆាំងមនុស្សចំនួនជាង ២ម៉ឺនគ្រាប់ មីនប្រឆាំងរថក្រោះចំនួន ២០៤ គ្រាប់ និងគ្រាប់មិនទាន់ផ្ទុះជាង៦ម៉ឺនគ្រាប់។
គួរជម្រាបថា នៅកម្ពុជាមានរាជធានីខេត្តចំនួន១៥ ដែលត្រូវបានប្រកាសថា អស់មីនរួមមានខេត្តស្ទឹងត្រែង ខេត្តកែប ខេត្តព្រៃវែង ខេត្តព្រះសីហនុ រាជធានីភ្នំពេញ ខេត្តកណ្តាល ត្បូងឃ្មុំ កំពង់ចាម ស្វាយរៀង កំពង់ឆ្នាំង តាកែវ កំពត មណ្ឌលគិរី កំពង់ស្ពឺ និងខេត្តក្រចេះ។
ចំណែកខេត្តចំនួន១០ ទៀត ប្រតិបត្តិករកំពុងបោសសម្អាត ក្នុងនោះមានខេត្តសៀមរាប រតនគិរី បាត់ដំបង កោះកុង ពោធិ៍សាត់ ប៉ៃលិន បន្ទាយមានជ័យ ឧត្តរមានជ័យ កំពង់ធំ និងខេត្តព្រះវិហារ៕
