ភ្នំពេញ៖ ក្រុមហ៊ុន ខេមបូឌាន អ៊ិនវេសស្ទ័រ ខបភើរេសិន ភីអិលស៊ី(CIC Plc) ចេញសេចក្តីស្រាយបំភ្លឺដោយអះអាងថាករណីភាពចម្រូងចម្រាសកើតឡើងលើក្រុមហ៊ុនខ្លួននេះមិនមែនជាករណីបោកប្រាស់ បង្កឱ្យពលរដ្ឋ និងវិនិយោគគិនទទួលរងគ្រោះដោយសារខ្លួនឡើយ។ ក៏ប៉ុន្តែបញ្ហានេះ ទទួលរងពីឥទ្ធិពលនៃវិបត្តិសេដ្ឋកិច្ចសកល និងភាពខ្វះចន្លោះក្នុងការត្រៀមខ្លួនរបស់ក្រុមហ៊ុន។
សេចក្តីបំភ្លឺនេះធ្វើឡើងបន្ទាប់ពីមានស្ថាប័នប្រព័ន្ធផ្សព្វផ្សាយក្នុងស្រុក និងមហាជន ជាពិសេសវិនិយោគគិនដែលជាភាគីពាក់ព័ន្ធស្នើឱ្យមានការសើបអង្កេត ហើយអះអាងថាមានជនរងគ្រោះជាច្រើនរងភាពអយុត្តិធម៌ ដោយសារតែក្រុមហ៊ុន CIC នេះ។
ជាក់ស្តែងនៅថ្ងៃទី២៣ មីនា ២០២៤ លោក គួច ម៉េងលី អគ្គនាយកប្រតិបត្តិ នៃក្រុមហ៊ុន ម៉េងលី ជេ. គួច អេឌ្យូខេសិន និងជាអ្នកជំនួញមួយរូបផងនោះ ចេញមុខបញ្ជាក់ថាខ្លួនក៏ជាជនរងគ្រោះមួយរូបដែរក្នុងចំណោមពលរដ្ឋរងគ្រោះដទៃទៀត។ លោកបន្ថែមថាករណីនេះ ត្រូវតែមានការស៊ើបអង្កេតពីព្រោះថាប្រាក់រាប់សិបលានដុល្លារត្រូវបានបាត់បង់ ហើយគ្រួសារនិងជីវិតមនុស្សជាច្រើននាក់បានរងនូវផលប៉ះពាល់ និងការឈឺចាប់ដោយសារតែក្លែងបន្លំ ទាំងនេះ ។
ជាដំណោះស្រាយក្រុមហ៊ុន CIC ចេញមុខប្រកាសជាសារធារណថា ខ្លួននឹងដោះស្រាយជូនភាគីវិនិយោគគិនទាំងអស់។ ក្នុងនោះសំណេរដើមនៃសេចក្តីបកស្រាយបំភ្លឺបង្ហាញថា «ក្រុមហ៊ុននៅតែរក្សាគោលជំហរយ៉ាងម៉ឺងម៉ាត់ក្នុងការដោះស្រាយបញ្ហាចំពោះមុខ ដោយធានាឱ្យបានជាអតិបរមានូវផលប្រយោជន៍របស់វិនិយោគិនគ្រប់រូប។ ក្រុមហ៊ុននឹងបន្តធ្វើការដោយអនុលោមទៅតាមគោលការណ៍ និងបទប្បញ្ញត្តិ ដែលកំណត់ដោយនិយ័តករមូលបត្រកម្ពុជា (ន.ម.ក) ដែលតែងតែតម្កល់ផលប្រយោជន៍វិនិយោគិន ជាអទិភាព។»
ជុំវិញករណីនេះ នៅថ្ងៃទី ២៥ ខែមីនា ឆ្នាំ២០២៤ គណៈមេធាវីកម្ពុជាបានចេញសេចក្តីប្រកាសព័ត៌មានមួយស្តីពីការបង្កើតក្រុមមេធាវីជួយប្រជាពលរដ្ឋពាក់ព័ន្ធនឹងក្រុមហ៊ុន ខេមបូឌាន អ៊ិនវេសស្ទ័រ ខបភើរេសិន ភីអិលស៊ី(CIC Plc)។ ក្នុងនោះ ពលរដ្ឋអាចស្នើសុំពិគ្រោះយោបល់ និងការពារតាមផ្លូវច្បាប់បាន ប្រសិនបើពួកគេបាត់បង់ផលប្រយោជន៍ពាក់ព័ន្ធនឹងគម្រោងប្រមូលប្រាក់របស់ក្រុមហ៊ុន CIC Plc មួយនេះ៕
